Raskazvajem, dzie na prastorach internetu možna znajści kino na viečar — u biełaruskaj ahučcy ci z subcitrami.
«Kinakipa»
Bolš za 1300 filmaŭ ź biełaruskaj ahučkaj ci subcitrami prapanuje prajekt «Kinakipa». Repiertuar — suśvietna viadomaje kino, sieryjały i multfilmy.
U telehramie za inicyjatyvaj sočać bolš za 11 tysiač čałaviek — stužki tam publikujucca hatovymi dla prahladu fajłami.
A na sajcie svoj film na viečar možna vybrać praź filtry: hod vypusku, kraina, papularnaść i inšyja. Chacia ŭsio kino dasiažnaje biaspłatna, stvaralniki prapanujuć im padziakavać: danat na adzin dalar dapamoža apłacić 120 hadzin stryminhu, a piać dalaraŭ — 600 hadzin prahladu.
Što hladzieć: «Častyja pabočnyja efiekty». Amierykanski multsieryjał dla darosłych pra zmahańnie siabroŭ ź vialikaj farmakałahičnaj kampanijaj.
Screenka
Screenka — jašče adzin sajt ź biełaruskamoŭnaj ahučkaj ci subcitrami na filmy, ale za prahlad daviadziecca zapłacić.
Padpiska na miesiac dla adnoj pryłady budzie kaštavać 2,99 dalara, a na hod dla troch pryład — 24,99 dalara. Jość roznyja płany.
Što hladzieć: «Eternaŭt» — navinka ad Netflix pra toje, jak arhiencincy pieražyvajuć apakalipsis.
«Kinakonh»
Na sajcie «Kinakonhu» hladač znojdzie nie tak šmat filmaŭ, ale vybrać usio adno jość z čaho. Asabliva dla dziaciej: inicyjatyva ahučyła niekalki papularnych multfilmaŭ — u tym liku «Śvinku Pepu» i «Čarapaški-nindzia». Prahlad — biaspłatny.
Što hladzieć: Dziciačy multsieryjał «Ronia, dačka razbojnika». Fantastyčnaje apaviadańnie pa matyvach knihi Astryd Lindhren.
ANIBEL
Asnoŭny kantent ANIBEL — anime i manha ŭ biełaruskaj ahučcy ci z subcitrami, ale jość i inšyja filmy. Znajści niešta pa svaim huście dapamohuć raździeły na płatformie — akramia videa, tut jość i pierakłady na biełaruskuju movu dla hulniaŭ.
Što hladzieć: «Jevanhielijon». Japonski anime-sieryjał pra zmahańnie čałaviectva z tajamničymi «Aniołami» — hihanckimi inšapłanietnymi istotami.
«Łahodny cmok»
Amatarski prajekt ad entuzijasta ź psieŭdanimam «Vožyk». Chłopiec časta vykarystoŭvaje hatovyja subcitry i ahučvaje filmy ci karotkija skietčy pa ich.
Admietnaść «Łahodnaha cmoka» — humarystyčnyja stužki i multfilmy, karotki mietr i dakumientalnaje kino.
Što hladzieć: «Hambit karalevy». Sieryjał pra žyćcio amierykanskaj šachmatystki z subcitrami na biełaruskaj movie.
«Havarun»
Stvaralniki «Havaruna» imknucca pierš za ŭsio dapamahčy maładym baćkam vychavać svaich dziaciej na biełaruskaj movie. Tut — ahromnisty vybar multfilmaŭ i sieryjałaŭ dla dziaciej u biełaruskaj ahučcy, aŭdyjaknihi i pieśni.
Prahlad dasiažny praz padpisku: minimalnaja suma za miesiac — 15 rubloŭ, maksimalnaja — 300 rubloŭ. Płan padpiski zaležyć ad taho, što vy chočacie atrymać — tolki multfilmy ci jašče padziaku, zhadvańnie ŭ rolikach albo navat udzieł u ahučvańni filma.
Što hladzieć: «Miki Maŭs» 2013—2019 hadoŭ. Lehiendarny multsieryjał pra pryhody maleńkaha myšaniaci.
«Źnička»
Na hetaj anłajn-płatformie znojdziecie dobry katałoh ź filmaŭ, sieryjałaŭ i multfilmaŭ roznych žanraŭ. Adnak kateharyzavać ich nielha — zručniej za ŭsio šukać praz pole ŭ pravaj vierchniaj častcy sajta.
«Źnička» publikuje stužki biaspłatnymi da prahladu, časta paznačajučy, chto ź inšych biełaruskich inicyjatyŭ zajmaŭsia pierakładam ci ahučvańniem.
Što hladzieć: «Parazity». Paŭdniovakarejski tryler pra niebahatuju siamju ź Sieuła.
Ciapier čytajuć
U Minsku pierasabrali Rakaŭskaje pradmieście. Tam užo hulajuć, fatahrafujucca i jaduć6
Kamientary
Nie ŭsie staronki viedaŭ!
Dziakuju
Ale z papularnaściu pryjdzie i ŭvaha “centra-HE”
Pa-biełarusku tolki čytaju knihi i tolki kłasiku. Čamu? Tamu što mnie nie padabajecca sučasnaja masavaja kultura, bo pišuć i zdymajuć adno vidoviščnaje h*ŭno... Biezsensoŭnyja chranamietražy i słovazbory pra ništo.
Pačytać z sučasnaha možna narmalna tolki publicystyku. Pačytać i zabycca. A kab nie zabycca - lepiej nie čytać naohuł sučaśnikaŭ.
Muzyka - tolki kłasika i raz-poraz, - 1 łyžka ŭdzień. Bietchovien apoŭdni zdolny abudzić rozum i serca.
Filmy hladžu tolki pa-rusku i tolki staryja.
Karciny hladžu na kirmašy staroćciaŭ.
Čamu? Dy tamu, što ŭ hetaj vašaj miedyjaprastory niama miesca dla mianie - dla majho Eho.
Ja pišu heta dziela taho, kab ahalić miechanizm abyjakavaści sučasnaha čałavieka da kulturnaha raźvićcia. Jość i takija ludzi jak ja. Voś.