«Eternaŭt»: arhiencinski Netflix vypuściŭ šmatznačny sieryjał pra apakalipsis

Apošnim časam kinošnikaŭ ciahnie na temu apakalipsisu. Poŭnamietražki nakštałt «Cichaje miesca: Dzień pieršy», sieryjały «Apošnija z nas» i «Schovišča» — tolki frahmienty vialikaha trendu, jaki naradziŭsia praz pandemiju i klimatyčny kryzis.

Va ŭsich razvahach pra apakalipsis Arhiencina zvyčajna vyhladaje ščaślivym vyklučeńniem. Jana daloka ad jadziernych krain, vyroščvaje šmat zbožža, nie ŭdzielničaje ŭ kanfliktach, maje bahata vady i fajny klimat — kamu vyžyvać, jak nie im?

I tym nie mienš, «Eternaŭt» (El Eternauta), novy sieryjał ad Netflix, jakraz apaviadaje pra apakalipsis u Arhiencinie, dy jašče i robić heta zachaplalna. Krytyki ŭžo acanili: naprykład, na bujnoj kinapłatformie IMDb sieryjał maje rejtynh 7,7 bałaŭ z 10, a na sajcie Rotten Tomatoes «Eternaŭt» nabraŭ 93% uchvaleńnia ad krytykaŭ.

U centry hetaj historyi znachodzicca Chuan Salva, zvyčajny žychar Buenas-Ajresa, jaki bavić čas uviečary razam ź siabrami. Na dvary leta, ale ŭ horadzie raptoŭna raspačynajecca vialiki śniehapad. Chuan ź siabrami bačać u vokny — kožny, chto traplaje pad śnieh biez abarony, hinie za chvilinu. 

Zastajecca zamknucca doma, ale jak heta rabić, kali zapasy chutka skončacca i niedzie tam, u horadzie, zastalisia blizkija? Chuan nadziavaje procihaz i vybirajecca ŭ horad, dzie znachodzić inšych žyvych.

Pavialičyć

Pavialičyć

Arhiencincy, jakija pieražyli apakalipsis, daviedvajucca, što heta tolki pačatak novaha žyćcia, i dapamohi nie budzie. Kompasy pierastajuć pracavać, to-bok mahnitnaha pola Ziamli bolš niama, i śnieh nie spyniajecca. Tym časam ludzi za ličanyja hadziny pieratvarajucca ŭ vorahaŭ adno adnamu, bo čaho nie zrobiš dziela vyžyvańnia?

Sapraŭdnyja vorahi, adnak, źjaviacca bližej da siaredziny sieryjała. Heta inšapłanietniki — śniehapad byŭ tolki pačatkam ich uvarvańnia na Ziamlu. I tut asobny dziakuj stvaralnikam «Eternaŭta» za toje, što nie pieratvaryli hetuju historyju ŭ stereatypnaje apaviadańnie pra monstraŭ z komiksa, u centry sieryjała zastajucca ludzi i ich pačućci.

«Eternaŭta» źniali pa adnajmiennym komiksie kanca 50-ch, jaki atrymaŭ status kultavaha ŭ Łacinskaj Amierycy. Jašče tady – i asabliva paźniej, kali ŭ Arhientynie ŭstalavałasia dyktatura — komiks zrabiŭsia simvałam baraćby z aŭtarytaryzmam. 

Bo što robić Chuan? Heta nie supierhieroj z amierykanskim pašpartam u styli Brusa Uilisa, jaki ratuje ŭsiu płanietu. Heta prosty čałaviek, taki ž, jak my z vami, jaki prosta choča biaśpieki dla rodnych i siabroŭ, ale hatovy dapamahać i nieznajomym. Jaho Buenas-Ajres — nie toje miesca, kudy prylatajuć tysiačy rataŭnikoŭ, jon vymušany ratavać siabie sam, bo dapamohi nie budzie, i dziaržava nie moža prapanavać ničoha tałkovaha.

Pavialičyć

«Eternaŭt» — heta jašče i antyvajenny prajekt, i ŭsio praz toje, jakaja budučynia vyjšła ŭ jaho stvaralnikaŭ. Heta nie taja historyja, dzie čałaviectva abjadnałasia paśla śmiarotnaj pahrozy i pabudavała ŭtopiju. Chuan Salva vymušany biaskonca zmahacca, i na miesca adnych vorahaŭ prychodziać inšyja — na inšapłanietnikach usio nie skončycca. I heta zaŭždy nie zmahańnie za vialikija ideały, a zrazumiełaja kožnamu abarona blizkich, što nie mienš dastojna, ale bližej da realnaści.

Hetaja trahičnaja baraćba prostaha čałavieka, u jakoj niama nadziei i niama vidavočnaha sensu — nibyta aluzija na ŭsie vojny i dyktatury. Darečy, jana tłumačyć i samo słova «eternaŭt», jakim Ektar Aesterchield, stvaralnik komiksa-pieršakrynicy, nazvaŭ Chuana: eterno pierakładajecca ź ispanskaj jak «viečny», nauta — tradycyjny sufiks dla abaznačeńnia padarožnikaŭ, jak u słovie «astranaŭt».

Eternaŭt — viečny padarožnik, tamu što jaho baraćba nie maje kanca. Takaja ž biaskoncaja baraćba šmatlikich ludziej u roznych kutkach śvieta za dastojnaje žyćcio, praŭdu, volu, prosta za siabie. I za toje, kab u ciažkich umovach nie zhubić siabie, tamu što apakalipsis — tolki pačatak.

• 9
• 0
• 0
• 0
• 1
• 1
• 0
• 0