Tradycyjnyja tancy pad harmonik, noč u pałacy, kancert Illi Šynkarenki, siamiejny kvest «Adpačni z Kupałam» — pahladzieli, jak aryhinalna možna pravieści noč muziejaŭ 17 maja.
Pahruzicca ŭ tvorčaść Janki Kupały
Staličny litaraturny muziej Janki Kupały 17 maja zaprašaje stać udzielnikami interaktyŭnaj prahramy «100 i 1 noč», pryśviečanaj 100-hodździu nadańnia Janku Kupału zvańnia narodnaha paeta Biełarusi i 120-hodździu pačatku jaho tvorčaj dziejnaści.
Abiacajuć siamiejny kvest na temu adpačynku, tematyčnuju vystavu, a taksama raznastajnyja žyvyja vystupy — naprykład, art-hrupy «Ciernica» z batleječnym śpiektaklem «Kupalskaja misteryja» i falkłornaha kalektyvu «Krona» z majstar-kłasam pa narodnych tancach i śpievach.
Bonusam — retra-kino z fondaŭ muzieja.
Košt: 10 rubloŭ, ale dla daškolnikaŭ uvachod biaspłatny.
Adznačyć z razmacham 185-hodździe Franciška Bahuševiča
Jašče adna jubilejnaja data, jakuju zaprašaje adśviatkavać u svaich ścienach Dziaržaŭny muziej historyi biełaruskaj litaratury — 185 hadoŭ z naradžeńnia piśmieńnika Franciška Bahuševiča.
Adznačać buduć maštabna: ź lalečnym teatram, tancami, pieśniami, kvizami, nieonavym šou i navat padarunkami dla 50 pieršych naviednikaŭ.
Košt: 20 rubloŭ.
Sustrecca z unukam Kołasa i patančyć na kancercie Illi Šynkarenki
Muziej Jakuba Kołasa ŭ sioletniuju muziejnuju noč arhanizuje ŭ siabie sustreču z unukam piśmieńnika — Daniłam Mickievičam. Na heta mierapryjemstva varta rehistravacca asobna. Usim, kamu nie chopić miescaŭ, prapanoŭvajuć alternatyvu. Dla dziaciej — majstar-kłasy pa hlinie i stvareńni značkoŭ, a taksama lekcyju pa stałovym etykiecie.
Asobnaja razynačka prahramy 17 maja — vialiki viečarovy kancert śpievaka i papularnaha tyktokiera Illi Šynkarenki. Kvitki na jaho taksama varta nabyvać asobna, košt — 20 rubloŭ.
Navučycca tradycyjnym biełaruskim tancam
Za miežami stalicy cikavuju prahramu padrychtavaŭ filijał Vietkaŭskaha muzieja staravierstva i biełaruskich tradycyj u Homieli. U hetym hodzie jana zasnavanaja na simvolicy ptuški pava ŭ našych prodkaŭ: «Pavu, paŭlina našy prodki nazyvali rajskaj ptuškaj. Jaje vyšyvali na ručnikach, pra jaje śpiavali ŭ pieśniach, a ŭ Niehlubcy na dziaŭčynu, apranutuju ŭ stroj, kazali: idzie jak pava».
U honar pavy čakajecca cełaja sieryja tematyčnych majstar-kłasaŭ: placieńnie sałamianaj ptuški-abiarehu, stvareńnie lalki-motanki «Ptuška-radaść» i navat ptuški-vycinanki.
Pad samuju noč u muziei pačnuć vučyć biełaruskim tancam pad harmonik. Dzie jašče možna za adzin viečar pasprabavać navučycca tančyć Lavonichu, Padyspań, Polku, Krakaviak i Bazar?
Košt: uvachod volny (ale vitajecca danat)
Stvaryć radavy hierb
Noč muziejaŭ — jašče adna nahoda źjeździć u adzin z samych pryhožych haradoŭ Biełarusi — Hrodna. Miascovy historyka-archieałahičny muziej u hetym hodzie zavablivaje atmaśfieraj kachańnia, jakuju płanujuć stvaryć tematyčnymi śpiektaklami, vystavaj i hulniami.
Asobnaja fišačka — majstar-kłas pa stvareńni radavoha hierba. Unikalnaja mahčymaść zajmieć svoj ułasny hierb, navat kali ŭ vašych prodkaŭ nikoli nie było ničoha padobnaha. Vialikaja historyja i novaja tradycyja moža pačacca z vas!
Košt: ad 10 da 35 rubloŭ
Pradehustavać stravy z paemy Mickieviča «Pan Tadevuš»
Dom-muziej Adama Mickieviča ŭ Navahrudku arhanizoŭvaje sapraŭdnuju zvanuju viačeru, na jakoj naviedniki zmohuć pačastavacca stravami, što zhadvajucca ŭ paemie «Pan Tadevuš».
Akramia hetaha, vas navučać hatavać sapraŭdnyja biełaruskija tradycyjnyja napoi. Hučyć kruta, tym bolš i ŭvachod na imprezu biaspłatny.
Vilnia
Vilenski biełaruski muziej imia Ivana Łuckieviča
Sioletniaja tema imprezy — «Biełaruski malavany vyraj». Prahrama mierapryjemstvaŭ pačniecca ŭ siaredzinie dnia kirmašom majstroŭ. Paśla abiacajuć hutarku z režysioram śpiektala «Malovani słova / Malavanyja słovy» i pakaz filma z unikalnymi kadrami z ekśpiedycyi, jakaja daśledavała žyćcio i los Aleny Kiš i Maryi Prymačenka. Dalej u płanach — vystava, majstar-kłasy, kancert i tancy pad žyvuju muzyku.
Usia prahrama tut.
Varšava
Muziej Volnaj Biełarusi
Centralnaj padziejaj imprezy stanie vystava «Piać artefaktaŭ — i tolki adna noč», jakaja budzie prachodzić z 12.00 da 00.00.
Piać biełaruskich historyka-kulturnych artefaktaŭ, nabytych roznymi inicyjatyvami ŭ emihracyi, upieršyniu buduć abjadnanyja ŭ ahulny vystavačny prajekt i pradstaŭleny tolki adzin raz i tolki na adzin dzień — na hetaj vystavie.
Inicyjatyva MALDZIS, Kłub biełaruskich miecenataŭ pry Biełaruskaj Radzie kultury i Muziej Volnaj Biełarusi prezientujuć svaje apošnija zdabytki:statut VKŁ, vydadzieny ŭ 1693 hodzie; knihu «Perehrynacyja» Mikałaja Kryštafa Radziviła, nadrukavanuju ŭ 1614 hodzie; dźvie Radziviłaŭskija mapy VKŁ XVII stahodździa; sakretny list bieraściejskaha vajavody Jana Antonija Haraina, napisany ŭ časy pieršaha padziełu Rečy Paspalitaj i nabyty Muziejem Volnaj Biełarusi.
Akramia vystavy budzie pracavać dziciačaja placoŭka «Kabiniet kartohrafa».
U 21.00 abiacajuć kancert CHORNABROVA i Lera Dele (Koob Dele).
Biełastok
Noč muziejaŭ u Biełastoku abiacaje być mabilnaj i multyinstytucyjanalnaj, u płanach — piknik na dachu Opiery, vizit u fiłarmoniju, naviedvańnie niekalkich muziejaŭ i mastackaj halerei, a naprykancy — kancert Kaciaryny Vadanosavaj.
Imprezu ładzić inicyjatyva «Aktyŭnymi Być Fajna».
Pačynajecca jana ŭ 15 hadzin ź Piknika na dachu Opiery (zbor — pierad hałoŭnym uvachodam u Opieru, ul. Odeska 1), u 17 čakajecca vizit u Opieru i Fiłarmoniju Padlaskuju. Zavieršycie viečar u mastackaj atmaśfiery z vystavaj «Zwierzyniec w sztuce» i kancertam Kaciaryny Vadonasavaj (u 23.00).
Udzieł svabodny, ale patrebna rehistracyja.
«Naša Niva» — bastyjon biełaruščyny
PADTRYMAĆ
Kamientary
[Zredahavana]