Традыцыйныя танцы пад гармонік, ноч у палацы, канцэрт Іллі Шынкарэнкі, сямейны квэст «Адпачні з Купалам» — паглядзелі, як арыгінальна можна правесці ноч музеяў 17 мая.
Пагрузіцца ў творчасць Янкі Купалы
Сталічны літаратурны музей Янкі Купалы 17 мая запрашае стаць удзельнікамі інтэрактыўнай праграмы «100 і 1 ноч», прысвечанай 100-годдзю надання Янку Купалу звання народнага паэта Беларусі і 120-годдзю пачатку яго творчай дзейнасці.
Абяцаюць сямейны квэст на тэму адпачынку, тэматычную выставу, а таксама разнастайныя жывыя выступы — напрыклад, арт-групы «Церніца» з батлеечным спектаклем «Купальская містэрыя» і фальклорнага калектыву «Крона» з майстар-класам па народных танцах і спевах.
Бонусам — рэтра-кіно з фондаў музея.
Кошт: 10 рублёў, але для дашкольнікаў уваход бясплатны.
Адзначыць з размахам 185-годдзе Францішка Багушэвіча
Яшчэ адна юбілейная дата, якую запрашае адсвяткаваць у сваіх сценах Дзяржаўны музей гісторыі беларускай літаратуры — 185 гадоў з нараджэння пісьменніка Францішка Багушэвіча.
Адзначаць будуць маштабна: з лялечным тэатрам, танцамі, песнямі, квізамі, неонавым шоу і нават падарункамі для 50 першых наведнікаў.
Кошт: 20 рублёў.
Сустрэцца з унукам Коласа і патанчыць на канцэрце Іллі Шынкарэнкі
Музей Якуба Коласа ў сёлетнюю музейную ноч арганізуе ў сябе сустрэчу з унукам пісьменніка — Данілам Міцкевічам. На гэта мерапрыемства варта рэгістравацца асобна. Усім, каму не хопіць месцаў, прапаноўваюць альтэрнатыву. Для дзяцей — майстар-класы па гліне і стварэнні значкоў, а таксама лекцыю па сталовым этыкеце.
Асобная разыначка праграмы 17 мая — вялікі вечаровы канцэрт спевака і папулярнага тыктокера Іллі Шынкарэнкі. Квіткі на яго таксама варта набываць асобна, кошт — 20 рублёў.
Навучыцца традыцыйным беларускім танцам
За межамі сталіцы цікавую праграму падрыхтаваў філіял Веткаўскага музея стараверства і беларускіх традыцый у Гомелі. У гэтым годзе яна заснаваная на сімволіцы птушкі пава ў нашых продкаў: «Паву, паўліна нашы продкі называлі райскай птушкай. Яе вышывалі на ручніках, пра яе спявалі ў песнях, а ў Неглюбцы на дзяўчыну, апранутую ў строй, казалі: ідзе як пава».
У гонар павы чакаецца цэлая серыя тэматычных майстар-класаў: пляценне саламянай птушкі-абярэгу, стварэнне лялькі-мотанкі «Птушка-радасць» і нават птушкі-выцінанкі.
Пад самую ноч у музеі пачнуць вучыць беларускім танцам пад гармонік. Дзе яшчэ можна за адзін вечар паспрабаваць навучыцца танчыць Лявоніху, Падыспань, Польку, Кракавяк і Базар?
Кошт: уваход вольны (але вітаецца данат)
Стварыць радавы герб
Ноч музеяў — яшчэ адна нагода з’ездзіць у адзін з самых прыгожых гарадоў Беларусі — Гродна. Мясцовы гісторыка-археалагічны музей у гэтым годзе заваблівае атмасферай кахання, якую плануюць стварыць тэматычнымі спектаклямі, выставай і гульнямі.
Асобная фішачка — майстар-клас па стварэнні радавога герба. Унікальная магчымасць займець свой уласны герб, нават калі ў вашых продкаў ніколі не было нічога падобнага. Вялікая гісторыя і новая традыцыя можа пачацца з вас!
Кошт: ад 10 да 35 рублёў
Прадэгуставаць стравы з паэмы Міцкевіча «Пан Тадэвуш»
Дом-музей Адама Міцкевіча ў Навагрудку арганізоўвае сапраўдную званую вячэру, на якой наведнікі змогуць пачаставацца стравамі, што згадваюцца ў паэме «Пан Тадэвуш».
Акрамя гэтага, вас навучаць гатаваць сапраўдныя беларускія традыцыйныя напоі. Гучыць крута, тым больш і ўваход на імпрэзу бясплатны.
Вільня
Віленскі беларускі музей імя Івана Луцкевіча
Сёлетняя тэма імпрэзы — «Беларускі маляваны вырай». Праграма мерапрыемстваў пачнецца ў сярэдзіне дня кірмашом майстроў. Пасля абяцаюць гутарку з рэжысёрам спекталя «Мальовані слова / Маляваныя словы» і паказ фільма з унікальнымі кадрамі з экспедыцыі, якая даследавала жыццё і лёс Алены Кіш і Марыі Прымачэнка. Далей у планах — выстава, майстар-класы, канцэрт і танцы пад жывую музыку.
Уся праграма тут.
Варшава
Музей Вольнай Беларусі
Цэнтральнай падзеяй імпрэзы стане выстава «Пяць артэфактаў — і толькі адна ноч», якая будзе праходзіць з 12.00 да 00.00.
Пяць беларускіх гісторыка-культурных артэфактаў, набытых рознымі ініцыятывамі ў эміграцыі, упершыню будуць аб’яднаныя ў агульны выставачны праект і прадстаўлены толькі адзін раз і толькі на адзін дзень — на гэтай выставе.
Ініцыятыва MALDZIS, Клуб беларускіх мецэнатаў пры Беларускай Радзе культуры і Музей Вольнай Беларусі прэзентуюць свае апошнія здабыткі:статут ВКЛ, выдадзены ў 1693 годзе; кнігу «Пэрэгрынацыя» Мікалая Крыштафа Радзівіла, надрукаваную ў 1614 годзе; дзве Радзівілаўскія мапы ВКЛ XVII стагоддзя; сакрэтны ліст берасцейскага ваяводы Яна Антонія Гараіна, напісаны ў часы першага падзелу Рэчы Паспалітай і набыты Музеем Вольнай Беларусі.
Акрамя выставы будзе працаваць дзіцячая пляцоўка «Кабінет картографа».
У 21.00 абяцаюць канцэрт CHORNABROVA і Lera Dele (Koob Dele).
Беласток
Ноч музеяў у Беластоку абяцае быць мабільнай і мультыінстытуцыянальнай, у планах — пікнік на даху Оперы, візіт у філармонію, наведванне некалькіх музеяў і мастацкай галерэі, а напрыканцы — канцэрт Кацярыны Ваданосавай.
Імпрэзу ладзіць ініцыятыва «Актыўнымі Быць Файна».
Пачынаецца яна ў 15 гадзін з Пікніка на даху Оперы (збор — перад галоўным уваходам у Оперу, ul. Odeska 1), у 17 чакаецца візіт у Оперу і Філармонію Падляскую. Завершыце вечар у мастацкай атмасферы з выставай «Zwierzyniec w sztuce» і канцэртам Кацярыны Вадонасавай (у 23.00).
Удзел свабодны, але патрэбна рэгістрацыя.
«Наша Нiва» — бастыён беларушчыны
ПАДТРЫМАЦЬ
Каментары
[Зрэдагавана]