Ziankoviču zaprasili dvuch stylistaŭ i navat kupili trusy: što zastałosia za kadram intervju ANT u hateli «Jeŭropa»

Intervju prapahandystaŭ z palitźniavolenym Jurasiom Ziankovičam u 2024 i 2025 hadach mocna adroźnivajucca. U pieršym vypadku advakat vyhladaŭ jak achviara kancłahieru — mocna schudnieły, u niepryhožaj turemnaj vopratcy. U druhim — mužčyna, jaki ŭžo nie vyhladaŭ chvaravita chudym, siadzieŭ u stylovym kaściumie ŭ hateli «Jeŭropa». Paśla navat pajšli čutki, byccam by Ziankovič žyvie ŭ hateli, a nie znachodzicca niedzie za kratami.

Były palitźniavoleny raspavioŭ, jak usio adbyvałasia na samoj spravie.

— Sioleta 3 studzienia ja trapiŭ u «amierykanku». Mianie amal adrazu advieźli na sustreču z amierykanskimi dypłamatami. Heta była pieršaja takaja sustreča za ŭvieś čas. Ad amierykanskaha dypłamata ja zmoh niešta daviedacca pra svaju siamju, bo majmu advakatu šmat času naviedvać mianie nie dazvalali.

Ziankoviču paviedamili, što ŭ bližejšym časie jaho vyzvalać — heta paćvierdzili jak amierykancy, tak i supracoŭniki KDB. Ale paśla jon pačuŭ jašče adnu frazu ad kadebešnikaŭ: «Juryj Leanidavič, nu vy ž razumiejecie, što, pakul vy ŭ nas, my budziem vas vykarystoŭvać».

— Ja adkazaŭ: «Tak, ja razumieju, što vybaru ŭ mianie niama». Navat kali b ja vielmi zachacieŭ, naŭrad ci ŭ mianie była mahčymaść admovicca.

Mužčyna raspavioŭ, što da jaho zaprasili niekalki čałaviek, siarod jakich byli supracoŭnik telebačańnia, apieratyŭniki, a taksama dva stylisty.

— Stylisty źniali ź mianie mierki i kupili nieabchodnuju vopratku — pačynajučy ad trusoŭ i da taho ćvidavaha pinžaka. Abiacali navat novyja akulary zrabić. Ale nie zmahli znajści ŭ Minsku firmu, jakaja b zrabiła akulary ciaham pracoŭnaha dnia.

U hatel «Jeŭropa» mužčynu advieźli na «miersiedesie» ŭ supravadžeńni bajcoŭ «Alfa».

— My pryjechali na padziemny parkinh, padnialisia ŭ choł, pajšli ŭ restaran, dzie adnu z załaŭ začynili dla nas. Tam užo była ŭstalavana videatechnika.

Toje, što Juraś pavinien byŭ skazać u kadry, ź im abmiarkoŭvali zahadzia.

— Da niejkaha momantu ja moh handlavacca, što kazać, a što nie. Ja imknuŭsia prytrymlivacca ahulnaviadomych faktaŭ i nie kazać toje, što možna pa-roznamu traktavać. Ale supracoŭniki KDB nastajali, što niekatoryja rečy ja pavinien ahučyć.

Było zapisana i jašče adno intervju ź Ziankovičam — dla jaho taksama nabyli novy pryhožy kaścium. Tady miescam zdymkaŭ vybrali inšy hatel — «Biełaruś». Tam śpiecyjalna začynili bar.

Heta było intervju na temu USAID — ad Jurasia patrabavali raspavieści, jakaja heta drennaja arhanizacyja i jak jana pracuje.

— Ja adrazu skazaŭ aficeram KDB, što tema ŭžo krychu nieaktualna, bo prajšło ŭžo niekalki tydniaŭ paśla zakryćcia USAID.

U vyniku prapahandysckaje «kino» biełarusam sapraŭdy nie pakazali.

— Cikava, što i pieršy, i druhi kamplekt adzieńnia mnie abiacali addać paśla vyzvaleńnia na pamiać. Maŭlaŭ, «taja vopratka ž nikomu nie patrebnaja». Nie addali. Ale ničoha strašnaha — ja sam u stanie samastojna siabie adzieć i abuć. Niachaj zastaniecca dla tych, kamu toje adzieńnie bolš patrebna.

• 3
• 0
• 1
• 10
• 3
• 0
• 1
• 0