«U najbližejšyja dni my ŭvojdziem tudy [u siektar Haza] z usioj siłaj, kab zavieršyć kampaniju», — paćvierdziŭ Nietańjachu.
Izrailskaja armija abviaściła pra pačatak novaj fazy vajennaj apieracyi ŭ siektary Haza pad nazvaj «Hideonavyje kalaśnicy».
«CACHAŁ u apošnija dni pačaŭ maštabnyja ŭdary i mabilizacyju vojskaŭ, kab ustalavać kantrol nad terytoryjami ŭ Hazie», — havorycca ŭ zajavie armii Izraila.
Pa dadzienych izrailskich vajennych, za minułyja sutki byli atakavany bolš za 150 «terarystyčnych celaŭ» pa ŭsim siektary. U toj ža čas krynicy ŭ Hazie paviedamlajuć pra mocnyja vybuchi i artabstreły ŭ rajonie horada Haza. Pa infarmacyi padkantrolnaha CHAMAS upraŭleńnia hramadzianskaj abarony, tolki napiaredadni ŭ vyniku ŭdaraŭ zahinuli nie mienš za sto čałaviek.
Nastupleńnie CACHAŁ pačałosia nieŭzabavie paśla zaviaršeńnia vizitu prezidenta ZŠA Donalda Trampa pa krainach Piersidskaha zaliva. Izrailskija ŚMI paviedamlajuć, što premjer-ministr Bińjamin Nietańjachu mieŭ namier pašyryć vajennuju apieracyju adrazu paśla adjezdu amierykanskaha lidara, kali novaje pahadnieńnie z CHAMAS nie budzie dasiahnuta.
«U najbližejšyja dni my ŭvojdziem tudy [u siektar Haza] z usioj siłaj, kab zavieršyć kampaniju», — paćvierdziŭ Nietańjachu.
Pa jaho słovach, Izrail nie spynić vajnu navat u vypadku prapanavanaha CHAMAS vyzvaleńnia astatnich zakładnikaŭ: mahčymy tolki karotkaterminovy pierapynak, ale nie poŭnaje zakančeńnie bajavych dziejańniaŭ. Na fonie eskałacyi humanitarnyja arhanizacyi i AAN papiaredžvajuć pra rastučuju pahrozu hoładu ŭ Hazie, piša Bild.
Kamientary