Kamandujučym NATA staŭ hienierał Hrynkievič. Uražvaje, nakolki jon padobny da niekatorych Hrynkievičaŭ, jakija žyvuć u Biełarusi
Jakija jašče byli viadomyja biełarusy Hrynkievičy? Jany takija roznyja. Akazvajecca, hetaje proźvišča nastolki raspaŭsiudžanaje, što hety rod daŭ nacyi jak praviednikaŭ, tak i prystasavancaŭ.
Hienierał Aleks Hrynkievič (Alexus Grynkewich) pryznačany hałoŭnakamandujučym abjadnanymi siłami NATA ŭ Jeŭropie. Jon nie adzin viadomy čałaviek z takim proźviščam.
Z rodu Hrynkievičaŭ vyjšła niekalki słaŭnych ludziej XX stahodździa: jak biełaruskija palityki, padpolščyki, miedyki, tak i savieckija hienierały. A ŭ našy časy jość i Hrynkievič-palitviazień, i Hrynkievič-sudździa — jaki sudziŭ Siarhieja Cichanoŭskaha. Dakładniej, praŭda, kazać nie «z rodu», a «z rodaŭ», bo hetaje nastolki častaje proźvišča, jano zaradziłasia paralelna ŭ roznych miascovaściach.
Proźvišča Hrynkievič spradviečna biełaruskaje. Jano pachodzić ad imieni «Hrynia, Hryńka» — heta, jak i Hryc, Hryć, Hryń, Hryša, Hryška, pamianšalnaje ad Ryhor. Tamu Hrynkievičaŭ u Biełarusi mnoha — jak i nośbitaŭ proźviščaŭ Hryckievič, Hrycaviec, Hryń, Hryc, Hrycuk, Hryharenia i Lihor.
Ceły kust Hrynkievičaŭ pachodzić z Sakolščyny, rajon horada Sakołka, — hetaja ziamla ŭ miežach ciapierašniaj Polščy da siaredziny XX stahodździa była sucelna biełaruskamoŭnaj.
Stul vyjšli takija značnyja postaci biełaruskaj historyi, jak Siarhiej Prytycki, Alaksiej Karpiuk, Balasłaŭ Hrabinski.
Stul ža, ź vioski Novy Dvor na race Bobry, vyjšaŭ Francišak Hrynkievič (1884—1933) — adzin ź pieršych ksiandzoŭ, jakija biełarusizavali kaścioł. Jon vučyŭsia ŭ Insbruku i Miunchienie, a paśla słužyŭ u Horadni i arhanizavaŭ tam biełaruski hurtok, ź jakoha vyjšła šmat patryjatyčnaj moładzi.
Jahony małodšy brat Stanisłaŭ Hrynkievič (1902—1945) byŭ z tych biełaruskich samarodkaŭ, što prajavili siabie i ŭ navucy, i ŭ haspadarcy, i ŭ palitycy. Ale mižvajennyja palaki nie davali im chodu, a saviety biaźlitasna vyniščali.
Staś Hrynkievič byŭ viadomym doktaram-psichijataram. Pracavaŭ u klinicy ŭ Vilni, vykładaŭ u Biełaruskaj himnazii ŭ Vilni i ŭ miedinstytucie ŭ Novaj Vialejcy. Ale pry hetym ciahnuŭsia i da hramadskaj dziejnaści. U 1931—1936 hadach jon byŭ namieśnikam staršyni papularnaj partyi Biełaruskaja chryścijanskaja demakratyja. Palaki aryštoŭvali jaho za jaho publikacyi — jon niamała pisaŭ na miedycynskija, hramadskija i palityčnyja temy. I da haspadarki mieŭ schilnaść: tady ž jon kupiŭ pad Vilniaj u Jeruzalimcy 17 hiektaraŭ ziamli z chataj, u jakich pasialiŭ svajakoŭ.
Kali ŭ 1939-m saviety zaniali Vilniu, jany Hrynkieviča jak aktyvista antykamunistyčnaj partyi aryštavali, ale jon zdoleŭ uciačy ź ciahnika padčas etapu. U vajnu Hrynkievič uchilaŭsia ad usiakaj supracy ź niemcami, ale ŭdzielničaŭ u pracy padpolnaj Biełaruskaj niezaležnickaj partyi. Saviety paŭtorna aryštavali jaho ŭ 1944 i rasstralali ŭ 1945-m.
Inšy Stanisłaŭ Hrynkievič (1913—1966), małodšy, byŭ plamieńnikam tych Franciška i Stanisłava. Taksama miedyk, siabar spačatku Biełaruskaha studenckaha sajuza, a paśla Biełaruskaj niezaležnickaj partyi, jon paśla Druhoj suśvietnaj trapiŭ u ZŠA. Byŭ siabram Rady BNR.
Andrej Hrynkievič (nar. 1960 u Bierlinie) byŭ dypłamatam, pasłom Biełarusi spačatku ŭ skandynaŭskich krainach, a paśla ŭ Rumynii.
Byli i Hrynkievičy, što prajavili siabie ŭ šerahach Savieckaj armii.
Franc Hrynkievič (nar. 1905, Homiel — 1943) kamandavaŭ savieckaj hvardziejskaj tankavaj bryhadaj i zahinuŭ u bajach pad Zaparožžam.
Dźmitryj Hrynkievič (1923—2009) sumlenna prajšoŭ usiu armiju, dasłužyŭsia da kapitana. A ŭ paślavajenny čas daros na słužbie da hienierał-pałkoŭnika, načalnika Hałoŭnaha štaba — pieršaha namieśnika kamandujučaha Suchaputnymi siłami (1981—1990).
Architektar Robiert Hrynkievič (1941—2021) byŭ rodam z Baranavič, a pracavaŭ u Bieraści.
Huhlicca i 34-hadovy Źmicier Hrynkievič — achoŭnik Alaksandra Łukašenki sa Słužby biaśpieki prezidenta.
A Alaksandr Hrynkievič 15 hadoŭ, z 2000 da 2015, byŭ staršyniom Hrodzienskaha abłasnoha suda.
Jość Hrynkievič i siarod siońniašnich biełaruskich pakutnikaŭ. Barysa Hrynkieviča (naradziŭsia ŭ 1985) z Salihorska schapili ŭ 2024 hodzie i asudzili pa cełym bukiecie palityčnych artykułaŭ (130, 342, 361, 368, 369) na pakul nieviadomuju kolkaść hadoŭ.
Ułady ŭnieśli jaho śpisy «ekstremistaŭ» i «terarystaŭ» — jak i sotni inšych asudžanych pa anałahičnych artykułach, zvyčajna heta robicca za zakliki da pratestaŭ suprać dyktatury i falsifikacyi vybaraŭ. Trymajuć jaho ŭ IK №1 Navapołacka, dzie i Viktara Babaryku.
Ale što b vy dumali — jość i Hrynkievič Ivan siarod sudździaŭ, jakija štampujuć pryhavory palityčnych źniavolenym. Jon staršynia suda Žodzina, u jaho jurysdykcyi — i žodzinskaja turma. I mienavita jon na paŭtornym sudzie sudziŭ Siarhieja Cichanoŭskaha.
27 lutaha 2023 hoda jon pryznaŭ muža Śviatłany Cichanoŭskaj vinavatym i pryznačyŭ jamu ŭ dadatak da 18 hadoŭ kałonii jašče paŭtara hoda źniavoleńnia. Jon byŭ adnym z apošnich, akramia turemščykaŭ, ludziej, jakija bačyli Cichanoŭskaha. Amal adrazu paśla taho pracesu, z 9 sakavika 2023 hoda, Siarhieja Cichanoŭskaha pačali ŭtrymlivać u poŭnaj izalacyi ad śvietu ŭ režymie inkamunikada.
Zusim inšaja dola ŭ hienierała Aleksa Hrynkieviča, jaki zrabiŭ karjeru ŭ amierykanskaj armii i ciapier budzie kamandavać samaj mahutnaj vajskovaj hrupiroŭkaj na jeŭrapiejskim kantyniencie.
Pradzied hienierała Illa Hrynkievič žyŭ u Minsku, a ŭ kancy XIX stahodździa emihravaŭ u ZŠA. Tady mnohija biełarusy jechali ŭ Paŭnočnuju Amieryku ŭ pošukach lepšaj doli.
U Ńju-Jorku Hrynkievič źmianiŭ imia na Elijas i ažaniŭsia z uradženkaj Vilni Nastaśsiaj Śnihierevič. Para žyła ŭ Bruklinie i pracavała ŭ hateli. Adnym z čatyroch dziaciej Elijasa i Nastaśsi byŭ Mikałaj (Nikałas) Hrynkievič, dzied hienierała. A jaho baćka Hrehary byŭ viadomym navukoŭcam z patentami i vynachodstvami ŭ śfiery paŭpravadnikoŭ.
Aleksus Hrynkievič słužyŭ u avijacyi, nalotaŭ bolš za 2300 hadzin na źniščalnikach, a ciapier jon uznačalvaje ŭpraŭleńnie ŭ kamitecie načalnikaŭ štaboŭ.
Inšaja dola — ale ž taja ž kroŭ.
Uražvaje, nakolki padobnyja tvary dvuch Hrynkievičaŭ z, mahčyma, «minskaj linii rodu», Aleksa i Ivana — choć inšych raździalajuć jak minimum čatyry pakaleńni i stolki inšych hienaŭ. Tyja ž vočy, toj ža nos.
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary