Stała viadoma, na jakim miescy siadzieŭ pasažyr, jaki adziny acaleŭ u katastrofie samalota ŭ Indyi
U siecivie razychodzicca videa z, vierahodna, adzinym pasažyram, jaki vyžyŭ u avijakatastrofie samalota Boeing u Indyi. Usiaho zahinułych nie mienš za 250, ale moža być i kudy bolš, pakolki samalot upaŭ u žyłym rajonie.
40-hadovy hramadzianin Vialikabrytanii Višvaš Kumar Ramieš, jaki byŭ znojdzieny na miescy razboru abłomkaŭ Boeing 787-8 Dreamliner, raskazaŭ vydańniu Hindustan Times, što praz tryccać siekund paśla ŭźlotu jon pačuŭ «hučny šum», a «zatym samalot raźbiŭsia».
«Kali ja ŭstaŭ, vakoł mianie byli cieły. Ja spałochaŭsia. Ja ŭstaŭ i pabieh. Vakoł mianie byli abłomki samalota. Chtości schapiŭ mianie, pasadziŭ u mašynu chutkaj dapamohi i advioz u balnicu».
Višvaš Kumar Ramieš siadzieŭ u piaredniaj častcy samalota, na miescy 11A.
Dakładnyja źviestki pra kolkaść achviar padčas krušeńnia samalota ciapier vyśviatlajucca. Načalnik miascovaj palicyi zajaviŭ, što na miescy avijakatastrofy znajšli ŭžo 204 cieły. Adnak u ciapierašni čas nieviadoma, ci byli ŭsie 204 čałavieki ŭ samalocie ci niekatoryja ź ich byli na ziamli, kali samalot raźbiŭsia.
Kamisar palicyi horada Achmiedabad havoryć, što pakolki samalot raźbiŭsia ŭ žyłym rajonie, «niekatoryja miascovyja žychary taksama mahli zahinuć».
U Fiederacyi miedycynskich asacyjacyj Indyi (FAIMA) paviedamili, što prykładna 50-60 studentaŭ-miedykaŭ dastavili ŭ balnicu paśla taho, jak samalot upaŭ na balničny internat. Asacyjacyja paviedamlaje, što piaciora studentaŭ prapali bieź viestak, i prynamsi dvoje znachodziacca ŭ adździaleńni intensiŭnaj terapii. Taksama prapali bieź viestak svajaki niekatorych lekaraŭ.
Pavodle źviestak Air India, na borcie samalota znachodzilisia 242 pasažyry i členy ekipaža (10 bortpravadnikoŭ i 2 piłoty). Siarod pasažyraŭ užo ŭstanoŭlenyja imiony 169 hramadzian Indyi, 53 hramadzian Vialikabrytanii, 1 hramadzianina Kanady i 7 hramadzian Partuhalii.
Vydańnie Business Insider piša, što samalot, zarehistravany jak VT-ANB, upieršyniu byŭ pieradadzieny Air India ŭ studzieni 2014 hoda. Hetaje zdareńnie, padobna, stała pieršaj takoj katastrofaj dla Boeing 787, jaki tradycyjna adnosili da adnaho z samych biaśpiečnych pasažyrskich samalotaŭ.
Kamientary