Biełarus buduje niezvyčajnyja damki na kołach — novy farmat lecišča
Pradprymalnik Valer Astrynski raskazaŭ pra novy prajekt — mabilnyja chatki ŭ styli anhlijskich pastuchoŭ, jakija možna pastavić u lesie ci na bierazie raki. Voś jak heta vyhladaje.
Usio pačałosia z padarožža ŭ Anhliju, kudy Valer vypraviŭsia z žonkaj hadoŭ dziesiać tamu. U Brytanii biełarusy pabačyli tak zvanyja shepherd huts — mabilnyja chatki na kołach, jakija histaryčna vykarystoŭvali tamtejšyja pastuchi, kab było dzie načavać padčas vypasvańnia aviečak daloka ad doma.
Paźniej, kali anhličanie palubili adpačynak na pryrodzie, hetyja chatki stali vykarystoŭvać dla načlehu pieršych turystaŭ. Daviałosia rabić ich bolš kamfortnymi, i na siońnia ŭ takich damkach časta jość kamunikacyi, duš i haračaja vada.
Ciapier, u emihracyi, Valer Astrynski ŭspomniŭ hetuju kancepcyju, tym bolš jon žyŭ u vioscy raniej i jamu padabajecca žyć na pryrodzie. Tak naradziŭsia novy prajekt:
«Da kanca niajasna, dzie tut daviadziecca puskać karani. Ale možna zbudavać mabilnuju chatku, arandavać ziamlu ŭ pryhožym miescy i tam pastavić hetuju chatku. Atrymajecca lecišča, kudy možna budzie jeździć, chadzić basanož pa travie ŭ pryhožym miescy.
Padumaŭ, što pakul zrablu sam takuju chatku, zrablu tak, jak mnie padabajecca. Znajšoŭ u Hdańsku chłopcaŭ, jakija zajmajucca łaźniami, jany jašče robiać dach z dranicy, i ja taksama z hetym sutykaŭsia ŭ vioscy. Vyrašyŭ zbudavać miks: anhlijski kancept na aŭtentyčnych kołach, ale z dacham z dranicy».
Valer tłumačyć, u čym pieravaha dranicy — dach ź jaje nahravajecca mienš, čym dach ź inšych materyjałaŭ. Akramia taho, dranica robicca z asiny, a hetaja draŭnina maje ŭłaścivaści antysieptyka, to-bok nasiakomyja jaduć jaje mienš, čym draŭninu inšych vidaŭ. A jašče hety materyjał dazvalaje rabić dachi roznych formaŭ, navat vielmi niezvyčajnych, u styli chobitaŭ.
Novuju chatku budavali biez pradumanaha prajekta. Byli malunki anhlijskich mabilnych chatak, dośvied novych znajomych, jakija budavali łaźni, i žadańnie zrabić chatku maleńkaj płoščy, ale pry hetym cikavuju i ŭtulnuju.
Pakul budavali chatku, Valeryj atrymaŭ prapanovu rabić takija damki na prodaž:
«Pahladzieli rynak. U asnoŭnym hetyja chatki robiać u narviežskim styli, pramavuholnyja. Kancepcyja takaja, što možna hetuju chatku pastavić, naprykład, u lesie ci na bierazie raki, heta nie patrabuje surjoznych uzhadnieńniaŭ. U nas atrymaŭsia cikavy varyjant, miks anhlijskaj chatki i chatki chobitaŭ, nu i dranicy my dadali.
U Anhlii takija damki pradajucca za 40—50 tysiač jeŭra, u Polščy chatki ŭ narviežskim styli pradajuć prykładna za 30 tysiač jeŭra. My taksama budziem vystaŭlać ich pa canie 120 tysiač złotych plus PDV — heta taksama na ŭzroŭni 30 tysiač jeŭra».
U chatkach jość usio patrebnaje — kuchnia ź plitoj i chaładzilnikam, dvuchuzroŭnievy łožak, kanapa, prybiralnia. Pavodle kancepcyi, chatku buduć pradavać navat z karnizami i firankami, kab haspadaram zastałosia dakupić tolki posud.
Na dumku Valera, prajekt pierš za ŭsio pryvabić tych, chto zajmajecca ahraturyzmam, a nie pryvatnych klijentaŭ:
«Hetaja ideja bolš upisvajecca ŭ biznes, kali ludzi staviać nievialikija chatki i zarablajuć na turystach. Nie viedaju, nakolki ludzi hatovyja heta nabyvać dla siabie, ale šmat kaho zacikavić mahčymaść pažyć paru dzion u takoj chatcy ŭ pryhožym miescy.
Pakul my zrabili tolki pieršy varyjant. Toje, što jon padabajecca nam, jašče nie značyć, što jon spadabajecca ludziam i jany buduć hatovyja za jaho płacić. Nie atrymajecca biznes — budzie ŭ mianie paru svaich chatak, budu sam ładzić u ich adpačynak ci ahraturyzm».
Pieršy damok Valer z partniorami nie płanujuć pradavać: jaho pastaviać u pryhožym miescy, kab achvotnyja mahli pabačyć ci pieranačavać. Ale chutka jany pačnuć budavać druhuju chatku, i tady, paśla raspracoŭki prajekta, nadydzie čas pieradzamoŭ.
«Naša Niva» — bastyjon biełaruščyny
PADTRYMAĆ«Utopija, zasnavanaja na empatyi». Na amierykanskim fiestyvali Burning Man budzie biełaruski łahier
Biznesoviec z top-200 raskazaŭ, za što siadzieŭ i čamu nie pahadziŭsia na pamiłavańnie
Źmianiŭ pientchaus na chutar. Jak viadomy biznes-anioł, što byŭ u top-200 samych upłyvovych ludziej u krainie, adbyvaje «chimiju»
Biznesmiena z top-200 samych upłyvovych u krainie asudzili na 2,5 hoda chatniaj chimii i zabaranili 5 hadoŭ zajmacca pradprymalnictvam
Za bieł-čyrvona-bieły ściah z «Pahoniaj» na chutary IT-inviestaru Astrynskamu dali 20 bazavych
Kamientary