37 hadoŭ tamu — 19 červienia 1988 hoda — adbyłosia pieršaje šeście hramadskaści ŭ Kurapaty, arhanizavanaje nieŭzabavie paśla publikacyi artykuła Zianona Paźniaka i Jaŭhiena Šmyhalova «Kurapaty — daroha śmierci», piša telehram-kanał «Biełaruski instytut publičnaj historyi».
Mitynh i šeście byli arhanizavanyja aktyvistami moładzievaha niefarmalnaha abjadnańnia «Tałaka».
Zajaŭku padavali Siarhiej Vituška i Viktar Ivaškievič, ale akcyju nie dazvolili. Zajaŭnikaŭ vyklikali ŭ respublikanskuju prakuraturu i papiaredzili, što jany parušajuć zakon.
Šeście i mitynh prajšli niesankcyjanavana, u im uziali ŭdzieł blizu 10 tysiač čałaviek. Milicyja ludziej nie spyniała i nie aryštoŭvała (u adroźnieńnie ad nastupnaj akcyi na Dziady 30 kastryčnika 1988 hoda). Paśla arhanizataraŭ pakarali štrafam — pa 50 rubloŭ.
Zbor pryznačyli ŭ mienskaha tramvajnaha kalca ŭ Zialonym Łuzie. Tam haradskija ŭłady i pradstaŭniki CK kamsamoła zaklikali prysutnych sieści ŭ aŭtobusy, jakich stajała kala paŭsotni, i jechać na aficyjny alternatyŭny mitynh da Opiernaha teatra. Ale nichto nie źviartaŭ na hety zaklik uvahi, i nieŭzabavie kałona, jakaja naličvała kala dziasiatka tysiač čałaviek, rušyła ŭ Kurapacki les, dzie ŭ toj dzień byŭ ustalavany simvaličny pomnik achviaram stalinskaha teroru.
Adkryŭ i vioŭ mitynh staršynia mienskaj «Tałaki» Siarhiej Vituška. Vystupili narodny piśmieńnik Biełarusi Ivan Čyhrynaŭ (jaki byŭ jašče i staršynioj Biełaruskaha adździaleńnia Savieckaha fondu kultury), Zianon Paźniak, rabočy Viktar Ivaškievič, piśmieńnik Kanstancin Tarasaŭ, dačka zabitaha ŭ Kurapatach paeta Todara Klaštornaha Maja, były viazień HUŁAHu paet Pavieł Prudnikaŭ i inšyja, u tym liku sakratar Mienskaha harkama partyi Piotr Kraŭčanka, jaki paśpieŭ padjechać ź mitynhu kala Opiernaha teatra.
Praz hod — 29 kastryčnika 1989 hoda — u Miensku prajšło pieršaje aficyjna dazvolenaje (tady jašče savieckimi ŭładami) šeście ź Mienska ŭ Kurapaty.
Tady ŭ Kurapatach byŭ ustalavany samy pieršy vialiki kryž, vakoł jakoha potym vyras narodny miemaryjał z sotniaŭ kryžoŭ u pamiać ab rasstralanych.
Kamientary