Kavaleŭski patłumačyŭ, za jaki dyjałoh pamiž hramadstvam i ŭładami jon vystupaje

Kiraŭnik Ahienctva jeŭraatłantyčnaha supracoŭnictva Valeryj Kavaleŭski niekalki dzion tamu napisaŭ u fejsbuku, što ŭžo amal hod zajmajecca tematykaj humanitarnych vyzvaleńniaŭ (razam z Taćcianaj Chomič i Volhaj Harbunovaj) i na hetym šlachu bačyć «praktyčnuju patrebu ŭ naładžvańni dyjałohu ź Minskam».

«Jość adčuvańnie, što heta jak raz taja situacyja, kali dyjałoh pamiž uładami i hramadzianskaj supolnaściu maje značny praktyčny sens. Heta dazvoliła b vyjavić prablemnyja momanty, jakija mohuć zastavacca niezaŭvažnymi, ale jakija škodziać intaresam krainy, i vypracavać kroki da ich vyrašeńnia».

U efiry «Jeŭraradyjo» jon patłumačyŭ svaju dumku:

«Majecca na ŭvazie mienavita situacyja, jak by narmalnaja, jakuju my bačyli, naprykład, da 2020 hoda i ŭ 2020 hodzie. Kali jość hramadzianskaja supolnaść, jakaja biare na siabie vyrašeńnie zadač, jakija vielmi časta dziaržava nie zaŭvažaje, ci ŭ jaje nie chapaje resursaŭ, nie chapaje kampietencyj».

Jak zaŭvažaje Kavaleŭski, ciapier šyrokaje koła prablem, pačynajučy ad abarony achviar chatniaha hvałtu da achovy ptušak, zastajucca biez uvahi, biez resursaŭ, biez techničnaj dapamohi.

Adnaŭleńnie dziejnaści takich struktur, «jakija absalutna nie palityčnyja, jakija zajmajucca prosta vyjaŭleńniem prablem i pošukam ich rašeńniaŭ, i taksama realizujuć hetyja rašeńni», na pohlad palityka, było b vyhadna ŭsim.

«Tut havorka ab tym, što hetaja suviaź na siońniašni dzień vielmi mocna asłabła. Nie skazać, što ŭ Biełarusi całkam źnikła hramadzianskaja supolnaść. Jana ŭsio ž taki isnuje. Časam jana padkantrolnaja dziaržavie. Ale jakaść jaje vielmi mocna ŭpała. I kolkasna taksama vielmi mocna straciła Biełaruś u hetaj situacyi.

Adnaŭleńnie hetaj prastory, stvareńnie ŭmoŭ dla taho, kab hramadzianskaja supolnaść była jak raŭnapraŭny partnior u vyrašeńni takich prablem, — ja dumaju, što heta maje značny praktyčny sens», — davodzić Kavaleŭski.

«Heta moža vyhladać prykmietaj kankurentnaj baraćby»

Aceńvajučy situacyju z pryznańniem Polščaj biełaruskaha biznesmiena Alaksandra Mašenskaha niepažadanaj asobaj, Kavaleŭski zaŭvažyŭ, što jamu heta rašeńnie padałosia «davoli dziŭnym, niejkim takim raptoŭnym, amal niełahičnym»:

«Voś heta palavańnie za «hamancami režymu» mieła sens niekalki hadoŭ tamu. I tady taksama ŭspłyvała proźvišča Alaksandra Mašenskaha. Ale da hetaha tak i nie dajšło».

Pa mierkavańniu palityka, sankcyi suprać biznesmiena «nie majuć asablivaha efiektu na situacyju».

«Z usich biełaruskich biznesmienaŭ, proźviščy jakich ja čuŭ mienavita ŭ hetym kantekście — kab uvieści piersanalnyja sankcyi za padtrymku režymu Łukašenki, — mnie zdajecca, što ŭ Mašenskaha najbolš zdarovy biznes, jaki jon vybudoŭvaŭ šmat dziesiacihodździaŭ.

Ci była tam dziaržaŭnaja padtrymka, ci padtrymka z boku Łukašenki, vielmi składana skazać. Ale heta značnaja i zdarovaja častka biełaruskaj ekanomiki, dzie pracuje vielmi šmat ludziej», — ličyć Kavaleŭski.

Na jaho pohlad, takija dziejańni Polščy, mahčyma, źjaŭlajucca niejkaj «pieramoŭnaj pazicyjaj, jakuju vyrašyli stvaryć polskija ŭłady ŭ hetaj novaj situacyi, kab abmiežavać jaho mahčymaści».

Na pohlad palityka, «heta moža vyhladać, navat, niejkaj prykmietaj kankurentnaj baraćby suprać kankretna Mašenskaha». «Heta maja zdahadka. Ale ŭ takija momanty prosta dumaješ, ci moh chtości skarystacca niejkimi dziaržaŭnymi instrumientami dziela taho, kab vieści kankurentnuju baraćbu».

• 5
• 5
• 0
• 20
• 1
• 1
• 0
• 0