Ad Mickieviča da Hienijuš: vyjšła antałohija biełaruskaj turemnaj paezii
Mižnarodny sajuz biełaruskich piśmieńnikaŭ vypuściŭ antałohiju kłasičnaj biełaruskaj turemnaj paezii «Vieršy na volu». Układalnikam vystupiŭ litaraturaznaŭca Cichan Čarniakievič. Pieršy prodaž knihi adbudziecca na fiestyvali «Tutaka» na Padlaššy, piša Bellit.info.
Kniha «Vieršy na volu» sabrała paetyčnyja tvory, napisanyja va ŭmovach turemnaha źniavoleńnia, katarhi, łahieru, vysyłki, čakańnia reabilitacyi i pierahladu kryminalnych spraŭ. Chranałahična teksty abymajuć amal bolš jak 100-hadovy pieryjad niepieraryŭnaj tradycyi i vymušanaha raźvićcia biełaruskaj turemnaj paezii: ad fiłamackich 1820-ch, kali ŭ Vilni byli źniavolenyja Adam Mickievič, Jan Čačot, Tamaš Zan — až da hułahaŭskaj liryki asudžanych nieŭzabavie paśla zakančeńnia II suśvietnaj vajny.
Kastuś Kalinoŭski, Jakub Kołas, Aleś Harun, Uładzimir Duboŭka, Jazep Pušča, Hanna Novik i Łarysa Hienijuš, Uładzimir Dudzicki, Valancin Taŭłaj i Maksim Tank, — usiaho antałohija źmiaščaje teksty 35 aŭtaraŭ, napisanyja v ŭmovach pazbaŭleńnia voli.
Vieršy, źmieščanyja ŭ knizie, adlustroŭvajuć emacyjny stan palitźniavolenych paetaŭ, ich mary i čakańni, žyćciovyja pryncypy, ale najpierš — unutranuju svabodu, jakoj vielmi časta brakavała tym piśmieńnikam, jakija znachodzilisia pa inšy bok zakratavanaha akna.
Knihu možna nabyć 11—13 lipienia va ŭročyščy Baryk niepadalok Haradka padčas fiestyvalu TUTAKA. A taksama praź internet-kramu Kamunikat.shop.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary