Vyviaržeńnie vułkana na poŭdni Isłandyi pryviało da admieny ŭsich avijarejsaŭ u Brytanii, Niderłandach, na poŭnačy Jeŭropy.
Vyviaržeńnie vułkana kala lednika na poŭdni Isłandyi pryviało da admieny ŭsich avijarejsaŭ ŭ Brytanii z 12 da 18 hadzin pavodle brytanskaha času (14—19 pa Minska). Buduć spynienyja paloty ŭ niekatorych inšych krainach Zachodniaj Jeŭropy.
Jeŭrapiejskija avijacyjnyja ŭłady niepakojacca, što vobłaka vułkaničnaha popiełu moža paškodzić ruchaviki samalotaŭ.
Jak paviedamlaje Brytanskaja słužba avijadyśpietčaraŭ (NATS),
paloty ŭsich samalotaŭ nad Brytanijaj zabaraniajucca, i vyklučeńnie budzie rabicca tolki ŭ ekstrannych situacyjach.
«Heta rašeńnie pryniata ŭ adpaviednaści ź mižnarodnymi praviłami hramadzianskaj avijacyi, — skazana ŭ paviedamleńni NATS. — My praciahvajem adsočvać situacyju i ciesna supracoŭničajem ź mietearałahičnaj słužbaj, a taksama z klijentami avijakampanij i susiednimi krainami».
Anałahičnyja zachady zroblenyja ŭ Irłandyi. Pierastaŭ pracavać i najbujniejšy aeraport Narviehii «Hardemuen», raźmieščany kala Osła.
Pra chutkaje zakryćcio svajoj pavietranaj prastory paviedamili ŭłady Niderłandaŭ i Danii. Pavodle źviestak ahienctva Frans pres, mohuć być prypynienyja paloty ŭ aeraporcie Brusela, spynienaja praca niekalkich aeraportaŭ na poŭnačy Šviecyi i Finlandyi.
Łondanski aeraport Chitrou, jaki začynicca razam ź inšymi terminałami, źjaŭlajecca adnym z samych ažyŭlenych ŭ śviecie: štodnia jaho pasłuhami karystajucca kala 180 tysiač pasažyraŭ, ździajśniajecca bolš za 1200 rejsaŭ.
Usie aeraporty Šatłandyi ŭžo začynienyja, u Chitrou i Hetviku z ranicy admienienyja bolš za 250 rejsaŭ.
***
Miž tym, u samoj Isłandyi praca avijacyjnaha transpartu pakul nie spyniena,
bo viecier chutka zabiraje vułkaničny popieł.
«Rejsy ŭ Isłandyju i ź jaje — u paradku, — skazała ahienctvu Frans pres pradstaŭnik miascovych avijacyjnych uład Chjordzis Hudmundsdocir. — Viecier niasie popieł na ŭschod».
Paśla taho, jak adbyłosia ŭ sieradu vyviaržeńnie vułkana, jaki raźmieščany kala lednika Ejiafjałajiekiul za 200 km na ŭschod ad Rejkjavika, dym padymaŭsia na vyšyniu 6 tys. mietraŭ.
Patoki raspalenaj łavy častkova rastapili ledavik, što vyklikała pavodki. Uładam krainy daviałosia evakujavać ź bližejšych viosak ad 700 da 800 čałaviek. Ciapierašniaje vyviaržeńnie — užo druhoje za apošnija niekalki tydniaŭ. Vułkan spaŭ da hetaha 200 hadoŭ.
Kamientary