Čamu minskaja Niamiha pierastała traplać u zvodki patopaŭ paśla zaleŭ?
U Minsku aktyŭna madernizujuć i raźvivajuć sistemu liŭnievaj kanalizacyi, bo letnija zalevy časta pryvodziać da nadzvyčajnych situacyj, asabliva ŭ transpartnaj śfiery. Pra toje, što robicca dla baraćby z padtapleńniami, raskazaŭ ahienctvu «Minsk-Naviny» hałoŭny inžynier pradpryjemstva «Harramliŭniestok» Alaksiej Filčankoŭ.
Jašče niadaŭna vulica Niamiha rehularna ciarpieła ad zalevaŭ, ale paśla budaŭnictva novaha kalektara vialikaha dyjamietru prablema źnikła. Ciapier vada nie padymajecca vyšej za bardziury i nie pieraškadžaje ruchu, tamu kramy nie niasuć strataŭ. Hety kalektar pierachoplivaje patoki vady i nakiroŭvaje ich u inšy rajon, dzie jość bolš jomistaja sistema.
Uvohule ž u Minsku amal 2 126 kiłamietraŭ liŭnievych sietak, ź jakich 352 kiłamietry — najbolš składanaja častka, jakuju absłuhoŭvaje «Harramliŭniestok». U strukturu ŭvachodziać 19 ačyščalnych zbudavańniaŭ, 29 vypuskaŭ na mahistralnych kalektarach, bolš za 5 300 kałodziežaŭ i śpiecyjalnyja filtry, jakija čyściać vadu pierad jaje skidam u vadajomy.
Paśla kožnaj zalevy pravodzicca ahlad stanu sistemy: praviarajuć cełasnaść kałodziežaŭ, najaŭnaść zaśmiečvańniaŭ i pravałaŭ.
Minsk znachodzicca na siami pahorkach, i heta robić jaho vyšejšym za susiednija stalicy. Ale taki reljef pryvodzić da taho, što vada ściakaje ŭ niziny i zatrymlivajecca tam. Kałodziežy nie zaŭsiody paśpiavajuć prapuścić vialikuju kolkaść vady, a kraty časta zabivajucca śmiećciem i piaskom.
Alaksiej Filčankoŭ padkreślivaje: kab całkam zabiaśpiečyć horad ad patopaŭ, treba było b pabudavać kalektary daŭžynioj 20 kiłamietraŭ i dyjamietram 6 mietraŭ — amal jak mietro. Ale heta ekanamična nieapraŭdana, bo takija zalevy redkija i niepradkazalnyja. U sioletnim červieni, naprykład, vypała bolš za 200% miesiačnaj normy apadkaŭ.
U 2024 hodzie ŭ Łošycy pabudavali kalektar daŭžynioj 3 kiłamietry, jaki źbiraje i čyścić vadu z rajona «Minsk Śviet». U horadzie taksama iduć raboty ŭ troch kirunkach:
- Kalektar dla pramysłovaha vuzła «Zachad» (dyjamietram 2 m).
- Try avaryjnyja vypuski dla razhruzki kalektara «Ślapianka».
- Padrychtoŭka da maštabnaha budaŭnictva ŽK «Paŭnočny Bierah» z ulikam stvareńnia poŭnaj inžyniernaj infrastruktury, u tym liku liŭnievaj kanalizacyi.
Na hetaj terytoryi, dzie raniej byli sielskahaspadarčyja pali, treba budzie prakłaści kala 15 kiłamietraŭ mahistralnych kalektaraŭ.
Ciapier čytajuć
Jak u halečy śpivałasia radnia Łukašenki? Małaviadomyja fakty19
Kamientary