«Biełdžy» admoviŭsia ad idei sieryjnaha vypusku pieršaha biełaruskaha elektramabila
Zavod «BiełDžy» u Barysavie, dzie vypuskajuć aŭtamabili Geely i Belgee, admoviŭsia ad sieryjnaj vytvorčaści madeli BELGEE EX50, jakuju nazyvali «pieršym biełaruskim elektramabilem». Hiendyrektar pradpryjemstva Hienadź Śvidzierski rastłumačyŭ, što zapusk hetaj madeli zanadta darahi dla Biełarusi.
Pa słovach Hienadzia Śvidzierskaha, choć raspracoŭščyki i zaviaršyli ŭsie techničnyja raboty, ekanamičny analiz zaśviedčyŭ, što sieryjny vypusk hetaj madeli ŭ našych umovach nie metazhodny. Zamiest hetaha zavod płanuje pašyryć liniejku elektrakaram i hibrydam. U Biełarusi, ličyć kiraŭnictva zavoda, buduć bolš zapatrabavanyja niedarahija elektrakary, a ŭ Rasii — hibrydnyja madeli.
U jakaści alternatyvy pradpryjemstva rychtuje da zapusku hibrydny krasovier BELGEE X80, stvorany na bazie Geely Galaxy Starship 7. Siertyfikacyju płanujuć zaviaršyć užo ŭ pačatku vieraśnia, ale košt madeli pakul nie nazyvajuć.
Jašče adnoj navinkaj stanie elektramadel Geely E22H (u Kitai jana viadomaja jak Geely Geome Star Wish). U Biełarusi jaje buduć źbirać bujnymi vuzłami, a prodažy pavinny pačacca ŭ kastryčniku. U Kitai takija mašyny letaś kaštavali ad 9900 dołaraŭ, ale na biełaruskim druhasnym rynku ceny ciapier pieravyšajuć 17 tysiač.
Raniej Śvidzierski adznačaŭ, što biełarusy zmohuć ubačyć pieršy «svoj» elektramabil nie raniej za 2027 hod. Da hetaha času «BiełDžy» sabraŭ tolki piać ekśpierymientalnych uzoraŭ BELGEE EX50.
Kamientary
Sdiełajtie cienu na JECH5 i Star Wish ,kak na rodinie i spros budiet.
ABS-ESP, ci prahramnaha zabieśpiačeńnia ? )
ja navat maŭču pra batarei (i akuplalny "tyraž")
A MotaVieła kitajcy sabatujuć?
A voś MTZ jany nie sabatujuć dakładna, bo bolšaść ruchavikoŭ tam na traktarach - firmy VIEJČAJ