«Nichto nie zrazumieŭ, kudy jechać». Pieršaja avaryja na ałmaznaj raźviazcy ŭ Minsku vyklikała sprečki siarod kiroŭcaŭ
Adzin z aŭtamabilistaŭ 26 žniŭnia vykłaŭ u tyktoku videa z «pieršaj avaryjaj» na abnoŭlenaj ałmaznaj raźviazcy na skryžavańni MKAD ź Ihumienskim traktam i vulicaj Babuškina. Niahledziačy na šyrokuju rekłamu, jakuju novaj schiemie ruchu na pierakryžavańni dała Dziaržaŭtainśpiekcyja, DTZ na hetym učastku, jaki i raniej ličyŭsia prablemnym i zahružanym, paźbiehnuć nie ŭdałosia, piša «Telehraf».
Miarkujučy pa kadrach, źniatych śviedkam adnoj ź pieršych avaryj na ałmaznaj raźviazcy, sutyknulisia dźvie fury — adna ŭrezałasia ŭ pryčep druhoj. Padrabiaznaści avaryi nie paviedamlajucca — u zvodkach DAI infarmacyi pra zdareńnie pakul niama.
Na dumku aŭtara rolika, na raźviazcy prosta «nichto nie zrazumieŭ, kudy jechać».
U kamientarach razharełasia dyskusija jak nakont hetaj kankretnaj avaryi, tak i nakont samoj schiemy ruchu, dzie ŭ hadziny pik zaŭsiody naziralisia surjoznyja zatory pry ŭjeździe z MKAD.
Niekatorym kiroŭcam novaja schiema padałasia praźmierna składanaj mienavita dla vielikahruznych aŭtamabilaŭ — nie z-za składanaści pałos, kali treba nibyta vyjazdžać na sustrečnuju pałasu, a z-za zanadta vuzkich pałos i rezkich pavarotaŭ, u jakija fury mohuć prosta nie ŭpisacca.
«Tam rabili, kab spraščać źjezd i ŭjezd na MKAD, ale nichto nie padumaŭ pra radyus pavarotu dla vielikahruzaŭ, a mienavita jany tam u bolšaści», — adznačyŭ adzin z kamientataraŭ.
«Tam vielmi vuzkija pałosy, a kali ŭličvać, što tam šmat fur, hetych avaryj budzie masa», — mierkavaŭ inšy.
«Tam aŭtobusy i fury nie ŭpisvajucca ŭ habaryty raźmietki», — padtrymaŭ treci.
Adnak inšyja ŭdzielniki dyskusii ličać, što sprava nie ŭ schiemie, a ŭ banalnaj niaŭvažlivaści.
«Kiroŭcy sami pavinny adekvatna aceńvać abstanoŭku. Dafist hetaha nie zrabiŭ — voś i raspłaciŭsia», — zajaviŭ adzin z hledačoŭ.
«Treba trymać dystancyju — i nijakich avaryj nie budzie», — dadaŭ druhi.
Darečy, napiaredadni namieśnik načalnika UDAI HUUS Minharvykankama Dzianis Livanovič, kamientujučy zapusk ałmaznaj raźviazki, asabliva padkreśliŭ, što novaja schiema «vyklučaje kanflikt transpartu pry levym pavarocie», što, na dumku DAI, «palapšaje biaśpieku darožnaha ruchu».
Kamientary