Ukrainski žurnalist nazvaŭ Naŭrockaha «pachanom». Jaho zvolnili z polskaha ŚMI, a kancylaryja prezidenta zaklikała pierapisać Kanstytucyju
Vital Mazurenka byŭ namieśnikam hałoŭnaha redaktara partała «Observator Międzynarodowy». Ale jaho zvolnili za vykazvańnie pra prezidenta Polščy.
Ukrainski žurnalist Vital Mazurenka byŭ zvolnieny z polskaha vydańnia «Observator Międzynarodowy» za vykazvańnie pra prezidenta Polščy Karala Naŭrockaha.
U efiry dyskusijnaj prahramy na Polsat News Mazurenka nazvaŭ pavodziny Naŭrockaha ŭ dačynieńni da zakona ab dapamozie ŭkrainskim uciekačam «pavodzinami pachana». Prezident Polščy nakłaŭ vieta na zakon i prapanavaŭ ułasnyja praŭki.
«Rytoryka i pavodziny spadara Naŭrockaha — heta nie prezidenckija pavodziny, a pavodziny pachana. Tak nazyvajuć u rasijskich turmach kryminalnaha aŭtaryteta», — zajaviŭ Mazurenka.
Viadučaja prahramy nazvała vykazvańnie Mazurenki ab prezidencie niedarečnym i źniavažlivym. Ale toj nie staŭ vybačacca.
«Ja paraŭnoŭvaju pavodziny kankretnaha čałavieka i nie chaču padryvać instytut prezidenta. Jaho pavodziny škodziać biezabaronnym ukrainskim imihrantam», — skazaŭ žurnalist.
Vykazvańnie vyklikała chutkuju reakcyju ŭ kancylaryi prezidenta Polščy. Jaje šef Źbihnieŭ Bahucki zaklikaŭ pakarać Mazurenku za abrazu prezidenta. Pa hetym artykule žurnalistu pahražaje da troch hadoŭ turmy.
Bahucki taksama adznačyŭ, što žurnalist atrymaŭ polskaje hramadzianstva pa pachodžańni. Kiraŭnik prezidenckaj kancylaryi vyrašyŭ vykarystoŭvać hety kiejs u padtrymku zakonaprajekta, jaki radykalna ŭskładniaje atrymańnie hramadzianstva.
«Takija pavodziny ŭkrainca, jaki atrymaŭ polskaje hramadzianstva, nahladna paćviardžaje spraviadlivaść inicyjatyvy prezidenta RP ab padoŭžańni da 10 hadoŭ terminu pastajannaha pražyvańnia ŭ našaj krainie, pa vyciakańni jakoha tolki i možna budzie padavać zajavu na atrymańnie polskaha hramadzianstva.
Polskaje hramadzianstva pavinna być asablivym honaram i abaviazkam stavić Polšču i jaje intaresy na pieršaje miesca, vykonvać polskija zakony, a taksama pavažać kanstytucyjnyja ŭłady Respubliki Polšča, jakija majuć mandat ad voli naroda», — zajaviŭ Bahucki.
Jon zaklikaŭ pierapisać Kanstytucyju tak, kab možna było pazbaŭlać ludziej nabytaha hramadzianstva ŭ takich kiejsach. Ciapier Asnoŭny zakon heta zabaraniaje.
«Hety vypadak źjaŭlajecca nahodaj dla pačatku surjoznaj dyskusii ab uviadzieńni ŭ polski pravaparadak pałažeńniaŭ, jakija rehulujuć pazbaŭleńnie hramadzianstva, nabytaha praz naturalizacyju, naprykład, pa ŭzoru rašeńniaŭ, jakija dziejničajuć u ZŠA, Hiermanii, a taksama ŭ inšych krainach. Adnak heta patrabuje źmieny Kanstytucyi, i taksama pa hetaj pryčynie apraŭdanaja pazicyja prezidenta Naŭrockaha ab nieabchodnaści pačać pisać novuju Kanstytucyju», — adznačyŭ Bahucki.
Da abureńnia dałučylisia mnohija palityki pierš za ŭsio z partyi «Prava i spraviadlivaść», jakaja padtrymlivała Naŭrockaha na vybarach. Jany zaklikajuć prakuraturu zaniacca žurnalistam. A były namieśnik ministra zamiežnych spraŭ Pavieł Jabłoński i zusim adpraviŭ Mazurenku na front.
«Spadar Mazurenka, jaki tak kryŭdzicca z nahody nibyta adsutnaści padtrymki Ukrainy z boku Polščy, pavinien u terminovym paradku padziakavać za haścinnaść u našaj krainie i adpravicca na front — kab tam samomu pa-sapraŭdnamu padtrymać svaju radzimu», — napisaŭ apazicyjny deputat.
U kirujučaj kaalicyi bolš strymanyja acenki. Deputat ad libieralnaj partyi «Polšča 2050» Pavieł Zaleŭski ličyć, što pazbaŭlać hramadzianstva za vykazvańni nielha.
«Kantekst maje značeńnie. Ja liču, što Polšča, jak demakratyčnaja kraina, bolš ciarplivaja da padobnych zajaŭ i napadak na palitykaŭ, čym inšyja niedemakratyčnyja krainy.
Ja b umieryŭ emocyi; jany nam nie patrebny, jany patrebny Rasii. Heta aznačaje, što ŭsie antyŭkrainskija emocyi buduć biaźlitasna ekspłuatavanyja Rasijaj — i ŭ Rasii, i ŭ Polščy, i na Zachadzie — suprać našych intaresaŭ», — skazaŭ Zaleŭski.
Siońnia ž Mazurenku zvolnili z «Observator Międzynarodowy». U vydańni asudzili vykazvańnie byłoha namieśnika hałoŭnaha redaktara.
«Jak polski sajt, my kateharyčna nie prymajem i nie ciarpim nijakich sprobaŭ padarvać aŭtarytet prezidenta Respubliki Polšča. Našy kaštoŭnaści zasnavanyja na dakładnaj žurnalistycy, adkaznaści za svaje słovy i poŭnaj pavazie da instytutaŭ polskaj dziaržavy i jaje pradstaŭnikoŭ.
My rady paviedamić vam, što my pryniali rašeńnie ab nieadkładnym spynieńni supracoŭnictva ź Vitalem Mazurenkam. Jon taksama pakidaje pasadu namieśnika hałoŭnaha redaktara našaj redakcyi», — havorycca u zajavie redakcyi.
Praz paru hadzin Mazurenka paprasiŭ prabačeńnia ŭ fejsbuku za svajo vykazvańnie.
«Jak hramadzianin Respubliki Polšča, ja chacieŭ by padkreślić, što z całkam pavahaj staŭlusia da dziaržaŭnych instytutaŭ na čale z prezidentam Respubliki Polšča. Prašu prabačeńnia va ŭsich, čyje pačućci mahli być začepleny maimi słovami», — napisaŭ Mazurenka.
Vital Mazurenka žyvie ŭ Polščy z 2016 hoda, u 2019-m atrymaŭ hramadzianstva. Jon šmat hadoŭ supracoŭničaŭ «Observator Międzynarodowy». Pavodle adukacyi Mazurenka juryst.
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama6
Kamientary