Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach

«U hramadskaj dyskusii pa roznych pytańniach rehularna čuju, navat ad vielmi pavažanych mnoj i intelektualnych ludziej ab praviercy kaho-niebudź na palihrafie, jak kamuści heta prapanoŭvali, jak chtości admoviŭsia abo pahadziŭsia. I kožny raz na hety kont u mianie «padharaje», — piša Pikirenia ŭ fejsbuku. —

Padharaje, tamu što heta prosta chrestamatyjny prykład psieŭdanavuki. Hałoŭnaja mahčymaść palihrafa — heta demanstracyja taho, nakolki pytańnie dla čałavieka stresavaje, heta značyć jon adlustroŭvaje jak aŭtanomnaja niervovaja sistema reahuje na infarmacyju, jakaja vyklikaje stres: vilhotnaść skury, pašyreńnie zrenak, častata i hłybinia dychańnia, arteryjalny cisk, puls.

Strełački aparata rehistrujuć hetyja pakazčyki na papiery.

Dakładnaść palihrafa testavałasia šmat razoŭ, jak zacikaŭlenymi ludźmi/arhanizacyjami, tak i niezaležnymi. Dakładnaść lubych testaŭ apisvajecca dvuma pakazčykami — adčuvalnaść i śpiecyfičnaść, zvyčajna vymiarajucca adsotkami (abo dolami). Kab było bolš zrazumieła, pakažu na prykładach. Dla vyznačeńnia hetych pakazčykaŭ biarucca dźvie hrupy ludziej z zahadzia viadomymi pakazčykami (važna — viadomymi nie tamu, chto testuje), dla prastaty, chaj hetyja hrupy buduć pa 100 čałaviek, 100 chłusaŭ i 100 tych, chto kaža praŭdu.

Adčuvalnaść pakazvaje, kolki chłusaŭ z 100 chłusaŭ zmoža vyjavić mietad. Śpiecyfičnaść pakazvaje, kolki sumlennych ludziej test vyznačyć u hrupie sumlennych.

Navat u daśledavańniach asacyjavanych ź industryjaj pakazčyki adčuvalnaści da 98% i śpiecyfičnaści da 93%.

Heta značyć z 100 chłusaŭ 2 nie buduć vyjaŭleny i 7 tych, chto kaža praŭdu, atrymajuć iłžyvyja abvinavačvańni ŭ chłuśni, i heta pa samych aptymistyčnych acenkach.

A kali ŭziać niezaležnyja daśledavańni, to tam ličby razychodziacca ŭ vielmi vialikim dyjapazonie: adčuvalnaść ad 40% i śpiecyfičnaść ad 60%. Dziela spraviadlivaści, čaściej za ŭsio daśledavańni pakazvajuć adčuvalnaść na ŭzroŭni pryblizna 80% i śpiecyfičnaść na ŭzroŭni 70%.

A bujny mietaanaliz viadomych daśledavańniaŭ, apublikavany ŭ śniežni 2020 hoda (pry tym, što aŭtar źjaŭlajecca zacikaŭlenaj asobaj) pakazaŭ dakładnaść palihrafa na ŭzroŭni 69%.

Zdavałasia b, ličby niadrennyja, ale varta ŭličvać, što heta łabaratornyja ŭmovy i ŭ realnaj situacyi vyniki mohuć być zusim inšyja, naprykład, kali sprabujuć vyjavić špijonaŭ/ahientaŭ u jakoj-niebudź struktury. Hetyja samyja špijony pavinny, pa idei, vałodać dobraj vytrymkaj i panižanaj tryvožnaściu, a značyć i dakładnaść pracy prybora budzie mienšaj».

Pikirenia padvodzić da vysnovy, što ahułam palihraf bolš škodzić nievinavatym, čym dapamahaje znajści vinavatych.

• 9
• 0
• 0
• 1
• 0
• 0
• 1
• 0