MZS Biełarusi asudziła rašeńnie češskaha ŭrada vysłać supracoŭnika biełaruskaha pasolstva
Ministerstva zamiežnych spraŭ Biełarusi asudziła rašeńnie Čechii abjavić piersanaj non hrata supracoŭnika biełaruskaha pasolstva ŭ Prazie, jaki dziejničaŭ pad prykryćciom KDB.
«Hety krok źjaŭlajecca nieabhruntavanym i palityčna matyvavanym i nie spryjaje raźvićciu kanstruktyŭnaha ŭzajemadziejańnia i narmalizacyi dvuchbakovych adnosin. Respublika Biełaruś pakidaje za saboj prava raspačać miery ŭ adkaz u adpaviednaści z pryncypam uzajemnaści i abarony nacyjanalnych intaresaŭ, a taksama zaklikaje češski bok ustrymlivacca ad dalejšych niedružalubnych dziejańniaŭ», — havorycca ŭ zajavie MZS.
8 vieraśnia češskija ŭłady paviedamili, što ŭ Jeŭropie była vykryta špijonskaja sietka, jakuju sprabavaŭ stvaryć biełaruski KDB. U rasśledavańni hetaj spravy ŭdzielničali EUROJUST i śpiecsłužby Rumynii, Čechii i Vienhryi. Mienavita ŭ suviazi z hetym supracoŭnik pasolstva, jakoha, vierahodna, zavuć Mikałaj Dukšta, byŭ abjaŭleny piersanaj non hrata.
Akramia taho, u Rumynii zatrymali byłoha namieśnika kiraŭnika Słužby infarmacyi i biaśpieki Małdovy Alaksandra Bałana za dziaržaŭnuju zdradu i pieradaču dziaržaŭnych sakretaŭ biełaruskim śpiecsłužbam.
Pavodle vienhierskich ŚMI, da spravy taksama moža być datyčny biełaruski apazicyjny aktyvist, jaki pracuje taksistam i žyvie ŭ Polščy na miažy ź Biełaruśsiu. 9 vieraśnia premjer-ministr Polščy Donald Tusk paviedamiŭ, što na jaje terytoryi zatrymali ahienta biełaruskich śpiecsłužbaŭ, ale jaho imia pakul nieviadomaje. Taksama Polšča vysyłaje adnaho z dypłamataŭ.
U Jeŭropie vykryli biełaruskuju špijonskuju sietku. Aryštavali byłoha kiraŭnika małdaŭskaj kontrraźviedki
Stała viadoma imia byłoha małdaŭskaha śpiecsłužbista, jakoha zatrymali za špijanaž na karyść Biełarusi
Stała viadoma imia biełaruskaha dypłamata ŭ Čechii, jaki moh mieć dačynieńnie da špijonskaj sietki
U Polščy zatrymali biełaruskaha špijona i vysyłajuć adnaho z dypłamataŭ
Kamientary