«Mis Biełaruś» usio bolš nahadvaje konkurs pryhažości ŭ haremie
Minimum 9 z 24 pretendentak na karonu tak ci inakš udzielničali ŭ roznych prapahandysckich mierapryjemstvach.
Raniej časta kazali, što ŭdzielnicy konkursu «Mis Biełaruś» paśla jaho traplajuć u śvitu Łukašenki — u tak zvany «kavunovy bataljon». Faktyčna pryhažuni — adzin sa statutnych aksesuaraŭ sastarełaha palityka. Jaho frazu «žančyny — naša samaja efiektyŭnaja dypłamatyčnaja zbroja» navat nadrukavali na mierčy. U cišotkach z takim nadpisam na hrudziach sioleta źjavilisia niekatoryja z udzielnic konkursu pryhažości.
Maładyja dziaŭčyny stvarajuć pryhožy fon, kali dyktatar hladzić niejki kancert ci sprabuje zakinuć šajbu ŭ varoty.
«Naša Niva» praanalizavała sacyjalnyja sietki pretendentak na karonu ŭ 2025 hodzie, i zaŭvažyła: u niekatorych pryhažuń los składvajecca ŭ advarotnym paradku — spačatku jany pačynajuć śviacicca na praŭładnych mierapryjemstvach, a ŭžo potym traplajuć u śpis udzielnic «Mis Biełaruś».
Darečy, takoje adbyvajecca nie ŭpieršyniu. Možna zhadać adnu z apošnich favarytak Łukašenki Uładlenu Zajcavu. Da taho, jak trapić na «Mis Biełaruś», a potym stać jaho publičnaj kampańjonkaj, jana pieryjadyčna źjaŭlałasia siarod tych dziaŭčat, jakija na aficyjnych mierapryjemstvach vynosiać čynoŭnikam kvietki ci karavaj. Cikavy fakt: pryhažuniam, jakija pa kamandzie paśmichajucca dy defilirujuć na vysokich abcasach, kažuć, što jany nie aby-čym zajmajucca, a słužać Ajčynie.
Darja Bazyleva rodam z Homiela. Dziaŭčynu na konkursie pradstaŭlali jak studentku, jakaja vučycca na psichołaha. Ale «vynosić kvietački» taksama pačała: jaje možna pabačyć na fotazdymkach, kali čynoŭniki sioleta ŭ Homieli ŭskładali kvietki 9 maja. Ab tym, što Darja nie prosta pryhnanaja studentka, a štatnaja pryhažunia, śviedčyć ahulny zdymak: jana paziruje ŭ kampanii inšych dziaŭčat, jakija apranulisia absalutna adnolkava i zrabili identyčnyja pryčoski i makijaž.
Pra minčanku Vitaliju Žamko raspaviali, što jana, z adnaho boku, choča pracavać u advakatury, a ź inšaha — pradstaŭlać Biełaruś na mižnarodnych konkursach pryhažości. Sioleta naprykancy sakavika Vitalija vykłała storys, jak hladzieła chakiejny matč z udziełam Łukašenki.
Minčanku Kryścinu Bielskuju pradstaŭlali jak nastaŭnicu anhlijskaj movy, jakaja maryć stać ściuardesaj. Ale ž u svaim instahramie dziaŭčyna pazicyjanuje siabie jak madel. Całkam łahična, bo dziaŭčyna aktyŭna ŭdzielničaje ŭ konkursach pryhažości.
Faktyčna Kryścina pakul idzie šlacham Uładleny Zajcavaj. Jak i jana, Kryścina źjaŭlajecca pierad vačyma Łukašenki padčas «Słavianskaha bazaru» dy na śviacie ŭ Aleksandryi.
Minčanka Kaciaryna Trykaza sioleta paśpieła atrymać karonu «Mis Minsk». Dopis, pryśviečany svajoj pieramozie, dziaŭčyna skončyła praŭładnym łozunham: «Čas abraŭ nas».
U telehram-kanale Trykaza publikavała zdymki z Savieta Respubliki: sioleta ŭ červieni Biełaruś i Azierbajdžan padpisali pahadnieńni ab supracoŭnictvie pamiž moładzievymi arhanizacyjami. Kaciaryna była adnoj z tych pryhažuń, jakija padnosiać surjoznym dziadźkam dakumienty na podpis.
Jość jašče adna ŭskosnaja prykmieta, jaki moža śviedčyć pra toje, što dziaŭčyna ŭvachodzić u śpis štatnych pryhažuń — heta čorny čachoł na telefon z nadpisam «Respublika Biełaruś», załatym hierbam i čyrvona-zialonym ściaham.
Z takimi raniej užo zaśviacilisia aktyŭnyja ŭdzielnicy łukašenkaŭskich mierapryjemstvaŭ Darja Hančarevič i Jana Baranoŭskaja (jany taksama ŭ svoj čas udzielničali ŭ konkursie «Mis Biełaruś»). Darečy, taki samy čachoł ź dziaržaŭnaj simvolikaj maje i Kaciaryna Trykaza.
Hanna Byčko vučycca ŭ miedycynskim VNU, płanuje stać dziciačym chirurham. Sioleta 9 maja jana ŭdzielničała ŭ łukašenkaŭskim paradzie i, miarkujučy pa jaje storys, siadzieła na adnoj ź vip-trybun.
Stefaniju Kazłovič prezientavali jak prakurorku. Na ANT kazali, što jana choča zmahacca za «abaronu pravoŭ i svabod hramadzian, zachavańnie zakonnaści». Pryhažunia źjaŭlajecca aktyvistkaj BRSM. U jaje akaŭncie šmat fota i videa z aficyjnych mierapryjemstvaŭ.
Stefanija hanarycca tym, što joj daručajuć vynosić kvietački i dypłomy. Sioleta paśla łukašenkaŭskaj inaŭhuracyi jana zdymała videa, jak palityku prysiahajuć na viernaść vajskoŭcy na płoščy hierba i ściaha.
Na paradzie 9 maja Stefanija taksama była niedzie niedaloka ad Łukašenki.
Jana sfatahrafavałasia ŭ kampanii inšych pryhažuń, jakich apranuli adnolkava: čornyja kaściumy, biełyja błuzki dy bežavyja trenčy. Pryčoski taksama adnolkavyja — tradycyjnyja hulki. Takija samyja možna pabačyć i ŭ dziaŭčat, jakija ŭ pałacy Niezaležnaści prynosiać kavu dy harbatu darahim haściam Łukašenki.
Pra Lizavietu Łukšu padčas konkursu raspaviali, što dniom jana moža być na praktycy ŭ prakuratury, a ŭviečary ŭžo zaŭzieć na chakiejnym matčy. Dziaŭčynu taksama pieryjadyčna zadziejničajuć dla «padaj-pryniasi» na roznych mierapryjemstvach, a jašče pieraapranajuć u nacyjanalnyja stroi, kab sustrakać roznyja delehacyi.
Alaksandra Šapurava raniej zaśviaciłasia na «Słavianskim bazary», dzie vynosiła na scenu kvietki i dypłomy. Na tak zvany Dzień narodnaha adzinstva letaś jaje taksama paklikali.
Alija Karotkaja ŭžo nie ŭpieršyniu ŭdzielničała ŭ «Mis Biełaruś» — minuły raz jana pretendavała na karonu hałoŭnaj pryhažuni ŭ 2023 hodzie. Ciapier u jaje instahramie možna pabačyć fota i videa z chakiejnych matčaŭ Łukašenki.
Dziaŭčyna pachvaliłasia, što sioleta jaje zaprasili hladzieć parad z trybuny A — darečy, tam siadzieła i imaviernaja dačka Łukašenki Kryścina Mocnaja razam z maci.
Taksama Alija raspaviała ŭ instahramie, što sioleta razam z palitykam sadžała drevy ŭ budučym parku Narodnaha adzinstva.
«Nienavidžu pied». Łukašenka zavitaŭ na viasielle. Dyk a chto ž pabraŭsia šlubam?
Finalistak konkursu «Mis Biełaruś — 2025» vyvieli na scenu ŭ kaściumach z cytatami Łukašenki
Jak skłaŭsia los dziaŭčyny, jakaja ŭ 2020-m zaprasiła Łukašenku na taniec?
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA
Ciapier čytajuć
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna10
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ2121
Kamientary
Biełaruś očień dołho pośle toho,kak on sdochniet,dietoksirovaťsia ot vsieho etoho mierzkoho ślizkoho jada vsiech jeho hriaznych razvlečienij.
Ničieho ž skryť nielzia budiet —vyleziet vsie.