Z-za zakryćcia miažy z Polščaj zbornaja Biełarusi pa futzale nie pajechała na sparynhi ŭ Sierbiju
Hetymi dniami zbornaja Biełarusi pa futzale pravodzić zbor u Małarycie, jaki źjaŭlajecca častkaj padrychtoŭki da čempijanatu Jeŭropy-2026. Chacieli pajechać zhulać sparynhi za miažu, ale zakryćcio miažy z Polščaj uniesła karektyvy.
Płanavałasia, što biełaruskija mini-futbalisty adpraviacca ŭ Sierbiju, dzie 20 i 22 vieraśnia praviaduć tavaryskija matčy z kamandaj hetaj krainy. Ale ciapier ad hetych płanaŭ daviałosia admovicca.
U vyniku vyrašyli, što zbornaja zastaniecca ŭ Biełarusi, dzie praviadzie dva sparynhi z kłubami vyšejšaj lihi: 17 vieraśnia ŭ Breście z «Mierkuryjem»-DMK, a 18-ha ŭ Minsku sa «Stalicaj».
Čempijanat Jeŭropy pa futzale projdzie z 20 studzienia pa 7 lutaha 2026 hoda. Jaho prymuć try krainy — Litva, Łatvija i Słavienija. Pieršapačatkova mierkavałasia, što turnir prymuć tolki Litva i Łatvija, ale mienavita vychad u finalnuju častku biełaruskaj zbornaj prymusiŭ karektavać płany arhanizataraŭ. Abiedźvie krainy pryncypova admaŭlajucca prymać na svajoj terytoryi kamandy Biełarusi, i dadavańnie Słavienii jak treciaj krainy-arhanizatara stała mahčymaściu vyrašyć hetu prablemu.
Kamientary