«Pralacieła šmat roznych dumak». Rybak raskazaŭ, jak da jaho ŭ efir uvarvaŭsia łoś
Rybak spakojna siadzieŭ na race Muchaviec u Breście, zdymaŭ svaju cichuju rybałku ŭ žyvym efiry, jak raptam u jahony bok vybieh łoś. Žyviolina kinułasia ŭ raku za niekalki mietraŭ ad rybałova i papłyła praz raku. Heta ŭsio adbyłosia ŭ žyvym efiry, tamu videa raźlaciełasia pa internecie i vielmi paviesialiła hledačoŭ samoj niečakanaściu situacyi. Vydańnie «Pieršy» pahavaryła z aŭtaram videa, tym samym rybakom.
Siarhieju Zubko z Pružan 39 hadoŭ, u volny čas zachaplajecca rybałkaj. Naohuł u jaho šmat cikavych zachapleńniaŭ.
«Zachaplaŭsia numizmatykaj, fatahrafavaŭ dziaŭčat, padarožničaŭ pa Jeŭropie. Ale ŭ vyniku spyniŭsia tolki na rybałcy, jakoj zachaplajusia z samaha dziacinstva. Lublu pryrodu, cišyniu, pakloŭki», — kaža Siarhiej.
Pahavaryli ź im pra sustreču z łasiom, bo jana vyklikała masu paciešnych kamientaroŭ typu: «Kali b na mianie tak bieh łoś, ja b adkryŭ maleńki cahlany zavod».
— Raskažycie, jak heta było, nakolki vyklikała emocyi niečakanaja sustreča z łasiem. Jon choć u vyniku da bieraha dapłyŭ?
— Jak zvyčajna, sustrakajemsia ź siabrami i vybirajemsia na rybałku. Hetym razam vyrašyli prahulacca pa race Muchaviec u samim horadzie Breście. Kankretnaje miesca vybrali vypadkova, heta stary port kala parku Voinaŭ-internacyjanalistaŭ.
Rasčachlili snaści, ja ŭklučyŭ žyvy efir u tyktoku i my pačali łavić rybu. Dzieści praz hadzinu pošukaŭ akunia Andrej Paŭlučyk, moj siabar, kryčyć, što zzadu biažyć łoś…
Kali ja nakiravaŭ na łasia kamieru, u niejkaje imhnieńnie mnie zdałosia, što jon kiniecca na mianie. Jak ni dziŭna, ale za hetuju siekundu pralacieła šmat roznych dumak, i ja zrazumieŭ, što treba padrychtavacca skakać u vadu, bałazie bierah abryvisty i jość šaniec, što jon mianie pieraskočyć. Uciakać ad jaho nie varyjant, była dumka, što hetymi ŭciokami ja moh jaho spravakavać na ataku. Heta ŭsio adbyvałasia prykładna za 5‑7 mietraŭ ad mianie…
Usio adbyvałasia tak chutka, što ja nie paśpieŭ spałochacca, emocyi pierapaŭniali. Heta potym, kali pierahladaŭ efir doma, ja zrazumieŭ, jak mnie pašancavała… A łoś ščaśliva dapłyŭ da supraćlehłaha bieraha!
— Jašče kamientatary ŭ internecie byli vielmi ździŭlenyja, što padčas zdymki taho videa z łasiom vy, niahledziačy na šok, zusim nie vykarystoŭvali niecenzurnaj leksiki. Raskažycie, jak zmahli ŭtrymacca ad mocnaha słoŭca?
— Adnosna niecenzurščyny, to tut usio vielmi prosta, u nas u siamji nie łajucca matam i mnie soramna pramaŭlać hetyja słovy. Inakš kažučy, nie vałodaju mastactvam maciernych vykazvańniaŭ.
— I čym skončyłasia vaša rybałka, ryba choć jakaja trapiłasia, ci łoś razahnaŭ?
— My pieraviali duch i praciahnuli pošuki aktyŭnaha akunia. My łovim na śpininh, tamu na miescy nie staim. U hetym i charastvo śpininhavaj łoŭli, pastajanna treba pierasoŭvacca pa vadajomie.
— Rybałka zdajecca nastolki mirnym zaniatkam, što hety łoś niešta padobnaje da padajučaha mietearyta. A ci zdaralisia z vami na rybałcy inšyja cikavyja, kazusnyja situacyi?
— Naohuł na rybałcy dzikija žyvioły sustrakajucca časta: babry, lisy, łasi, kazuli. Ale, jak praviła, heta ŭsio adbyvałasia na biaśpiečnaj adlehłaści. Hety vypadak ździviŭ tym, što ŭsio heta adbyvałasia pobač z nami.
Byŭ adzin paciešny vypadak, kali paśla rybałki ja źbiraŭ łodku, a rybu pakinuŭ na bierazie. I pakul ja źbiraŭsia, padbiehła lisa i stała kraści maju rybu.
— U svaich sacsietkach vy publikujecie videa, na jakich zdymajecie pryhažość pryrody, svaju rybałku. I pry hetym pakazvajecie, jak adpuskajecie rybu. Vy zusim nie bieracie rybu, ci adpuskajecie tolki niekatoruju?
— Ja nie prosta rybałoŭ, a rybałoŭ-spartoviec. U nas u sporcie my aktyŭna prapahandujem pryncyp «złaviŭ — adpuści». Viadoma, ja zabiraju rybu, ale davoli redka i ŭ mieru. Mnie ŭ rybałcy bolš padabajecca sam praces łoŭli, a złavić rybu i pryvieźci dadomu — ja dumaju pra heta ŭ apošniuju čarhu.
Akramia rybałki ja aktyŭna ŭdzielničaju ŭ raźvićci rybałoŭnaha sportu. Pravodzim turniry, starajemsia pryciahvać bolš moładź. Ułasna, mienavita hetaja pryčyna mianie padšturchnuła pravodzić žyvyja efiry, dzie ja mahu padzialicca vopytam, raskazać pra rybałoŭny sport i pryciahnuć sponsaraŭ na spabornictvy.
— Raskažycie pra vašy trafiei, jość čym ździvić? Što cikavaha łavili, i što vam padabajecca łavić?
— Na žal trafiejami asabliva pachvalicca nie mahu, samaja bujnaja maja rybina — heta sudak na 4 kiłahramy 860 hramaŭ. Bolš za ŭsio lublu łavić sudaka i akunia.
— Jakija parady vy dali b maładomu čałavieku, jaki choča zaniacca rybałkaj, ale nie viedaje z čaho pačać?
— U sacsietkach možna znajści spartyŭnyja rybałoŭnyja hrupy. Spartsmieny časta pravodziać turniry, majstar-kłasy, sumiesnyja vyłazki na rybałki. Možna skaapieravacca, tam usio pakažuć i raskažuć, i čałaviek zmoža vybrać, jaki vid łoŭli (śpininh, fidar, papłavok) jamu bolš pa dušy.
— Vaša mierkavańnie pra zakanadaŭstva ab rybałcy. Ci treba niešta palepšyć, na vaš pohlad?
— U pieršuju čarhu chaciełasia b viarnuć zabaronu na łoŭlu «televizarami». Heta takija ekrany ź sietki. Nu i, napeŭna, pavialičyć štat inśpiektaraŭ pa achovie navakolnaha asiarodździa.
U Breście łoś z raźbiehu kinuŭsia ŭ raku prosta kala rybaka VIDEA
U Prypiaci vyłavili soma vahoj 80 kiłahramaŭ
U Słucku chłopčyk niespadziavana vyciahnuŭ z kanavy vialikaha karpa. Hetu radaść treba bačyć VIDEA
Ratavalniki ceły viečar šukali rybaka-tapielca ŭ Miadzielskim rajonie. Na nastupny dzień jon viarnuŭsia pa łodku
«Rybu zvyčajna škadujem». Asablivaści rybałki pa-biełarusku
Ciapier čytajuć
«Hubazikaŭcy schilajuć Kaleśnikavu da vysyłki, ale jana nie choča»3
Kamientary