Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki
«Biełpoł» raskryvaje maštabnuju karupcyjnuju schiemu, u centry jakoj asoby ź blizkaha atačeńnia Łukašenki.
U novym rasśledavańni «Biełpoł» źviartaje ŭvahu na budaŭnictva sučasnaha lačebna-dyjahnastyčnaha korpusu Respublikanskaha kliničnaha miedycynskaha centra ŭ Ždanovičach, viadomaha jak Lečkamisija. Novaje hrandyjoznaje budaŭnictva viadziecca na miescy byłych azdaraŭlenčych centraŭ «Śvitanak» i «Łazurny».
Jak śćviardžaje «Biełpoł», schiema pieradačy hetaj ziamli i nastupnaha budaŭnictva vyhladaje jak kłasičny chabar.
25 vieraśnia 2023 hoda asabistym rasparadžeńniem Łukašenki №159 RP z hryfam «Dla słužbovaha karystańnia» ziamielnyja ŭčastki i budynki sanatoryjaŭ byli pradadzienyja kampanii TAA «ŁendResurs» usiaho za 1,5 miljona dalaraŭ. Prodaž adbyŭsia biez adkrytaha tendaru i jakich-niebudź publikacyj u ŚMI.
Zhodna z rasparadžeńniem, «ŁendResurs» abaviazany za svoj košt źnieści isnujučyja pabudovy, sprajektavać, pabudavać i abstalavać novy lačebna-dyjahnastyčny korpus pavodle techničnaha zadańnia Respublikanskaha kliničnaha miedycynskaha centra.
Paśla zaviaršeńnia budaŭnictva, kampanija pavinna pieradać hatovy abjekt, košt jakoha, jak śćviardžajuć rasśledvalniki, składaje nie mienš za 75 miljonaŭ dalaraŭ, va ŭłasnaść Respubliki Biełaruś absalutna biaspłatna. Zdača abjekta dziaržaŭnaj kamisii zapłanavana na 5‑7 listapada 2025 hoda.
Što ž jana atrymaje ŭzamien?
Jak tłumačyć «Biełpoł», kampanija-«miecenat» TAA «ŁendResurs» — nie vypadkovy hulec. Jana naŭprost źviazanaja z aliharcham Mikałajem Varabjom, adnym z klučavych kašalkoŭ režymu Łukašenki. Mienavita «ŁendResurs», pa infarmacyi «Biełpoła», u 2021‑2022 hadach byŭ adnym z najbujniejšych imparcioraŭ rasijskaj nafty ŭ Biełaruś, zarabiŭšy na hetych schiemach, pa roznych acenkach, da 2,2 miljarda dołaraŭ.
Što ž atrymlivaje Varabiej uzamien za taki ščodry «padarunak», jak lačebna-dyjahnastyčny korpus lečkamisii?
Jak vyśvietlili rasśledvalniki, adkaz chavajecca ŭ novym inviestycyjnym prajekcie — budaŭnictvie šmatfunkcyjanalnaha žyłoha kompleksu premium-kłasa «Serca stalicy» ŭ Minsku.
Prajekt ujaŭlaje saboj try viežy vyšynioj da 50 pavierchaŭ na ŭčastku ŭ 3 hiektary ŭ miežach vulic Damašeŭskaj, Cimirazieva i zavułka Tučynskaha. Ahulny košt prajekta aceńvajecca ŭ 262 miljony dołaraŭ.
Realizacyja hetaha prajekta budzie ažyćciaŭlacca praź śpiecyjalna stvoranuju firmu TAA «MulciChaŭs», zasnavalnikam jakoj źjaŭlajecca zahadkavaja kampanija z AAE — Multibuilding Constructing. Jak śćviardžajuć rasśledvalniki, heta firma-pustyška, zarehistravanaja ŭsiaho za miesiac da padačy prajekta pa adrasie sielskaj kramy za 110 km ad horada Adžman.
Prajekt budzie realizavany na padstavie čarhovaha sakretnaha ŭkaza Łukašenki. Pry hetym inviestar atrymaje biesprecedentnyja lhoty: vyzvaleńnie ad vypłaty padatku na prybytak, padatku na nieruchomaść i ziamielnaha padatku, a taksama lhotny kredyt.
Pa infarmacyi «Biełpoła», isnuje suviaź pamiž firmami, zadziejničanymi ŭ prajekcie «Serca stalicy», i strukturami, jakija pierajšli pad apieratyŭnaje kiravańnie partnioraŭ Mikałaja Varabja paśla apały inšaha aliharcha, Juryja Čyža.
Biełaruskija pradpryjemstvy praciahvajuć vyrablać pryceły i bojeprypasy dla rasijskaj armii
Syn Iryny Abielskaj uvachodzić u kiraŭnictva BNBK. A były premjer Kyrhyzstana zvalniaŭsia adtul sa skandałam
Jak Łukašenka dapamahaje Rasii handlavać ałmazami ŭ abychod sankcyj — novaje rasśledavańnie «Biełpoł»
Kamientary