Novyja iPhone užo ŭ Biełarusi. Kolki kaštujuć i ci varta jechać pa ich u Polšču abo Litvu?
Apple 9 vieraśnia prezientavała novuju liniejku iPhone, a z 19 vieraśnia pačaŭsia start prodažaŭ. Novyja smartfony ŭžo dabralisia da Biełarusi. Pahladzieli, za kolki ich možna nabyć i ci ŭdasca sekanomić, kali kupić ich u Polščy ci Litvie.
Z dastaŭkaj na kastryčnik
U katałozie Onliner novyja ajfony ŭ zaležnaści ad madeli prapanujuć usiaho pa 2—3 pradaŭcy.
Z bujnych sietak takija prapanovy jość tolki ŭ «5 elemienta». Košt na bazavy iPhone 17 na 256 GB składaje 3900 rubloŭ (kala 1100 jeŭra). Ale telefony pryviazuć pad zakaz tolki 17 kastryčnika.
Pro viersija kaštuje 5900 rubloŭ (1650 jeŭra), Pro Max — 6700 rubloŭ (amal 1900 jeŭra) za viersii na 256 GB.
Samy tonki smartfon u historyi Apple — iPhone Air — prapanujuć za 5200 rubloŭ za 256 GB i 6200 z pamiaćciu na 512 GB.
Ale ŭ najaŭnaści ŭ hetych pradaŭcoŭ telefonaŭ niama. Kali zamović ich ciapier, to samaja rańniaja data dastaŭki staić na 6 kastryčnika.
Telefony z ruk užo jość
Pry hetym novyja iPhone u Biełarusi, akramia bazavaha iPhone 17, užo pradajuć z ruk.
Ceny na 17 Pro na 256 GB, naprykład, pačynajucca z 5 185 rubloŭ (kala 1456 jeŭra).
Za 17 Pro Max prosiać ad 6200 rubloŭ (1740 jeŭra). U apisańni da abjaŭleńnia paznačana, što telefony pryviezienyja z AAE i majuć tolki e-sim.
iPhone Air u najaŭnaści pradajuć za 4900‑5000 rubloŭ (kala 1400 jeŭra), na zamovu z dastaŭkaj na 29 vieraśnia jość prapanovy za 4400 rubloŭ (abo 1235 jeŭra).
U iPhone Air za 5500 rubloŭ (kala 1540 jeŭra) napisana, što telefon pryviezieny ź Jeŭropy.
A što ŭ Polščy i Litvie?
U susiednich krainach ajfony novaj sieryi ŭžo pradajucca aficyjna.
iPhone 17 u Polščy kaštuje ad 4000 złotych (pryblizna 940 jeŭra), a ŭ Litvie — 990 jeŭra.
A voś iPhone 17 Pro, naadvarot, krychu tańniej u Litvie — 1350 jeŭra, suprać 1360 jeŭra (5800 złotych) u Polščy.
Viersija Pro Max krychu tańniej u Polščy — 6300 złotych (1480 jeŭra), suprać 1500 jeŭra ŭ Litvie.
Supiertonki iPhone Air u abiedźviuch krainach kaštuje kala 1250 jeŭra.
Adnak mocna sekanomić na kupli smartfona ŭ ES, jak heta było ŭ papiarednija hady, sioleta nie atrymajecca. Praz sankcyi mytnia ŭ ES nie aformić Tax Free pakupnikam ź Biełarusi, tamu viarnuć VAT (padatak na dabaŭlenuju vartaść) užo nie atrymajecca.
Kamientary