Kazachstan pačaŭ spyniać usie fury z Kitaja ŭ Rasiju, dzie patencyjna moža znachodzicca sankcyjonka
Pavodle ŭdzielnikaŭ rynku, takaja žorstkaść u kantroli moža śviedčyć pra pierachod Kazachstana da novaj palityki: strohaje i paśladoŭnaje vykanańnie zachodnich sankcyj u dačynieńni da Rasii. U vyniku pavialičvajecca kolkaść fur, što albo zachraśli ŭ adstojnikach, albo šukajuć abchodnyja maršruty praź inšyja krainy.
Ilustracyjny zdymak. Fota: Vlad Karkov / SOPA Images / LightRocket via Getty Images
Na miažy Kazachstana i Rasii sfarmavalisia šmatkiłamietrovyja čerhi z fur, što vieźli hruzy z Kitaja. Ź siaredziny vieraśnia mytnyja orhany Kazachstana ŭzmacnili pravierki tavaraŭ padvojnaha pryznačeńnia, padsankcyjnaj pradukcyi, elektroniki i zachodnich brendaŭ.
Pavodle pieravozčykaŭ, adbyvajecca istotny zruch u tranzitnaj palitycy krainy: Kazachstan pačaŭ značna bolš stroha vykonvać sankcyjny režym, uviedzieny krainami Zachadu ŭ dačynieńni da Rasii.
Pradstaŭnik łahistyčnaj kampanii SŁK Maksim Jamielin u intervju «Kommiersant» adznačaje: «Pahraničniki značna aktyvizavali dziejnaść pa praduchileńni kantrabandy. Heta źviazana z uzmacnieńniem kantrolu za pravozam tavaraŭ, što padpadajuć pad sankcyi, i tavaraŭ padvojnaha pryznačeńnia».
Pry hetym z rasijskaha boku taksama stali bolš žorstkimi pravierki hruzaŭ.
«Adnaznačna možna skazać, što heta nie časovy zboj, a, chutčej, novaja realnaść — uzmacnieńnie žorstkaści kantrolu i ŭsio bolšaje vykanańnie sankcyj zachodnich krain», — padsumavaŭ situacyju Jamielin.
Kiraŭnik adździeła łahistyki YM Trans Group Alaksandr Azacjan kaža, što na aŭtamabilnym punkcie propusku «Maštakava» pamiž Kazachstanam i RF zaraz znachodzicca dźvie-try tysiačy hruzavikoŭ. A pa słovach krynicy «Kommiersanta», havorka idzie ab 7,5 tysiačy hruzavikoŭ.
Kamientary