Za apošnija hady ŭ Minsku i inšych biełaruskich haradach rekłamy anłajn-kazino i stavak na sport stała značna bolš. Ź niekatorych rakursaŭ u stalicy bačna adrazu niekalki proma-banieraŭ. Adkul taki bum?
«Rekłama kazino prosta ŭsiudy»
Rekłama azartnych hulniaŭ u stalicy ciapier na kožnym kroku.
«Na kožnym trecim biłbordzie rekłama anłajn-kazino, u kožnym lifcie rekłama anłajn-kazino, na kožnym prypynku rekłama anłajn-kazino… Heta sumna», — piša haradžanin u Threads.
«Minsk i ŭsia Biełaruś pakrylisia rekłamaj anłajn-kazino, bukmiekieraŭ i inšych stavak na sport, a pa sutnaści — aŭtamatyzavanych schiem adymańnia hrošaj u nasielnictva», — kamientuje inšy.
«Zamiest taho, kab rekłamavać dobrych pracadaŭcaŭ, dobryja kursy, u nas na kožnym kroku rekłamujuć kazino. P — pryjarytety».
Adna žančyna navat pryhadała historyju: jaje 10‑hadovy ŭnuk pa pamiaci paŭtaraŭ rekłamnyja łozunhi anłajn-kazino, jakija bačyŭ u horadzie. «I potym chočam, kab dzieci nie hulali», — zaŭvažyła jana.
U 2024 hodzie takaja rekłama źjaviłasia i na Nacyjanalnaj biblijatecy.
Rekłamaj anłajn-kazino i becinhavych kampanij niezadavolenaja i adyjoznaja prarasijskaja aktyvistka Volha Bondarava.
«Spačatku dziaržava padsadžvaje na kazino, a potym dzieci nie viedajuć, jak vyrulić, i iduć u zakładčyki!» — skardziłasia jana.
«Kampanii zmahajucca za novych hulcoŭ»
Pa słovach Kaciaryny, ekśpiertki pa markietynhu ŭ becinhavych i hemblinhavych kampanijach (pieršyja prymajuć staŭki na sport i inšyja padziei, druhija ŭjaŭlajuć saboj anłajn-kazino), za apošnija hady ŭ Biełarusi apierataraŭ stała bolš, i razam z hetym vyrasła kankurencyja. Ale heta adbyłosia nie tolki ŭ našaj krainie — takaja tendencyja ahułam u rehijonie.
«Markietynh u śfiery hemblinhu i becinhu zaŭsiody byŭ dastatkova ahresiŭnym. Heta źviazana z vysokaj kankurencyjaj: kampanii zmahajucca za novych hulcoŭ i starajucca ŭtrymlivać ciapierašnich.
Pracuje prosty pryncyp: «viadomaja kampanija — jość hrošy — chutčej za ŭsio, nie padmanie z vypłatami». Tamu brendy aktyŭna inviestujuć u vonkavuju rekłamu, anłajn-prasoŭvańnie, bonusnyja akcyi», — tłumačyć ekśpiertka.
Siarod najbolš prykmietnych hulcoŭ biełaruskaha rynku siońnia — Betera (raniej Parimatch), Maxline, Favbet BY, Marathonbet i BetCity.
Pry hetym u Biełarusi dziejničajuć abmiežavańni: rekłama anłajn-kazino nie moža harantavać vyjhryš abo vykarystoŭvać pramyja zakliki kštałtu «zrabi staŭku i atrymaj». Tamu kampanii vybirajuć bolš abciakalnyja farmuloŭki — «pasprabuj, vyprabuj pośpiech».
Akramia banieraŭ i rolikaŭ, minčuki ŭsio čaściej bačać i mierapryjemstvy, arhanizavanyja becinhavymi kampanijami — ad kancertaŭ da spartyŭnych hulniaŭ. Heta, jak tłumačyć Kaciaryna, pracuje chutčej na paznavalnaść i imidž, čym na pryciahnieńnie novych klijentaŭ.
«Z rostam kolkaści anłajn-karystalnikaŭ i raźvićciom mabilnych servisaŭ pavialičvajecca i kolkaść klijentaŭ u apierataraŭ. Asabliva heta prykmietna siarod tych, chto cikavicca sportam: live-becinh staŭ častkaj łajfstajłu.
Dla mnohich hemblinh — heta nie tolki hulnia na hrošy, ale i sposab źniać stres, elemient volnaha času. Za apošnija 4‑5 hadoŭ hety siehmient staŭ bolš zvykłym i sacyjalna prykmietnym», — kaža Kaciaryna.
Industryja kazino aktyŭna pačała raźvivacca ŭ Biełarusi ŭ 1990‑ia. U našaj krainie abmiežavańni dla hulniavoha biznesu nie byli mocnymi adnosna susiedziaŭ, i ŭžo ŭ 2000‑ch u Minsk i inšyja harady stali pryjazdžać «kazino-turysty».
U červieni hetaha hoda ŭ Biełarusi ŭviali novyja abmiežavańni na pracu anłajn-kazino: ciapier dla rehistracyi na partale treba prysutničać u kampanii fizična ci sazvońvacca ź mieniedžarami pa videasuviazi. Zabaroniena stvarać bolš za adzin akaŭnt i ŭdzielničać u hulni pa prośbie inšych ludziej.
«Naša Niva» — bastyjon biełaruščyny
PADTRYMAĆ
Kamientary
Adpaviedna raźmiaščeńnie rekłamy ich kormić.
A jak apaśla 2020 h. IT-dziaržava ŭziała kurs na ŭsialakija skamy i admyjnyja kantory z usiaho byłoha SSSR, to kamu jašče tut być?