Minimum 314 biełarusaŭ zahinuli va Ukrainie, vajujučy za Rasiju. Stali viadomyja imiony. Ad viarboŭki da śmierci prachodzić u siarednim paŭhoda

Prajekt «Chaču žyć» raniej publikavaŭ proźviščy 1338 biełaruskich hramadzian, jakija vajavali abo vajujuć suprać Ukrainy. Ciapier udałosia vyśvietlić los niekatorych ź ich. Kožny čaćviorty biełarus sa śpisu zahinuŭ. Vielmi imavierna, realnaja kolkaść zahinułych i źnikłych bieź viestak biełarusaŭ značna bolšaja.

Samy pažyły z zahinułych — Škornik Vasil Kazimiravič, 1962 hoda naradžeńnia. Na momant hibieli jamu było 63 hady. Jon zahinuŭ praz čatyry miesiacy paśla padpisańnia kantraktu.

Samy małady — Karańkoŭ Michaił Mikałajevič, 2007 hoda naradžeńnia. Jon źnik bieź viestak va ŭzroście 18 hadoŭ.

U siarednim, ad momantu padpisańnia kantraktu da pryznańnia zahinułym prachodzić kala šaści miesiacaŭ.

Mnohija z zahinułych byli zavierbavanyja ŭ rasijskich turmach. Adnak siarod biełarusaŭ, jakija vajujuć suprać Ukrainy, jość byłyja vajskoŭcy z roznych čaściej — naprykład, vajskoŭcy 5‑j asobnaj bryhady śpiecyjalnaha pryznačeńnia z Marjinaj Horki.

Hramadzian Biełarusi pryvablivajuć vializnyja zarobki najomnikaŭ. Za miesiac słužby Maskva płacić bolš za 2000 dalaraŭ, a razavaja vypłata pry viarboŭcy ŭ mnohich rehijonach Rasii pieravysiła 20 tysiač dalaraŭ.

Dla asudžanych, u tym liku za ciažkija złačynstvy, heta, u svaju čarhu, adzinaja mahčymaść vyjści na svabodu daterminova. Narkazaležnych źniavolenych pryvablivaje i mahčymaść zadavolvać svaju chenć: na froncie na heta hladziać skroź palcy.

Pavodle analizu prajektu, bolš za ŭsio zahinułych słužyli ŭ čaściach 150‑j motastrałkovaj dyvizii. 

«Rasijskija ŭłady chavajuć jak ułasnyja straty, tak i hibiel svaich najmitaŭ. Tym nie mienš, užo ŭstanoŭlenyja nami 314 zahinułych — heta vielizarnaja ličba dla luboj krainy. Dla paraŭnańnia: za dziesiać hadoŭ Afhanskaj vajny zahinuła 723 biełarusy», — piša prajekt.

Pavialičyć

Na baku Ukrainy pa stanie na 2024 hoda, pa źviestkach pradstaŭnika Abjadnanaha pierachodnaha kabinieta Vadzima Kabančuka, zahinuli bolš za 60 biełaruskich dobraachvotnikaŭ. Paśla taho stała viadoma pra hibiel jašče jak minimum dzieviaci biełarusaŭ.

Dakładnaja kolkaść biełarusaŭ-kalinoŭcaŭ pakul nieviadomaja, bo bolšaść ich nie raskryvajuć svaich asobaŭ: łukašenkaŭcy mučać svajakoŭ dobraachvotnikaŭ, jakija robiacca viadomyja, i źniavolvajuć ludziej, jakija majuć namier adpravicca vajavać za Ukrainu.

Možna mierkavać, što ŭ składzie USU vajavała abo prykładna stolki ž biełarusaŭ, kolki i ŭ składzie rasijskaj armii, abo niašmat mienš.

• 1
• 2
• 0
• 5
• 1
• 3
• 2
• 0