Moŭny skandał, u jaki trapiŭ Andrej Pavuk, jaki niadaŭna pačaŭ pracavać kiroŭcam tralejbusa ŭ Vilni, vyklikaŭ rezanans u litoŭskim hramadstvie. Pavuk sam apublikavaŭ videa, jak jon pasvaryŭsia z dyśpietčarkaj, što taja nie razmaŭlaje ź im pa-rusku. Na situacyju adreahavaŭ mer horada Vałdas Biankunskas.
Pavodle słoŭ Vałdasa Biankunskasa, takija pavodziny nieprymalnyja i demanstrujuć niepavahu da dziaržaŭnaj movy Litvy i da kaleh, piša Made in Vilnius.
Jon nazvaŭ pavodziny Andreja Pavuka, «absalutna niedapuščalnymi». «Takimi pavodzinami hramadzianin Biełarusi prademanstravaŭ niepavahu da našaj dziaržaŭnaj movy i supracoŭnikaŭ Vilenskaha hramadskaha transpartu», — skazaŭ Vałdas Biankunskas.
Jon padkreśliŭ, što padtrymlivaje dyśpietčarku, jakaja admoviłasia razmaŭlać pa-rusku. «U hetaj situacyi chaču abaranić dyśpietčarku, jakaja vybrała nie kamunikavać z kiroŭcam na ruskaj movie, jaki za piać hadoŭ žyćcia ŭ Litvie navat u takoj elemientarnaj situacyi vyrašyŭ havaryć z kalehami na inšaj movie», — skazaŭ jon.
Pa słovach Biankunskasa, hety vypadak adlustroŭvaje bolš hłybokuju prablemu — niedachop intehracyi zamiežnikaŭ i biaździejnaść dziaržavy ŭ hetaj śfiery.
Pavodle jaho słoŭ, dziaržava dahetul nie stvaryła efiektyŭnaj sistemy navučańnia litoŭskaj movie dla zamiežnikaŭ.
Mer Vilni padkreśliŭ, što stalica voźmie inicyjatyvu i pakaža prykład. «Hetaja dapamoha budzie pryznačana tym, chto pryjechaŭ siudy pracavać nie z krain ES, haradskaja administracyja mahła b pakryć vydatki biudžetnych pradpryjemstvaŭ na toje, kab navučyć litoŭskaj movie chacia b na minimalnym uzroŭni. Žadajučy realnych pieramien u dziaržavie, my pačniom pakazvać prykład sami», — skazaŭ jon.
Pavodle jaho słoŭ, hety krok — tolki pačatak, adnak nieabchodna bolš šyrokaje supracoŭnictva pamiž ustanovami.
«Jasna razumieju, što hetaj prapanovaj usich prablem nie vyrašym. Dziaržava, biźnies i orhany samakiravańnia pavinny sieści za ahulny stoł i stvarać dziejsnuju sistemu intehracyi zamiežnych hramadzian, raźmierkavać vydatki i adkaznaść. My hatovyja pra heta razmaŭlać i šukać rašeńni», — reziumavaŭ Vałdas Biankunskas.
Kamientary