Unačy Rasija naniesła ŭdar pa Ukrainie — u niekalkich abłaściach zahinuli ludzi, jość paranienyja
Viadoma pra zahinułych u Dniapry i Zaparožskaj vobłaści. Siarod paranienych jość dzieci.
U vyniku masiravanaj rasijskaj ataki na Dniapro adzin čałaviek zahinuŭ, 10 paciarpieli, siarod ich — dvoje dziaciej 2 i 13 hadoŭ, paviedamlaje UNIAN.
Pra heta havorycca ŭ paviedamleńni Dziaržaŭnaj słužby pa nadzvyčajnych situacyjach. Tam udakładnili, što ŭnačy rasijski ŭdarny dron trapiŭ u 9‑paviarchovy žyły dom, što pryviało da razbureńnia kvater z 4‑ha pa 6‑ty pavierch. Na miescy prylotu ŭźnik pažar, jaki ratavalniki ŭžo likvidavali.
Padčas avaryjna-vyratavalnych rabot ratavalniki dapamahli 28 ludziam, siarod ich — 5 dziaciej. Taksama ŭ kvatery na piatym paviersie znajšli cieła žančyny.
Unačy pad udaram voraha taksama była Pałtaŭskaja vobłaść. U vyniku ŭdaraŭ abiastočany ceły horad Haryšnija Płaŭni. Miascovaja ŭłada ŭviała režym nadzvyčajnaj situacyi.
Taksama rasijanie ŭdaryli i pa Kiravahradskaj vobłaści. «Čarhovaja masiravanaja ataka voraha. Meta — krytyčnaja infrastruktura. U tym liku i ŭ Aleksandryjskim rajonie. Usie žyvyja — i heta hałoŭnaje», — paviedamiŭ kiraŭnik AVA Andrej Rajkovič.
Jon dadaŭ, što padraździaleńni DSNS apieratyŭna prystupili da likvidacyi pažaru, pravodzicca abśledavańnie terytoryi.
Kamientary