Fienibut u Biełarusi pradajecca biez receptu. Jaho masava prymajuć studenty pierad siesijaj, ludzi, jakija prachodziać ciažki ŭ žyćci pieryjad, i ŭsie, chto choča chutka źniać tryvohu ci palepšyć son. Adnak u mnohich krainach fienibut zabaronieny. I jon nasamreč surjoznaja pahroza. Doktar-psichijatr Uładzimir Pikirenia ŭ jutub-prajekcie «Jeŭraradyjo» padrabiazna razabraŭ miechanizm dziejańnia fienibutu i patłumačyŭ, čamu hetyja tabletki lohka pryvodziać da narkatyčnaj zaležnaści.
Jak adznačaje Uładzimir Pikirenia, fienibut prymajuć mnohija, chto adčuvaje tryvohu abo trapiŭ u ekstremalnuju žyćciovuju situacyju. Preparat pazicyjanujecca jak adaptahien — srodak, jaki dapamahaje zmahacca sa stresam.
Adnak, pa słovach psichijatra, niahledziačy na narodnuju luboŭ, z punktu hledžańnia dokaznaj miedycyny situacyja vyhladaje sumna.
«Dobrych daśledavańniaŭ, jakija b dakazvali, što jon u čymści dapamahaje, štości lečyć abo dapamahaje niejak spravicca sa stresam, niama», — śćviardžaje ekśpiert.
Pry hetym, u adroźnieńnie ad mnohich inšych papularnych preparataŭ, fienibut sapraŭdy ŭździejničaje na HAMK-receptary (hama-aminamaślanaj kisłaty) u mozhu. Heta taja ž sistema, na jakuju ŭpłyvajuć ałkahol i ciažkija trankvilizatary.
«Jon moža vyklikać zaležnaść pa miechaniźmie, vielmi padobnym da dziejańnia ałkaholu i bienzadyjaziepinaŭ. Takim ža samym čynam, jak ałkahol pamianšaje ŭ ludziej tryvohu, takim ža samym čynam moža pamianšać jaje i fienibut. Ale heta absalutna nie havoryć pra toje, što jon efiektyŭny jak lek i dapamoža ŭ budučyni», — tłumačyć doktar.
Preparat prosta zdymaje simptomy, «tarmozić» niervovuju sistemu, ale nie vyrašaje prablemy, jakaja vyklikała stres.
Samaje surjoznaje papiaredžańnie ekśpierta tyčycca ryzyki pryvykańnia. Pakolki miechanizm dziejańnia preparatu padobny da ałkaholu i narkatyčnych rečyvaŭ, jon vyklikaje anałahičnyja nastupstvy.
«Fienibutam možna atrymać pieradaziroŭku, i ad fienibutu možna atrymać realnuju zaležnaść. I artykuły pra heta sapraŭdy ŭžo jość», — papiaredžvaje Pikirenia.
Cikava, što prablema zaležnaści ad fienibutu vyjšła daloka za miežy byłoha SSSR, dzie jon byŭ vynajdzieny. Jak raskazvaje psichijatr, da jaho źviartalisia kalehi z zachodnich krain. Tam fienibut nie zarehistravany jak lekavy srodak i časta pradajecca ŭ internecie abo spartyŭnych kramach jak zvyčajnaja bijałahična aktyŭnaja dabaŭka (BAD) dla rełaksacyi ci palapšeńnia snu.
Tamu fienibut — heta nie biaskryŭdnaja vitaminka dla mozhu. Heta surjoznaje psichaaktyŭnaje rečyva, jakoje pracuje pa tym ža pryncypie, što i ałkahol. Jaho vykarystańnie biez strohaha kantrolu i razumieńnia ryzyk moža pryvieści nie da zbavieńnia ad stresu, a da nabyćcia novaj prablemy — zaležnaści.
Kamientary
[Zredahavana]
P.S. Minzdrav RB ZAPRIETIŁ k vvozu (dažie dla onkobolnych) trankvilizatory tipa Ksanaksa(eto NIE bienzoadiepin), kotoryj v sosiedniej Polšie prodajotsia biez rieciepta v luboj aptiekie); tak čto - pomirajtie hraždanie v mukach, pomnia o svojej prožitoj niesładkoj žiźni v Chrustalnom Sasutie...