U Kalifornii na 97‑m hodzie žyćcia pamior viadomy amierykanski architektar Frenk Hiery. Pra heta paviedamiła The New York Times sa spasyłkaj na jaho pradstaŭnicu Miehan Łojd.
Frenk Hiery naradziŭsia ŭ 1929 hodzie ŭ Taronta ŭ siamji polskich emihrantaŭ. Jon atrymaŭ adukacyju ŭ Univiersitecie Paŭdniovaj Kalifornii i Harvardzie. Z kanca 1950‑ch pačaŭ pracavać architektaram, a ŭ 1962 hodzie adkryŭ u Łos-Andželesie ŭłasnaje biuro.
Hiery ličycca adnym z najvybitniejšych architektaraŭ sučasnaści i adnym z zasnavalnikaŭ dekanstruktyvizmu — stylu, jaki łamaje tradycyjnyja formy i stvaraje vyraznyja, niezvyčajnyja abjomy.
Jahonyja prajekty viadomyja va ŭsim śviecie. Siarod najbolš znakavych — «tancujučy dom» u Prazie, Muziej Huhienchajma ŭ Bilbaa (1990-ja), kancertnaja zała imia Uołta Dyśnieja ŭ Łos-Andželesie (2000-ja), Fondation Louis Vuitton u Paryžy i zała Pjera Buleza ŭ Bierlinie (2017). Hetyja budynki stali architekturnymi simvałami svaich haradoŭ i časta zhadvajucca jak uzor śmiełaha tvorčaha myśleńnia.
U 1989 hodzie Frenk Hiery atrymaŭ Pryckieraŭskuju premiju — najvyšejšuju ŭznaharodu ŭ śviecie architektury, jakuju niaredka nazyvajuć «architekturnym Nobielem».
Kamientary