17‑hadovaha hrodzienskaha błohiera znoŭ zatrymali, užo pa novaj spravie za paklop
Paśla zakryćcia zboru na lačeńnie chłopčyka z Hrodna Vani Ściacenki kryminalnuju spravu suprać 17‑hadovaha błohiera Michaiła Drahuna i 37‑hadovaj jahonaj siabroŭki Jaŭhienii Tarasienki nie spynili. Bolš taho, suprać Drahuna zaviali jašče adnu kryminalnuju spravu pa art. 188 (paklop) Kryminalnaha kodeksa Biełarusi, paśla čaho jon uziaty pad vartu, paviedamlaje Śledčy kamitet.
Jak stała viadoma raniej, Michaił Drahun i Jaŭhienija Tarasienka letam arhanizavali nibyta dabračynny zbor dla 9‑hadovaha Vani Ściacenki, jaki maje patrebu ŭ darahim lačeńni. Adnak zamiest taho, kab realna dapamahać, jany vyrašyli prysvoić sabranyja hrošy.
Śledstva vyśvietliła, što na rachunki padletka, jaho maci i znajomych pastupiła bolš za paŭtara miljona rubloŭ. Junak kaža, što asabista zabraŭ 60 tysiač, jakija jany ź siabroŭkaj tracili na raskošny ład žyćcia: darahuju vopratku, premijalnaje aŭto, elitnaje žytło, pachody ŭ restarany i adpačynak za miažoj.
Adnak śledstva vyśvietliła, što prysvojenaja suma była značna bolšaj. Tolki na staŭkach u internecie Michaił Drahun prahulaŭ zvyš 100 tysiač rubloŭ. Śledčyja praciahvajuć vyvučać finansavyja dakumienty i znachodziać novyja śviedčańni pra raskošnyja vydatki błohieraŭ.
Pry hetym śćviardžajecca, što Drahun staić na ŭliku ŭ inśpiekcyi pa spravach niepaŭnaletnich za kiravańnie biez pravoŭ, za školnyja hady źmianiŭ piać škoł, paśla škoły nikudy nie pastupiŭ i aficyjna nie pracuje. Jon zajaŭlaje, što zarablaje na błohu, choć IP nie zarehistravany. Taksama znachodzicca na ŭliku ŭ psichijatra.
Siarod usich udzielnikaŭ spravy tolki Drahun nibyta admoviŭsia addać zabłakavanyja na jaho rachunku hrošy na lačeńnie dziciaci, śćviardžajučy, što srodki pryznačalisia dla pryzoŭ padpisčykam. Praŭda, ludzi, praź jakich jon chacieŭ vyvodzić hrošy, dali zhodu na ich pieravod, i nieabchodnaj sumy chapiła, kab zakryć zbor na lačeńnie Vani.
Paśla pieraličeńnia bolš čym 266 tysiač rubloŭ na dabračynny rachunak śledstva praciahvałasia. Padčas vyvučeńnia telefona padletka vyśvietliłasia, što jon nibyta raspaŭsiudžvaŭ paklop na 18‑hadovuju dziaŭčynu, ź jakoj raniej siabravaŭ. U svaim adkrytym instahram-akaŭncie z 190 tysiačami padpisčykaŭ jon abvinavaciŭ jaje ŭ kradziažy 50 tysiač rubloŭ. Na dopycie jon admaŭlaje vinu i kaža, što jana «kinuła jaho na hrošy».
U dačynieńni da Michaiła Drahuna dadatkova zaviali kryminalnuju spravu za paklop (art. 188 KK RB). Pa sankcyi prakurora jon źmieščany pad vartu. Śledstva praciahvajecca, kančatkovyja vysnovy buduć zrobleny paśla jaho zaviaršeńnia.
17‑hadovy błohier, jaki šykavaŭ na hrošy sa zboru na chvoraje dzicia, znoŭ źbirajecca razyhryvać ajfony
Błohier z Hrodna, jakoha abvinavacili ŭ machlarstvie na hrašach dla chvoraha dziciaci, u instahramie prakamientavaŭ svaju spravu
Błohieraŭ, jakija prahulali miljon dabračynnych hrošaj, adpuścili dachaty
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci
Maci chłopčyka z Hrodna, jakomu dapamahali źbirać hrošy zatrymanyja błohiery: Jany pieradali nam 257 tysiač, dla nas heta vielizarnyja hrošy
Kamientary