Na mytni zatrymali najbujniejšuju ŭ historyi niezaležnaj Biełarusi partyju narkotykaŭ
Biełaruskija mytniki spynili najbujniejšuju ŭ historyi niezaležnaj Biełarusi mižnarodnuju pastaŭku narkotykaŭ i psichatropaŭ z terytoryi Jeŭrasajuza — vahoj kala 1,3 tony, paviedamiŭ Dziaržaŭny mytny kamitet.
Złačyncy płanavali pieravieźci ŭ hruzaviku polskaha pieravozčyka ŭ Biełaruś i Rasiju vosiem tysiač brykietaŭ z 915 kh hašyšu i 50 skrynak z 367 kh miefiedrona, pad vyhladam lehalnaj partyi minieralnaj vady. Niekalki dziasiatkaŭ butelek vady sapraŭdy vykarystoŭvalisia jak maskiroŭka.
Schiemu pieramiaščeńnia vykryli supracoŭniki Apieratyŭnaj mytni, jakija paśla skanavańnia hruzavika pryniali rašeńnie pravieści jaho pahłybleny ahlad. Taksama, pakolki hruz pryznačaŭsia dla pastaŭki ŭ Rasijskuju Fiederacyju, biełaruskija mytnyja orhany razam z rasijskimi kalehami praviali dalejšyja apieratyŭna-vyšukovyja mierapryjemstvy.
U vyniku byli vyjaŭlenyja i zatrymanyja ŭdzielniki mižnarodnaj złačynnaj hrupy — hramadzianie ES, Biełarusi, Rasii i Małdovy. Padčas pieratrusu ŭ ich kanfiskavali jašče 5 kh hašyšu i miefiedronu.
Pa hetym fakcie Apieratyŭnaja mytnia Biełarusi i Fiederalnaja mytnaja słužba Rasii zaviali kryminalnyja spravy za kantrabandu narkotykaŭ u asabliva bujnym pamiery. Sankcyi artykułaŭ praduhledžvajuć da 20 hadoŭ pazbaŭleńnia voli.
Košt kanfiskavanaj partyi narkotykaŭ na čornym rynku składaje kala 62 miljonaŭ dalaraŭ ZŠA, što dastatkova dla 2 miljonaŭ 933 tysiač razavych doz.
Kamientary