Minčuka asudzili na 10 hadoŭ za machlarstva z pastaŭkaj aŭtamabilaŭ
Jon padmanuŭ 38 čałaviek na 1,8 młn rubloŭ.
Z 2018 hoda mužčyna, jaki zarehistravaŭsia jak indyvidualny pradprymalnik, zajmaŭsia padboram i pastaŭkami aŭtamabilaŭ ź ES «pad kluč». Svaje pasłuhi jon aktyŭna rekłamavaŭ i akazvaŭ praz sacsietki, a taksama aficyjny sajt.
Adnak u 2023 hodzie minčuk achapiŭsia azartnymi hulniami. Z hetaha momantu ŭsie atrymanyja ad klijentaŭ hrošy jon traciŭ na staŭki ŭ bukmiekierskich kantorach, paviedamlaje SK.
U kastryčniku 2023 hoda da biznesmiena źviarnuŭsia mužčyna, i jany zaklučyli damovu na padbor aŭtamabila ŭ peŭnaj cenavaj katehoryi. Praź niekalki miesiacaŭ pradprymalnik paviedamiŭ, što znojdzieny aŭtamabil, jaki nie traplaŭ u surjoznyja darožna-transpartnyja zdareńni i znachodzicca ŭ vydatnym techničnym stanie.
Davieryŭšysia «prafiesijanału», klijent nabyŭ aŭtamabil i apłaciŭ pasłuhi padboru. Adnak u dalejšym dyjahnostyka na stancyi techničnaha absłuhoŭvańnia pakazała, što aŭto pabyvała ŭ surjoznym DTZ i ŭ im adsutničajuć paduški biaśpieki.
Niesumlenny vykanaŭca spačatku admaŭlaŭ vyjaŭlenyja niedachopy, ale paźniej pryznaŭ svaju vinu i prapanavaŭ dapamohu ŭ pošuku novaha pakupnika. Jon zabraŭ aŭtamabil na realizacyju, napisaŭšy raśpisku, i vusna damoviŭsia z uładalnikam, što paciarpieły asabista budzie prysutničać na ździełcy. Adnak svajho słova jon nie strymaŭ. Pra toje, što majomaść pradadziena, klijent daviedaŭsia praź niekalki miesiacaŭ, kali vyrašyŭ vyśvietlić pryčynu nievykanańnia abaviazacielstvaŭ z boku pradprymalnika. Toj paabiacaŭ pieradać hrošy ad prodažu praź niekalki dzion, adnak tak hetaha i nie zrabiŭ.
Za dva hady biznesmien ašukaŭ bolš za 38 paciarpiełych.
Jany zaklučali ź im damovy i pieradavali pieradapłatu. U jakaści «dokazu» vykanańnia svaich abaviazacielstvaŭ minčuk dasyłaŭ fota i videa aŭtamabilaŭ, jakija nibyta «zatrymalisia» na miažy. Na patrabavańni viarnuć hrošy mužčyna adkazvaŭ tolki adhavorkami, što znachodzicca ŭ inšym horadzie, pradaje kvateru i zmoža raźličycca, a paźniej uvohule pierastaŭ adkazvać na zvanki i paviedamleńni.
Śledčymi dapytany paciarpiełyja i śviedki, kanfiskavana i ahledžana dakumientacyja. Suma naniesienaj škody skłała bolš za 1,8 młn rubloŭ.
Pa vynikach rasśledavańnia biznesmienu vystaŭlena abvinavačańnie pa č. 4 art. 209 (machlarstva, učynienaje ŭ asabliva bujnym pamiery) i č. 3 art. 211 (prysvajeńnie majomaści asobaj, jakoj jana była ŭvierena, u bujnym pamiery) Kryminalnaha kodeksa.
Sud pryznaŭ jaho vinavatym i pryznačyŭ 10 hadoŭ pazbaŭleńnia voli ŭ papraŭčaj kałonii ŭzmocnienaha režymu sa štrafam u21 tys.
Kamientary