Amierykanskija desantniki vysadzilisia na tankier Marinera, jaki padčas pahoni źmianiŭ ściah na rasijski
Amierykanskija vajskoŭcy ažyćciavili zachop naftavaha tankiera Marinera (raniej Bella 1), jaki, jak śćviardžajecca, źviazany z Rasijaj. Heta pieršy vypadak, kali amierykancy zachoplivajuć sudna «cieniavoha fłotu», što idzie pad rasijskim ściaham.
Pra pačatak apieracyi paviedamlaje ahienctva Reuters sa spasyłkaj na krynicy, a taksama rasijskija kanały, siarod ich RT, jakija apublikavali fota i videa incydentu. Pavodle najaŭnaj infarmacyi, vajskoŭcy, jak miarkujecca — amierykanskija, vysadzilisia na bort sudna. Paśla hetaha tankier, jaki znachodziŭsia ŭ Paŭnočnym mory, źmianiŭ kurs na paŭdniovy.
Sa źviestak Reuters, apieracyja pravodzicca Bierahavoj achovaj i Uzbrojenymi siłami ZŠA, na bort vysadziŭsia desant. U momant praviadzieńnia apieracyi ŭ niepasrednaj blizkaści znachodzilisia rasijskija vajskovyja sudny, u tym liku rasijskaja padvodnaja łodka. Rasija vysłała karabli VMS nasustrač tankieru, adnak amierykancaŭ heta nie spyniła.
Ministerstva zamiežnych spraŭ Rasii zajaviła TASS, što z tryvohaj sočyć za situacyjaj. U viedamstvie vykazali ździŭleńnie, što rasijskamu sudnu «nadajecca pavyšanaja i vidavočna nie suraźmiernaja jaho mirnamu statusu ŭvaha z boku vajennych ZŠA i NATA».
Historyja pieraśledu tankiera ciahnułasia niekalki tydniaŭ. Sudna, jakoje raniej nasiła nazvu Bella 1 i chadziła pad ściaham Panamy, znachodziłasia ŭ sankcyjnych śpisach ZŠA z-za transpartavańnia iranskaj nafty.
Kanflikt abvastryŭsia ŭ kancy śniežnia, kali sudna išło ŭ Vieniesuełu. Jano nie zmahło zajści ŭ port i zahruzicca naftaj, bo amierykancy pasprabavali zdahnać i pierachapić jaho tam. Tady ekipaž tankiera nie dazvoliŭ amierykanskim vajskoŭcam padniacca na bort, z-za čaho tyja pačali pieraśled.
Uciakajučy ad pahoni, členy ekipaža pajšli na chitryki: jany namalavali na svaim borcie vyjavu ściaha Rasii. Praź niekalki dzion paśla incydentu sudna źmianiła nazvu z Bella 1 na Marinera. Jaho taksama apieratyŭna ŭnieśli ŭ Rasijski marski rehistr sudnachodstva.
U adkaz na pieraśled, jak paviedamlała The Wall Street Journal sa spasyłkaj na amierykanskaha čynoŭnika, Rasija nakiravała padvodnuju łodku i inšyja vajskovyja marskija srodki dla supravadžeńnia pustoha naftavaha tankiera. Pa źviestkach vydańnia, napiaredadni zachopu sudna znachodziłasia prykładna za 300 mil (~480 km) na poŭdzień ad Isłandyi i ruchałasia ŭ bok Paŭnočnaha mora, dzie jaho praciahvała adsočvać amierykanskaja bierahavaja achova.
-
Zatrymanaha ŭ Francyi rasijskaha baskietbalista abmianiali na asudžanaha ŭ Rasii francuza
-
Kuba daŭno nie žyła dobra. Pry hetym jaje ekanamičnaja madel i demahrafičnaje padzieńnie mocna nahadvaje łukašenkaŭskuju. Joj kaniec?
-
Staradruki, jakija vykradalisia ź biblijateki Varšaŭskaha ŭniviersiteta, vyvozilisia ŭ Maskvu praź Minsk
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ4
Kamientary
A Vovočka dumał, čto Tramp zabudiet pro unižienije na Alaskie? Vot Dońni i povodił po hubam pri pacanach. Otviečať budieš, ili pojdieš pacanam objaśniať, čto s siehodniašnieho dnia vsie v nizkom statusie? Vsie po poniatijam, priamo kak u vas lubiat.