Sud nad Maryn Lo Pen siońnia vyrašaje, ci zmoža jana ŭdzielničać u prezidenckich vybarach u Francyi ŭ nastupnym hodzie
Lidarka francuzskich ultrapravych Maryn Lo Pen u aŭtorak paŭstanie pierad sudom, kab asprečyć abvinavačańnie ŭ prysvajeńni srodkaŭ. Ad vyniku hetaha pracesu zaležyć, ci zmoža jana pryniać udzieł u prezidenckich vybarach u nastupnym hodzie, dzie jana ličyłasia adnoj z najbolš vierahodnych pretendentak na pieramohu, piša Bi-bi-si.
U sakaviku francuzski sud zabaraniŭ Lo Pen zajmać dziaržaŭnyja pasady na praciahu piaci hadoŭ paśla taho, jak jana i jašče vosiem byłych deputataŭ «Nacyjanalnaha abjadnańnia» byli pryznanyja vinavatymi ŭ prysvajeńni bolš jak čatyroch miljonaŭ jeŭra z fondaŭ ES.
Pavodle rašeńnia suda, z 2004 pa 2016 hod Lo Pen i jaje paplečniki vykarystoŭvali srodki, vydzielenyja na pracu ŭ Jeŭrapiejskim parłamiencie, dla apłaty pracy supracoŭnikaŭ, jakija nasamreč pracavali na partyju.
Lo Pen zajaviła, što sposab vykarystańnia hrošaj byŭ zakonnym. «Maja adzinaja linija abarony ŭ apielacyjnym pracesie budzie takoj ža, jak i ŭ pieršym: havaryć praŭdu», — zajaviła Lo Pen žurnalistam u paniadziełak.
«Spravu pierahledziać, i sudzić jaje buduć novyja sudździ, — dadała jana. — Ja spadziajusia pierakanać ich u svajoj nievinavataści».
Lo Pen, jakaja trojčy ŭdzielničała ŭ prezidenckich vybarach, taksama była prysudžanaja da čatyroch hadoŭ pazbaŭleńnia voli, ź jakich dva hady — umoŭna, a taksama da štrafu 100 tysiač jeŭra. U adroźnieńnie ad rašeńnia ab zabaronie, hetyja pakarańni nie ŭstupili ŭ siłu, bo jana padała apielacyju.
Palityk zaŭsiody śćviardžała, što nievinavataja, i abskardžvaje prysud u nadziei atrymać mahčymaść čaćviortym razam bałatavacca na pasadu prezidenta. Apielacyju razam ź Lo Pen padali 12 fihurantaŭ spravy, u tym liku namieśnik lidara «Nacyjanalnaha abjadnańnia» Łui Alijo, a taksama sama partyja.
Jašče 12 čałaviek, u tym liku adna ź siaścior Lo Pen, vyrašyli nie abskardžvać prysud, a adzin z asudžanych z taho času pamior.
Słuchańni pačynajucca ŭ aŭtorak i pavinny zaviaršycca 12 lutaha.
Advakaty Maryn Lo Pen — Radolf Basielu i Sandra Šyrak Kałaryk — admovilisia davać kamientary pierad pačatkam słuchańniaŭ.
Advakat Jeŭrapiejskaha parłamienta Patryk Miezanioŭ vykazaŭ nadzieju, što prysud Lo Pen i jaje saŭdzielnikam budzie pakinuty ŭ sile, uklučajučy vypłatu bolš jak 3 miljonaŭ jeŭra ŭ jakaści kampiensacyi škody Jeŭrapiejskamu parłamientu. «Nacyjanalnaje abjadnańnie» taksama pavinna vypłacić štraf u 2 miljony jeŭra, ź jakich pałova była ŭmoŭna adterminavanaja.
Rašeńnie pa spravie čakajecca da leta, što aznačaje: kali piacihadovaja zabarona na ŭdzieł u vybarach budzie admienienaja abo istotna skaročanaja, u Lo Pen zastanucca šancy ŭdzielničać u vybarach 2027 hoda.
Kali ž sud pakinie ŭ sile svajo pieršapačatkovaje rašeńnie, Lo Pen budzie zabaroniena ŭdzielničać u vybarach 2027 hoda, jakija mnohija ličać jaje najlepšym i, mahčyma, apošnim šancam stać prezidentkaj Francyi.
Kamientary