Biełarus naładziŭ u Polščy vytvorčaść chatnich bunkieraŭ dla abarony ad rakiet i dronaŭ
Biełaruski biznesmien Alaksandr Fursievič, jaki ŭ 2017 hodzie zasnavaŭ u Varšavie kampaniju BPR-Plastech, asvojvaje novuju nišu na jeŭrapiejskim rynku — vytvorčaść pryvatnych padziemnych schoviščaŭ. Kali raniej asnoŭnaj pradukcyjaj byli sklepy dla harodniny, to ciapier čas dyktuje novyja pryjarytety: kampanija prapanuje paŭnavartasnyja bunkiery dla abarony ludziej.
Niespakojny čas aktualizavaŭ asartymient varšaŭskaj kampanii BPR-Plastech. Akramia firmovych sadovych pahraboŭ dla zachoŭvańnia praduktaŭ, biznesmien prapanuje ciapier i padziemnyja bunkiery, u jakich razam ź nieabchodnym zapasam ježy moža na peŭny čas i dosyć kamfortna schavacca haspadar razam ź siamjoj, piša kanał Vadzima Siachoviča.
U prezientacyi na sajcie BPR-Plastech skazana, što takoje ŭkryćcio «pryznačana dla abarony ad najbolš imaviernych pahroz — padajučych abłomkaŭ dronaŭ abo rakiet, frahmientaŭ razburanych budynkaŭ abo vypadkovych strełaŭ».
Ceny na bunkiery biełarusa znachodziacca ŭ miežach 13,7—18,5 tys. jeŭra. Za 4 690 jeŭra prapanujecca dvuch-trochmiesnaja padziemnaja kapsuła vyžyvańnia, ale za taki košt — bieź miesca dla zapasaŭ ježy.
Pa vynikach 2024 hoda prodažy BPR-Plastech, jakoj Alaksandr Fursievič vałodaje na parytetnych pačatkach z Natallaj Fursievič, vyraśli bolš čym na 30% i dasiahnuli abjomu 3,3 młn złotych.
Nieviadoma, jakaja častka hetaj sumy prypadaje mienavita na bunkiery, a jakaja — na tradycyjnyja sadovyja pahraby.
Pahraby realizujucca pad brendam Natural Fridge (ich košt — ad 2 tys. da 14 tys. jeŭra) i, jak paznačajecca na sajcie, znajšli ŭžo zvyš 800 pakupnikoŭ u Polščy, Hiermanii, Šviejcaryi i Aŭstryi.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja30
Kamientary