Kamandujučy elitnaha iranskaha śpiecnaza pracavaŭ na Izrail? Kažuć, jon saskočyŭ z sustrečy ŭ Chamieniei za paŭhadziny da ŭdaru

U subotu, 28 lutaha, izrailskija siły nanieśli mahutny ŭdar pa rezidencyi viarchoŭnaha lidara Irana. U vyniku hetaj ataki zahinuŭ nie tolki Chamieniei, a taksama niekalki vysokapastaŭlenych pradstaŭnikoŭ vajennaha kamandavańnia i členaŭ jaho siamji. Pavodle źviestak niekatorych miedyja, u toj momant pobač z Chamieniei pavinien byŭ znachodzicca i 68‑hadovy hienierał Ismaił Kaani. Adnak jon cudam vyžyŭ. Paviedamlajecca, što Kaani nibyta pakinuŭ abjekt litaralna za paŭhadziny da ŭdaru, spasłaŭšysia na raptoŭnaje paharšeńnie samaadčuvańnia.

Paśla ataki źjaviłasia infarmacyja, što źviestki pra miesca znachodžańnia iranskaha kiraŭnictva mahła trapić da izrailskaj raźviedki ad ahienta, jaki znachodziŭsia pobač ź im.

Mienavita na hetym fonie ŭ miedyja i sacyjalnych sietkach pačali raspaŭsiudžvacca čutki pra toje, što sakretny ahient — hienierał Kaani. Tym bolš što heta ŭžo nie pieršy vypadak, kali jon cudam paźbiahaje hibieli.

Tak, u vieraśni 2024 hoda Ismaił Kaani naviedvaŭ Biejrut dla sustrečy z hienieralnym sakratarom «Chiezbały» Chasanam Nasrałoj — klučavym sajuźnikam Tehierana ŭ Livanie. Na toj čas Nasrała žyŭ va ŭmovach samaj strohaj kanśpiracyi, pastajanna źmianiajučy schoviščy z-za pahrozy zamachu. Adnak nieŭzabavie paśla sustrečy z Kaani Izrail nanios dakładny ŭdar pa hałoŭnaj štab-kvatery «Chiezbały», u vyniku jakoha Nasrała byŭ likvidavany.

Akramia taho, u sacyjalnych sietkach i ŚMI nahadvajuć pra padziei maja 2024 hoda. Śćviardžajecca, što Kaani pavinien byŭ supravadžać prezidenta Irana Ibrahima Raisi padčas vizitu ŭ Nachičevań. Adnak u apošni momant hienierał nibyta admoviŭsia ad palotu, spasłaŭšysia na niezdaroŭje, i nie sieŭ na bort viertalota, jaki paźniej raźbiŭsia ŭ harach na paŭnočnym zachadzie krainy.

Heta čarada vypadkovaściaŭ pryniesła Kaani mianušku «Čałaviek ź dzieviaćciu žyćciami». Pakul mnohija kamandziry ź jaho atačeńnia hinuli ŭ vyniku apieracyj Izraila i ZŠA, jon nie raz zastavaŭsia žyvy, navat kali jaho ŭžo aficyjna ličyli zahinułym.

Naprykład, u kastryčniku 2024 hoda niekatoryja miedyja paviedamlali, što jon moh zahinuć padčas izrailskaha ŭdaru ŭ Livanie, kali byŭ likvidavany pierajemnik Nasrały Chašem Safieidzin. U pieršyja hadziny paśla ataki źjavilisia paviedamleńni, što hienierał moh prysutničać na sustrečy, adnak paźniej krynicy ŭ Livanie, Iraku i Iranie zajavili, što jaho tam nie było.

Anałahičnaja situacyja paŭtaryłasia i ŭ 2025 hodzie. Padčas tak zvanaj 12‑dzionnaj vajny ŭ červieni, niekatoryja ŚMI znoŭ «pachavali» Kaani, ale jon nieŭzabavie źjaviŭsia ŭ efiry dziaržaŭnaha telebačańnia, demanstrujučy, što čutki byli zaŭčasnymi.

Tym nie mienš, pavodle nieaficyjnych źviestak, iranskija śpiecsłužby ŭžo tady pačali prajaŭlać da jaho cikavaść: kontrraźviedku biantežyła toje, jak rehularna Kaani pakidaje miescy sustreč za ličanyja chviliny da prylotu rakiet. Da peŭnaha času hienierału ŭdavałasia pierakonvać śledčych u svajoj nievinavataści.

Siońniašnija sprečki vakoł postaci Kaani dasiahnuli apahieju. Paviedamlajecca, što iranskija ŭłady pravodziać maštabnaje ŭnutranaje rasśledavańnie, sprabujučy vyličyć ahienta «Masada». Da prykładu, chodziać čutki, što ahient pieradaŭ Izrailu videazapis ź ciełam zabitaha ajatały Chamieniei.

Arabskija miedyja, spasyłajučysia na svaje krynicy, śćviardžajuć, što Ismaił Kaani ŭžo zatrymany i dapytany. Niekatoryja navat paviedamili pra śmierć hienierała paśla aryštu. Aficyjny Tehieran pakul zachoŭvaje maŭčańnie: nijakich paćviardžeńniaŭ aryštu ci hibieli hienierała nie pastupała. Na hetym fonie internet-prastoru zapałaniajuć i zusim fantastyčnyja viersii — až da taho, što hienierał paśpiachova evakujavany i ŭžo znachodzicca ŭ Izraili.

• 11
• 0
• 2
• 0
• 1
• 0
• 0
• 0