Biełaruś pahasiła dziaržaŭny kredyt, jaki byŭ uziaty ŭ Azerbajdžanu na 12 dzion dla raźlikaŭ z «Hazpromam».
Planavy termin viartańnia kredytu nadychodziŭ 5 lipienia, ale było pryniataje rašeńnie poŭnaściu raźličycca pa hetym kredycie ŭžo siońnia.
Kiraŭnik Biełarusi Alaksandar Łukašenka raniej zajaviŭ, što dla pahašeńnia doŭhu pierad «Hazpromam» za haz, pastaŭleny ŭ studzieni‑krasaviku hetaha hodu, byŭ uziaty dziaržaŭny kredyt u Azerbajdžanu na 200 miljonaŭ dalaraŭ. Z hetaj sumy byŭ zrobleny płaciož na adras «Hazpromu» ŭ pamiery 187 miljonaŭ dalaraŭ.
Pryciahnieńnie dziaržaŭnaha kredytu z Azerbajdžanu było zamacavana pastanovaj biełaruskaha ŭradu ad 22 červienia. Pres‑słužba Łukašenki ŭ toj dzień paviedamiła, što adbyłasia telefonnaja razmova kiraŭnika Biełarusi z prezydentam Azerbajdžanu Ilchamam Alijevym.
Aproč taho, 25 červienia ŭrad pryniaŭ pastanovu № 969, jakaja ŭstupiła ŭ siłu zadniaj dataj — 23 červienia, u dzień pieraličeńnia płaciažu «Hazpromu». Zhodna z dakumentam, u 2010 hodzie «Biełtranshaz» atrymaŭ biudžetnuju pazyku ŭ pamiery 186 miljonaŭ 617 tysiač dalaraŭ «dla pahašeńnia doŭhu za pastaŭleny «Hazpromam» pryrodny haz ź jaje viartańniem nie paźniej za 30 červienia 2010 hodu».
Kamientary