Hałoŭny narkołah krainy: kožny žychar krainy vypivaje 50 plašak harełki ŭ hod

Adnoj z pryčyn katastrafičnaj demahrafičnaj situacyi ŭ Biełarusi i susiednich krainach staršynia Biełaruskaha hramadskaha ab`iadnańnia «Ćviarozaść-Aptymalist» imia Hienadzia Šyčko Valancin Tałkačoŭ ličyć ałkahalizacyju nasielnictva. Takuju dumku jon vykazaŭ 5 žniŭnia na pres-kanfierencyi ŭ Minsku.

Jon zaznačyŭ, što zdaroŭje hramadzian i pryrost nasielnictva ŭ paŭnočnych krainach, takich jak Šviecyja i Narviehija, razam ź inšymi faktarami možna patłumačyć ciažkadastupnaściu ałkaholu i jaho darahoŭlaj. «U Šviecyi adzin mahazin na ŭskrainie horada raźličany na 29 tysiač nasielnictva i butelka harełki kaštuje 60 jeŭra, u nas ža ŭsio naadvarot —

adzin mahazin u lohkadastupnym miescy, raźličany na 200 čałaviek, i cana butelki harełki — 7 tysiač rubloŭ», — skazaŭ Tałkačoŭ.

Pavodle jaho słoŭ, štohod členy ab`iadnańnia pravodziać ahitacyjnyja viełapachody pa Biełarusi. «Voś zaraz my prajechali pa Minskaj vobłaści i ŭbačyli, što ŭ haračuju paru, kali treba źbirać uradžaj, nasielnictva ŭ asnoŭnym vypivaje», — zaznačyŭ jon.

U svaju čarhu hałoŭny narkołah ministerstva achovy zdaroŭja Biełarusi Alaksiej Alaksandraŭ zaznačyŭ, što pa vynikach minułaha hoda ŭ respublicy było pradadziena śpirtnych napojaŭ u kolkaści 12 litraŭ absalutnaha ałkaholu na dušu nasielnictva. Pry hetym jon padkreśliŭ, što pa vynikach paŭhodździa 2010 hoda spažyvańnie ałkaholu źniziłasia ŭ paraŭnańni z anałahičnym letašnim pieryjadam vielmi niaznačna, usiaho na 0,4%.

«Inakš kažučy, kožny žychar Biełarusi, ad niemaŭlaci da staroha, vypivaje 50 butelek harełki za hod», — skazaŭ Alaksandraŭ.

Hałoŭny narkołah zaznačyŭ, što niežadańnie ludziej, jakija vypivajuć, pryznać siabie chvorymi na ałkahalizm i źviarnucca pa dapamohu, ciesna źviazana z tradycyjami našaha hramadstva, kali spažyvańnie ałkaholu — heta sacyjalnaja norma.

Kiraŭnik centra manitorynhu narkałahičnaj situacyi ŭ Biełarusi Respublikanskaha navukova-praktyčnaha centra psichičnaha zdaroŭja Siarhiej Vosipčyk dadaŭ, što Suśvietnaja arhanizacyja achovy zdaroŭja pry padliku kolkaści litraŭ na dušu nasielnictva nie ŭličvaje dziaciej da 15 hadoŭ, zatoje ŭličvaje dolu spažyvanaha nielehalnaha ałkaholu. «Z ulikam hetych dvuch pakazčykaŭ uzrovień spažyvańnia ałkaholu na dušu nasielnictva ŭ našaj krainie nablizicca da 18–20 litraŭ», — zajaviŭ jon.

Jon taksama dadaŭ, što ŭ mai na 63-j siesii Hienieralnaj asamblei SAAZ była pryniataja hłabalnaja stratehija, sutnaść jakoj zaklučajecca ŭ praviadzieńni roznych mierapryjemstvaŭ, jakija b sadziejničali źnižeńniu škody ad złoŭžyvańnia ałkaholem.

• 0
• 0
• 0
• 0
• 0
• 0
• 0
• 0