Pravakacyja? Rasijskaje pasolstva ŭ Minsku zakidali kaktejlami Mołatava

Na terytoryju ambasady kinuli dźvie butelki z zapalnaj sumieśsiu. U vyniku adna z mašyn była častkova paškodžanaja.

Pa inšych dadzienych, butelek było dźvie. U vyniku adna butelka trapiła ŭ słužbovuju mašynu, pryparkavanuju na stajancy kala hmacha. Pra heta «Interfaksu» paviedamiŭ supracoŭnik dypłamatyčnaha pradstaŭnictva, jaki staŭ adnym ź śviedak zdareńnia. U incydencie nichto nie paciarpieŭ.

Pavodle źviestak MNS Biełarusi, incydent adbyŭsia kala 22.50. Pa słovach krynicy, butelka z zapalnaj sumieśsiu, patrapiŭšy ŭ zadniaje škło aŭtamabila «Mazda-3», raźbiła jaho i ŭ sałonie zaharełasia.

Adnak pradstaŭnik MNS Biełarusi zajaviŭ RIA «Naviny», što «jak takoha pažaru nie było», i dapamoha pažarnych nie patrabavałasia. Pa dadzienych MNS, na terytoryju ambasady byli kinutyja dźvie butelki z zapalnaj sumieśsiu.

U dziažurnaj častcy HUUS Minharvykankama paviedamili, što pa incydencie ŭzbudžanaja kryminalnaja sprava pa artykule 339 KK RB (chulihanstva). Reštki haručaj vadkaści zabranyja dla ekśpiertyzy. Ustanaŭlivajucca asoby ludziej, jakija kinuli butelki. Miarkujecca, što ich było dvoje.

Jak luboje pasolstva, pradstaŭnictva Rasiei nadziejna achoŭvajecca. Kala jaho dziejničaje stały post milicyi. Pierymietr ambasady pryhladajecca videakamierami sačeńnia.

Načalnik adździeła infarmacyi i hramadskich suviaziaŭ HUUS Alaksandr Łastoŭski taksama paviedamiŭ niekatoryja padrabiaznaści incydenta. U pryvatnaści, stała viadoma, što na miescy złačynstva znojdzienaja butelka jomistaściu 0,33 litra z reštkami zapalnaj sumiesi, a taksama askiepki jašče adnoj butelki z reštkami knota.

Uranku aŭtorka źjavilisia i aficyjnyja kamientary Minsterstvaŭ zamiežnych spraŭ abiedźviuch krain.

«Rasceńvajem dadzienaje zdareńnie jak aburalny akt, za jakim prahladajecca imknieńnie peŭnych siłaŭ pasprabavać pieraškodzić narmalnaj pracy ambasady i pryŭnieści ŭ dvuchbakovyja adnosiny elemienty niedavieru i napružanaści»,

Rasijskaje MZS nakiravała Biełarusi notu pratestu, u jakoj patrabuje rasśledavańnia incydenta.

Biełaruskaje viedamstva, u svaju čarhu, zajaŭlaje, što «my z zakłapočanaściu i abureńniem uspryniali infarmacyju ab zdareńni kala pasolstva Rasijskaj Fiederacyi. Hetaja złačynnaja chulihanskaja vychadka skiravana suprać ćviarozaha rozumu i biełaruska-rasijskich adnosinaŭ».

Źjavilisia i pieršyja kamientary niezaležnych naziralnikaŭ. U pryvatnaści, palitołah Alaksandr Fiaduta, blizki da kampanii «Havary praŭdu», u razmovie z karespandentam «NN» adznačyŭ, što

«heta nie pieršy vypadak, kali na terytoryju rasijskaj ambasady ŭ Minsku niešta kidajuć. Niešta padobnaje było i raniej, i ŭłady zaŭsiody vinavacili ŭ takich incydentach apazicyju.

Chto moh arhanizavać hety incydent? Heta mahła być sprava ruk ekstremistaŭ-adzinakoŭ. Adnak za padpałam mahli stajać i śpiecsłužby. Biełaruskim uładam incydent daje padstavu ŭzmacnić «antyterarystyčnyja miery» napiaredadni vybaraŭ. Taksama zdareńnie šturchaje rasijskija ŭłady na rezkija kroki. Incydent daje nahodu dla infarmacyjnaj ataki na Biełaruś u rasijskich ŚMI i nahniataje atmaśfieru ŭ krainie i vakoł krainy.

* * *

Na rasijskuju ambasadu ŭ Minsku napadali trojčy. I kožny raz nočču. Historyja atak.

Usie incydenty adbyvalisia ŭ noč na pieršy abo apošni dzień miesiaca. Apošnija dva napady źviazvaje toje, što zdaralisia jany niezadoŭha da čarhovaj prezidenckaj kampanii.

1997

Pieršy incydent zdaryŭsia ŭ noč na 1 krasavika 1997 h. Tady budynak dypłamatyčnaha pradstaŭnictva byŭ abstralany z aŭtamata Kałašnikava. Ślady ad kul byli znojdzienyja nie tolki na ścienach ambasady, ale i susiedniaha žyłoha doma. Pobač ź miescam zdareńnia byŭ znojdzieny kinuty aŭtamat i niekalki strelanych hilzaŭ. Nichto nie paciarpieŭ.

2001

Druhaja ataka adbyłasia ŭ noč na 1 červienia 2001 h. Tady na terytoryju pasolstva ŭ stalicy Biełarusi nieviadomymi była kinutaja vybuchoŭka. Vybucham była paškodžanaja aharodža, nichto nie paciarpieŭ. Incydent zdaryŭsia za niekalki hadzin da prybyćcia na minski samit kiraŭnikoŭ SND tahačasnaha prezidenta Rasii Uładzimira Pucina. Infarmacyjnyja ahienctvy raspaŭsiudzili infarmacyju, što na terytoryju ambasady kinuli ručnuju hranatu. Supracoŭniki dypłamatyčnaha pradstaŭnictva ŭ svaju čarhu zajavili pra vykarystańnie dvuch vybuchpakietaŭ. Adkaznaść za vybuch paźniej uziaŭ na siabie Słavamir Adamovič. Praŭda, jon zrabiŭ toje dvuchsensoŭna, i pravaachoŭnyja orhany nie pryniali hetych zajavaŭ usurjoz. Prynamsi, śledstva nie viałosia.

2010

U noč na 31 žniŭnia 2010 h. nieviadomyja zakidali terytoryju rasijskaj ambasady plaškami z zapalnaj sumieśsiu. U vyniku zhareŭ słužbovy lehkavik. Nichto z supracoŭnikaŭ ambasady nie paciarpieŭ.

Źviartaje na siabie ŭvahu toj fakt, što incydenty 2001 i 2010 hh. adbylisia za niekalki miesiacaŭ da praviadzieńnia prezidenckich vybaraŭ u Biełarusi.

Treba adznačyć, što pieršy incydent z ambasadaj Rasii ŭ Minsku ŭ 1997 h. pakłaŭ pačatak cełaj sieryi zdareńniaŭ nadzvyčajnaha charaktaru. 4 krasavika ŭ Minsku na vuł. Avakiana prahrymieŭ vybuch u padjeździe žyłoha doma. 28 krasavika vybuchnuła hazakampresarnaja stancyja ŭ Krupkach, a 30 krasavika — učastak hazapravoda kala Uzdy. 10 vieraśnia taho ž hoda spracavała vybuchovaje prystasavańnie ŭ budynku Savieckaha i Minskaha rajonnych sudoŭ. 6 kastryčnika ŭ Mahilovie ŭ padjeździe svajho doma ŭ vyniku vybuchu zahinuŭ kiraŭnik Kamiteta dziaržkantrolu pa Mahiloŭskaj vobłaści Jaŭhien Mikałucki. U suviazi z vybuchami ŭ sudzie i na hazapravodzie ŭ presie źjaviłasia infarmacyja pra źjaŭleńnie tak zvanaha Biełaruskaha vyzvolnaha vojska, jakoje nibyta ŭziało na siabie adkaznaść za tetyja akty. U Biełarusi pačałasia praca nad dekretam «Ab teraryźmie».

• 0
• 0
• 0
• 0
• 0
• 0
• 0
• 0