«Hety kryž daviadziecca brać Vitalu Rymašeŭskamu»

12 vieraśnia adbyŭsia treci ŭstanoŭčy źjezd BCHD. Zrešty, arhanizacyjnyja momanty na hety raz byli nie hałoŭnymi. Na paviestcy dnia stajała pytańnie adnosna ŭdziełu partyi ŭ prezidenckich vybarach.

Hetym razam źjezd byŭ nie nastolki pradstaŭničy, jak minułyja razy. Pavodle Paŭła Sieviarynca, na jaho adbiraŭsia adzin delehat ad dziesiaci partyjcaŭ. Ahułam ža ŭ im pryniało ŭdzieł 135 delehataŭ. Zala była ŭpryhožanaja niekalkimi vializnymi pałotniščami — ściahami BCHD.

Paŭła Sieviarynca pradstaŭlali, jak «lider, sustaršynia BCHD». Svoj spravazdačny vystup jon vyrašyŭ zrabić aryhinalnym. Zamiest zvyčajnaj pramovy skłaŭ rejtynh top‑10 dasiahnieńniaŭ BCHD za apošni hod.

Tak na dzieviatym miescy apynułasia toje, što partyjcaŭ zaraz u «chadekaŭ» bolš, čym u ich papiarednikaŭ u pieršaj pałovie XX st. Na vośmym — alternatyŭny ŭrad. Na piatym — častyja ŭzhadki na BT. Na trecim — try deputaty ŭ miascovych orhanach samakiravańnia. Na pieršym — hadavańnie novych lidaraŭ.

Pradprymalnik Hieorhij Dźmitruk z Kobryna zasiarodziŭsia na ekanamičnym aśpiekcie. Jon prapanavaŭ svaje kroki dla vychadu Biełarusi z ekanamičnaha kryzisu. Tut tabie i padatkovaja amnistyja, i lhotnaja lehalizacyja dachodaŭ, i trochhadovy maratoryj na pryvatyzacyju, i mahčymaść dla IPšnikaŭ najmać sabie rabotnikaŭ, i adziny taryf na ŭvoz aŭtamabilaŭ.

«BCHD nie prymaje dziki kapitalizm. My prapanoŭvajem sacyjalna‑ekanamičnuju płatformu, asabliva ŭ pierachodny pieryjad», — skazaŭ H.Dźmitruk.

«A ciapier pierad vami vystupić samy pryvabny kandydat na pasadu prezidenta ŭ vybarach 2010», — tak P.Sieviaryniec pradstaŭlaŭ partyjnaha vyłučenca Vitala Rymašeŭskaha.

Kandydat uśmichnuŭsia na heta: «Ja nie imknusia spadabacca ŭsim. Dastatkova spadabacca samym lepšym».

Rymašeŭski pačaŭ z taho, što zapeŭniŭ: BCHD nie stała łabistkaj niejkich zamiežnych intaresaŭ u Biełarusi. Tym nie mienš, «kurs na jeŭrapiejskuju intehracyju zastaniecca niaźmiennym».

Kandydat chryścijanskich demakrataŭ paviedamiŭ, što naviedaŭ usie rehijony krainy, dzie sustrakaŭsia, jak z svaimi adnapartyjcami, tak i z partniorami ź inšych arhanizacyj, ale «nivodnaha razu nie pačuŭ ničoha niehatyŭnaha ab dziejnaści BCHD».

Vital zaklikaŭ prysutnych zastavacca samakrytyčnymi, ale toj samaj samakrytyki ź jahonaha boku nie prahučała nijakaj. «Na nas lažyć adkaznaść za inšych ludziej, za našych partnioraŭ, jakija zdarajecca abražajuć nas», — nie prapuściŭ Rymašeŭski vypadku papiknuć kaleh pa demakratyčnym łahiery.

Adrazu paśla spravazdač vielmi chucieńka byli zaćvierdžanyja ŭsie arhanizacyjnyja momanty, kab mahčyma było padać dakumienty na rehistracyju. Nijakich niečakanaściaŭ tut nie adbyłosia. Źviarnuła ŭvahu na siabie tolki toje, što ź liku Nacyjanalnaj rady źnikli moładzievyja lidery Źmicier Daškievič i Artur Fińkievič.

Nu voś i padyšła čarha vyrašać pytańnie ab udziele ŭ prezidenckich vybarach. Pierad hetym Pavieł Sieviaryniec zrabiŭ nievialikuju daviedku ab ciapierašniaj situacyi ŭ krainie pierad takoj važnaj padziejaj. Farby atrymalisia dosyć zmročnyja, ale lider «chadekaŭ» nie hublaje aptymizmu.

Pavodle Sieviarynca, siońnia Rasija damahajecca poŭnaha pahłynańnia Biełarusi. «Režym uvajšoŭ u kanfrantacyju ź impieryjaj. Pakul jany źniščajuć adno adnaho, to treba naroščvać siły, kab uklinicca ŭ hetuju baraćbu i pieramahčy», — kaža były palitviazień.

Sustaršynia BCHD skazaŭ, što ŭsie astatnija nacyjanalnyja siły asłablenyja, tamu adkaznaść za budučyniu musiać brać jany. «Paźniak u vybarach nie ŭdzielničaje. Kazulin nie ŭdzielničaje. Milinkievič, jaki da niadaŭniaha času karystaŭsia našym aŭtarytetam, chutčej za ŭsio taksama nie budzie, — zaznačyŭ P.Sieviaryniec. — Ciapier hety kryž daviadziecca brać Vitalu Rymašeŭskamu. Staŭkaj jość usio».

Pytańnie ŭdziełu ci niaŭdziełu nie abmiarkoŭvałasia ŭvohule. Debaty vyklikali tolki niekatoryja momanty stratehii. Naprykład, zaklikać da bajkotu ŭžo padčas zboru podpisaŭ, ci tolki ŭ vypadku nie rehistracyi kandydata BCHD. Vyrašyli spynicca na druhim varyjancie.

Ahułam punkty vybarčaj stratehii hučać tak:

1. Vyłučyć Vitala Rymašeŭskaha kandydatam u prezidenty; 2. Kaardynavać nazirańnie, pracu ŭ kamisijach, a taksama pratestnyja akcyi ŭ vypadku rehistracyi A.Łukašenki, ź inšymi demakratyčnymi siłami; 3. Padčas kampanii hurtavać ludziej da BCHD, a taksama prapahandavać chryścijanskija kaštoŭnaści; 4. Kali kandydat nie budzie zarehistravany, to zaklikać da bajkotu i vychadu na Płošču.

Čamu nie razhladałasia varyjantu padtrymki inšaha kandydatu? Bo, ličać bechedešniki, ułady zarehistrujuć tolki zručnych dla siabie pretendentaŭ.

Cikava, što prapanova delehata z Babrujska Jaŭhiena Vaśkoviča ab niedapuščalnaści siabrami BCHD zboru podpisaŭ za niekalkich kandydataŭ, nibyta była niezaŭvažanaj.

U svajoj «tronnaj pramovie» Vital Rymašeŭski padkreśliŭ, što jahonaja kampanija budzie aryjentavacca na «čałavieka, na biełaruski narod, na Chrysta». Kandydat pierakanany, što vybary nielha ličyć techničnymi. Choć sam pryznaje, što jahonyja šancy, jak i inšych demakratyčnych kandydataŭ, «amal roŭnyja nulu». Tym nie mienš, Rymašeŭski pierakanany, što moža skłaścisia takaja situacyja, jakaja pryviadzie da pieramohi.

• 0
• 0
• 0
• 0
• 0
• 0
• 0
• 0