Łukašenka: Mnie b chaciełasia, kab mianie padtrymała dźvie traciny nasielnictva

1 kastryčnika Łukašenka daŭ tradycyjnuju štohadovuju pres-kanfierencyju dla rasijskich ŚMI. Heta ŭžo vośmaje padobnaje spatkańnie. Ahułam u Biełaruś prylacieła bolš za sotniu žurnalistaŭ.

Łukašenka pačaŭ tradycyjna, što «biełarusy i ruskija — adzin narod», ale vymušany žyć u roznych dziaržavach. Faktyčna, kiraŭnik krainy pryznaŭ, što zaprasiŭ žurnalistaŭ u adkaz na «biessaromnuju chłuśniu», jakaja źjaŭlajecca ŭ centralnych rasijskich ŚMI.

«Ja viedaju, što dla vašych žurnalistaŭ robiacca pieraškody, kab nie daj Boh trapili ŭ Biełaruś. Ja nie budu prasić vas pisać pra našu krainu ŭ viasiołkavych farbach. My nie pakryŭdžany na rasijski narod, — skazaŭ Łukašenka. A tyja nieparazumieńni, što isnujuć siońnia ŭ miž krainami adnios u vinu «kučcy palitykaŭ, chaj i vysokapastaŭlenych».

«Tam, dzie palityka jašče nie ŭmiašałasia, adnosiny iduć dobra. Najpierš na ŭzroŭni ludziej. My ad hetaha admaŭlacca nie budziem. A voś z hubiernatarami stała ciažej», — kiraŭnik dziaržavy dvojčy papiknuŭ susiedniuju dziaržavu, što tam hubiernatary pierastali abiracca ludźmi. Nibyta ŭ Biełarusi abirajucca.

Što datyčyć adnosin z vyšejšym kiraŭnictva, to «miakka kažučy, jany žadajuć być lepšymi». «Ale takaja taktyka sydzie na ništo. Stracić Biełaruś dla Rasii — heta katastrofa. My samy blizki narod. Kali budzie na toje vola, to adnosiny možna naładzić, a to pieraŭzyści za try ci šeść miesiacaŭ», — Łukašenka nibyta kaža, što hatovy zabycca na ŭsio staroje i pačać budavać adnosiny z nula.

Što datyčyć infarmacyjnaj ataki na rasijskich kanałach, to Łukašenka kaža, što viedaje zamoŭcaŭ. «Rasijaj by bolš zajmalisia, bolš tołku było. Kaniečnie, my maŭčać nie budziem na heta. Ale na što pakul adkazvać? Na toje, što ja štohod kradu 7 miljardaŭ dalaraŭ?».

Tym nie mienš, Łukašenka ličyć, što močać jaho nijakija nie ŚMI, a kamanda Miadźviedzieva. Kamanda Pucina taksama z hetym zhodnaja. «Heta tyja samyja ludzi, što mačyli Rachimava, Ilumžynava, Łužkova».

Što datyčyć Łužkova, to biełaruski lider i nadalej źbirajecca siabravać ź im. Jon niehatyŭna pastaviŭsia da adstaŭki mera Maskvy. I bližejšym časam nakiruje jamu list padtrymki.

Łukašenka raskazaŭ, što nibyta adzin z žurnalistaŭ ORT vučyŭ Stanisłava Šuškieviča zapłakać na pachavańni žurnalista Aleha Biabienina. Sam Łukašenka zaznačyŭ, što nikoli nie čuŭ pra takoha žurnalista da jahonaj śmierci.

Čarhovaja porcyja krytyki dastałasia apazicyi, jakaja źjaŭlajecca na rasijskich telekanałach. «Narmalna staŭlusia. Bolš dzivić pazicyja rasijskaha kiraŭnictva. Jana nie viedaje, chto takaja apazicyja? Hetyja ludzi na duch nie pieranosiać Rasiju».

Kiraŭnik krainy zaznačyŭ, što viedaje, ź jakich krynic finansujecca apazicyja. Voś niadaŭna byŭ zatrymany kurjer z 200 tysiačami dalaraŭ. Placoŭki dla pieradačy hrošaj stvoranyja ŭ Litvie, Polščy i Hiermanii. Naŭprost z Rasii nie viazuć», — kaža Łukašenka.

Na jahonuju dumku, Rasija stavić na bieśpierśpiektyŭnych palitykaŭ, tamu heta ŭsio niesurjoznaje. Moža być, prosta dla taho, kab papałochać jaho.

Łukašenka znoŭ zaznačyŭ, što viedaje ŭsich apazicyjanieraŭ pajmienna. «Ich 400 čałaviek bajavy atrad, 800 — vychodzić na akcyi. Nu moža 100 tysiač hatova padtrymać na vybarach».

Najbolš emacyjnym Łukašenka byŭ, kali havorka zajšła pra enierharesursy. «Z nami abyšlisia, jak sa źlejšym voraham», — havaryŭ Łukašenka pra pavyšeńni cenaŭ na haz i naftu.

«Ja nie viedaju, što budzie z Mytnym sajuzam. Kazachi taksama niezadavolenyja», — kiraŭnik krainy kazaŭ pra toje, što Rasija pierakryła biełaruskim tavaram vychad na rasijski rynak, bo miascovaja pradukcyja prosta nie vytrymlivaje kankurencyi.

Što datyčyć pastavak nafty ź Vieniesueły, to heta nie ad dobraha žyćcia.

Łukašenka pryznaŭsia, što sapraŭdy abiacaŭ Rasii pryznać niezaležnaść Abchazii i Paŭdniovaj Asiecii, ale Rasija admoviłasia kampiensavać škodu ad hetaha kroku. Najpierš u adnosnach ź Jeŭropaj i Amierykaj.

Adzin z žurnalistaŭ zapytaŭsia, ci praŭda, što Łukašenka sfalsifikavaŭ vyniki papiarednich vybaraŭ u bok pamianšeńnia. «Tak, praŭda. Z 96 ci 97% my źnizili da 87%» [napraŭdzie, pavodle aficyjnych źviestak, było 83%, a rasijskija i litoŭskija sacyjołahi nazyvali ličby ad 60 da 67% — Red.].

A na hetych vybarach kolki chočacie atrymać? «Mnie b chaciełasia, kab mianie padtrymała dźvie traciny nasielnictva. Heta kanstytucyjnaja bolšaść».

Łukašenka z honaram havaryŭ, što pałova kiraŭnictva Biełarusi etničnyja rasiejcy. U prykład pryvioŭ Žadobina, Martynava, Uciuryna. «My daviarajem rasijanam. A voś u rasijskim kiraŭnictvie biełarusaŭ niama».

* * *

Cytaty z łukašenkaŭskaha vystupu 1 kastryčnika.

«Urešcie, kali ja budu narmalna sychodzić, a nie pad pałkami naroda ci «atu!», to my znojdziem Prakapoviča, Siamašku… Heta vielmi mocnyja ludzi i ich u nas niamała. I ja mahu za ich słova skazać, kali vierycie — padtrymajcie. Ja tak siońnia dumaju. Moža, maja dumka pamianiajecca praz paŭhoda, kali krainu pačnuć na častki razryvać. I ja budu vymušany prymać niejkija radykalnyja rašeńni, ale ja hetaha nie chaču.

A što nie vyraścili — niapraŭda. U nas vielmi mnoha mocnych ludziej u krainie. Ale, kali jon mocny ministr, prem'jer-ministr, nie fakt, što jon budzie prezidentam.

Prezidentami nie stanoviacca, prezidentami naradžajucca.

Ja kateharyčna nie chaču abrazić svoj narod i nie dać jamu prava vybaru. Tamu zabudźcie hetyja razmovy, što ja rychtuju svaich synoŭ ci starejšaha syna jak spadkajemcu. Heta nie Rasieja. Nichto ŭ spadčynu ŭładu pieradavać nie budzie. Ja nie chaču, kab maje dzieci byli ŭ Biełarusi prezidentami. Ja najeŭsia, i maim dzieciam chapiła praź mianie hetaha prezidenctva».

«Vy ŭsprymajecie prezidenctva jak carstva. Voś sieŭ i carstvuj. Ja ŭsprymaju heta jak pracu…

Adzinaje, ja maru pra toje, što kali ja sydu, kab z maich dziaciej nichto nie ździekavaŭsia. Siońnia ŭsio dobryja, tabie pryhoža pieśni śpiavajuć… A potym buduć pałkami zakidvać…

«Śpirtnym ja nie zachapiŭsia. Mahu vypić, jak i ŭsie ludzi. I šmat mahu vypić, ale potym što budzie... U majoj maci niama fiermientu, jaki pierapracoŭvaje śpirtnoje. Vidać, pa spadčynie i ŭ mianie. Ja vielmi kiepska siabie adčuvaju, kali ja navat krychu vypivaju. Mnie albo hałava balić, albo ja raźbity ceły dzień... Ja chutčej jak žančyna ŭ hetym sensie. Kali mianie častujuć macavanym sałodkim žanočym vinom, to heta ja mahu pić. A mužyki ž pjuć harełku, samahonku mocnuju. Heta ja mahu pasprabavać, ale nie vielmi.

Takoje sumnaje žyćcio. Vy nie dumajcie, što ŭ mianie tam viesiałucha.

Ja nie lublu pratakolnyja mierapryjemstvy. Niachaj pryjom davierčych hramat u pasłoŭ. Staiš, jak statuj... Havorać adno, a dumajuć inšaje.

«Supakojciesia z hetaj demakratyjaj.

Demakratyja — heta stan hramadstva, dzie žančyna moža adčuvać siabie žančynaj, spakojna vyjści zamuž, stvaryć siamju, harantavana i spakojna naradzić dziaciej…

• 0
• 0
• 0
• 0
• 0
• 0
• 0
• 0