Michalevič choča stać novym Hajdukievičam?

Nie, jon sprabuje pazicyjanavacca ŭ niezvyčajnaj nišy. Piša Andrej Dyńko.

Aleś Michalevič ŭ vypadku abrańnia prezidentam najpierš źbirajecca vyznačyć status byłoha prezidenta, a paśla zaniacca ekanomikaj. Pra heta jon zajaviŭ u intervju ahienctvu «Interfaks-Zachad».

Na pytańnie, ci viernie jon «Pahoniu» i bieł-čyrvona-bieły ściah, Michalevič zajaviŭ, što nie budzie zajmacca takimi rečami, što heta maje vyrašyć parłamient. «Ale ja nie maju varožaha staŭleńnia da siońniašnich dziaržaŭnych simvałaŭ. Pad imi pieramahali mnohija biełaruskija spartoŭcy», — udakładniŭ jon.

Niečakanyja pryjarytety byli akreślenyja i ŭ zamiežnaj palitycy. «Ustupleńnie ŭ Jeŭrasajuz — nie meta», — miarkuje Michalevič.

Aleś Michalevič pačynaŭ svaju palityčnuju karjeru ŭ jakaści lidera Zadzinočańnia biełaruskich studentaŭ i ŭ Partyi BNF. Jon biełaruskamoŭny ŭ paŭsiadzionnym žyćci.

Ciapier jon sprabuje pazicyjanavacca ŭ niezvyčajnaj nišy: adkinuć staryja fietyšy i začapicca za sacyjalnyja temy, aktualnyja dla moładzi i siaredniaha słoju.

«Zrazumieła, što ja pryznaju „Pahoniu“ i bieł-čyrvona-bieły ściah jak nacyjanalnyja simvały, — patłumačyŭ kandydat Michalevič „Našaj Nivie“. — Ja vyras z hetym ściaham i hierbam. Majo mierkavańnie, što hetym pytańniem nie pavinien zajmacca prezident. Jaho budzie abmiarkoŭvać parłamient. Nam treba zvykacca, što kiraŭnik dziaržavy maje vykanaŭčuju funkcyju. Dla mianie važna danieści ludziam, što ja prapanuju palapšeńnia ŭzroŭniu žyćcia biez łomki sistemy, jakaja, treba pryznać, im padabajecca».

Tym samym jon abhruntoŭvaje nieabchodnaść vyznačeńnia statusu byłoha prezidenta. «Heta najpierš datyčyć nie harantyj, a pravavoha stanovišča. Jakim jano budzie — zaležyć ad situacyi. U nas nikoli nie było byłych prezidentaŭ, tamu i status ichni ŭsio jašče nie vyznačany».

Ci praŭda, što Michalevič pretenduje na rolu novaha Hajdukieviča? — zapytalisia my.

«Spakojna staŭlusia da naviešvańnia jarłykoŭ, — adkazaŭ Michalevič. — Kali ja kažu, što ŭ maje pryjarytety nie ŭvachodzić ustupleńnie ŭ Jeŭrasajuz, to heta nie značyć, što ja hetaha nie chaču.

Heta aznačaje, što na dadzienym etapie zrabić heta nierealistyčna, tamu hetaha i niama ŭ pryjarytetach».

Aleś, ty nie nazyvaješ siabie ŭžo apazicyjaj? — spytalisia my.

«Nie, — paćvierdziŭ jon. — Ja nie pradstaŭlaju ni ŭładu, ni apazicyi. Jak, darečy, i nie krytykuju. Ja za madernizacyju biez łomki sistemy».

Adnak

biełaruskaje hramadstva ŭ palityčnym sensie zastajecca bipalarnym. Tamu Michalevič ryzykuje akazacca miž dvuch kresłaŭ.

* * *

Aleś Michalevič nar. u 1975. Jon ź siamji navukoŭcaŭ. Skončyŭ BDU pa śpiecyjalnaści palitałohija. Uznačalvaŭ Zadzinočańnie biełaruskich studentaŭ, doŭhi čas uvachodziŭ u Partyju BNF. Byŭ deputatam Puchavickaha rajsavieta. Žanaty, maje dźviuch dačok.

• 0
• 0
• 0
• 0
• 0
• 0
• 0
• 0