«Voś tolki dziaŭčynki nia rušcie!»

Praz 30 dzion paśla «ŭznaŭlenčaj terapii» ŭčora viečaram dziesiacihadovuju Viku Maroz pieradali siamji Vasileŭskich z Žodzina, jakaja źbirajecca ŭsynavić 13-hadovaha brata dziaŭčynki. Hetaj infarmacyjaj padzialiŭsia ź ŚMI advakat pasolstva Biełarusi ŭ Italii Dyjega Perudžyni. Jaje paćvierdziła «Salidarnaści» j namieśnica ministra adukacyi Taciana Kavalova. Kažuć, dziaŭčynka sama zrabiła taki vybar.

— Heta praŭda. Ad učora Vika Maroz znachodzicca ŭ siamji Vasileŭskich u Žodzinie, – skazała Taciana Kavalova.

—Ci značyć heta, što supruhi z Kagaleta bolš nikoli nie pabačać Viku-Maryju, choć z 2003 hodu jany doŭhi čas prymali jaje ŭ Italii j u studzieni 2004 hodu padali prašeńnie pra jaje ŭdačkavańnie?

— Heta ničoha nia značyć. Na siońniašni dzień prosta vyrašanaja zadača ŭładkavańnia Viki na vychavańnie ŭ siamju. Z usich mahčymych varyjantaŭ dziaŭčyna vybrała mienavita hety. U peryjad adaptacyi jana šmat razoŭ byvała ŭ haściach u Vasileŭskich i vykazała žadańnie žyć u ich. Heta nie ŭdačkavańnie. Z pryjomnaj siamjoj prosta zaklučajecca damova. Baćki najmajucca na pracu. Jany atrymlivajuć zarobak i dapamohu na dzicio.

— Na jaki termin zaklučanaja damova na vychavańnie Viki?

— Zvyčajna takaja damova zaklučajecca papiarednie na hod. Za hety čas mohuć vyjavicca niejkija prablemy ŭ supolnym žyćci dzicionka i pryjomnaj siamji. Kali ŭsio dobra, to praz hod damova praciahvajecca. Pry hetym uličvajecca mierkavańnie i baćkoŭ, i dzicia, kali jano starejšaje za 10 hadoŭ. Jašče raz paŭtaraju: heta nia jość udačkavańnie. Heta ŭsiaho tolki forma siamiejnaha ŭładkavańnia, jakaja nie vyklučaje ŭdačkavańnia Viki.

— Italjanskaj…

— …ci jakoj-niebudź inšaj siamjoj.

— A ci mahu ja patelefanavać Vasileŭskim?

— Navošta?

— Kab spytać u samoj Viki, jak jana pačuvajecca?

— Ja vas vielmi prašu: voś tolki dziaŭčynki, kali łaska, nia rušcie. U dziciaci jość prava na asabistaje žyćcio. Ja vas vielmi prašu: kirujciesia intaresami dziciaci.

«Niama sumnievu, što heta najlepšaje z rašeńniaŭ, nichto z nas nia dumaje, što lepš było b pakinuć małuju ŭ internacie, – cytuje advakata biełaruskaha boku Dyjega Perudžyni italjanskaja hazeta La Repubblica. – Aproč taho, jana sama vyraziła žadańnie być razam z Sašam, i my vykanali jaho».

Kjara Barnačyn i Alesandra Džusta, jakija ŭ vieraśni admovilisia viartać Viku na radzimu i 20 dzion chavali jaje ŭ klaštary, nibyta kab uścierahčy ad prynižeńniaŭ u biełaruskim dziciačym domie, pakul nia viedajuć pra toje, što ŭ Viki časova źjavilisia inšyja baćki.

Tym časam prakuratura Gienui viadzie raśśledavańnie ŭ dačynieńni da supruhaŭ Džusta-Barnačyn i dźviuch «babulaŭ», Maryi Eleny Dańjina i Marety Bordzi, jakija «pierachoŭvali dziaŭčynu». Razam ź imi abvinavačvańni byli pradjaŭlenyja śviataru Kagaleta donu Daniła Gryła, jaki na aŭtamabili supravadžaŭ dziaŭčynku ŭ klaštar, i nastajacielu chramu ajcu Frensysu Darbeli.

Raniej supruhi Vasileŭskija kazali, što ŭ ich «niama mahčymaści» ŭziać Viku na vychavańnie. A supruhi Džusta-Barnačyn hatovyja byli ŭsynavić aboje dziaciej – i Viku, i jejnaha brata. Ale na minułym tydni siamja Vasileŭskich pieradumała i vyrašyła taki ŭziać dziaŭčynu da siabie.

• 0
• 0
• 0
• 0
• 0
• 0
• 0
• 0