Jak jehipieckim maładafrontaŭcam udałosia vykrasać jaskarku, ź jakoj razharełasia połymia

Dziesiacihodździami jehipieckamu śpiecnazu ŭdavałasia razhaniać mitynhi apazicyi. U studzieni moładź padmanuła śpiecsłužby.

Masavyja demanstracyi ŭ Jehipcie adbylisia ŭ tym liku i dziakujučy adnamu chitryku, pra što śviedčać intervju ź niekatorymi arhanizatarami pratestu.

25 studzienia, u pieršy dzień pratestaŭ, aktyvisty moładzievaha kryła apazicyi Jehipta arhanizavali z vyhladu spantannaje skapleńnie žycharoŭ truščobaŭ Bułak al-Dakrur na zachodniaj uskrainie Kaira. Hetyja demanstranty byli nie tymi adukavanymi maładymi ludźmi, što daviedalisia pra pratesty ź internetu. Heta byli biednyja jehipcianie, jakija zapoŭnili łabirynty brudnych vuzkich zavułkaŭ i rašuča sustreli palicejskich.

Ale ŭ hetym prateście nie było ničoha spantannaha. Jak arhanizatary zdoleli jaho padniać, kali stolki namahańniaŭ u minułym nie davali ničoha?

Paśla svajho vyzvaleńnia z-pad varty ŭ niadzielu staršynia adździeła markietynhu karparacyi Google Vail Hanim raskazaŭ pra svaju sustreču z novapryznačanym ministram unutranych spravaŭ Jehipta. «Nichto nie razumieje, jak vy heta zrabili», — skazaŭ jamu ministr.

Pratestoŭcy, što naležać da kiraŭnictva Revalucyjnaha moładzievaha ruchu, jaki zrabiŭsia hałoŭnym pradstaŭnikom udzielnikaŭ pratestu na płoščy Tachryr, raskazali ŭ intervju, jak jany heta rabili.

U pačatku studzienia jadro Ruchu vyrašyła, što jany pasprabujuć paŭtaryć dasiahnieńni pratestoŭcaŭ u Tunisie, u vyniku jakich byŭ zrynuty prezident Ben Ali.

Dziasiatki pratestoŭcaŭ štodnia ciaham dvuch tydniaŭ sustrakalisia u ciesnaj haścioŭni maci moładzievaha aktyvista Zijada al-Alimi. Jaho maci adsiedzieła šeść miesiacaŭ u turmie za ŭdzieł u pratestach padčas chlebnych buntaŭ 1977 hoda.

U «zmovie» ŭziali ŭdzieł pradstaŭniki šaści moładzievych ruchaŭ, źviazanyja z apazicyjnymi palityčnymi partyjami, hrupami, jakija vystupajuć za pravy pracaŭnikoŭ, i «Musulmanskim bractvam».

Jany vybrali 20 miescaŭ, dzie prachodzili pratesty, — jak praviła, blizka ad miačeciaŭ, u hustanasielenych rabočych kvartałach vakoł Kaira. Jany spadziavalisia, što takuju vialikuju kolkaść raśsiejanych mitynhaŭ siły biaśpieki zdušyć nie zdolejuć, i budzie šaniec, što niekatoryja pratestoŭcy vyrvucca i złučacca na płoščy Tachryr.

Arhanizatary publična zaklikali da pratestaŭ 25 studzienia ŭ hetych miescach, paviedamili pra heta ŭ internecie. Ale heta jašče nie ŭsio.

«Pra 21-je miesca nie viedaŭ nichto», — kažuć arhanizatary.

Hetyja aktyvisty byli nie adzinymi, chto zaklikaŭ da pratestaŭ u hety dzień. Inšyja ŭpłyvovyja hrupy abjadnali vysiłki i resursy. Staronka na fejsbuku, pryśviečanaja Chaledu Saidu, maładomu čałavieku, zabitamu da śmierci palicejskimi ŭ Aleksandryi, zrabiłasia miescam zboru jehipieckich aktyvistaŭ anłajn.

Byli stvoranyja staronki na arabskaj i anhlijskaj movach, u kožnaj ź jakich byŭ svoj administratar. Adnym ź ich byŭ Vail Hanim, inšyja zastajucca ananimnymi.

Apošnija try dni pierad pratestam arhanizatary načavali nie doma, aścierahajučysia palicyi. Bajučysia kantrolu za telefonnymi zvankami, jany karystalisia telefonami blizkich i siabroŭ.

Jany pasłali nievialikija kamandy na raźviedku ŭ tajemnym 21-m miescy. Heta byŭ rajon Bułak al-Dakrur.

Arhanizatary kažuć, što jany viedali, što pośpiech demanstracyj budzie zaležać ad udziełu prostych jehipcian, u rabočych rajonach, jak hety, dzie internet nie tak šyroka vykarystoŭvajecca. Jany raspaŭsiudžvali pa horadzie ŭlotki za niekalki dzion da demanstracyi, zasiarodziŭšy namahańni na rajonie Bułak al-Dakrur.

25 studzienia palicyja skancentravała siły na 20 miescach, pra jakija paviedamlałasia ŭ internecie, a tym časam čatyry palavyja kamandziry, vybranyja z kamiteta arhanizataraŭ, pačali raźbivać aktyvistaŭ na hrupy pa 10 čałaviek. Dla bolšaj sakretnaści tolki adzin čałaviek u kožnaj hrupie viedaŭ metu apieracyi.

Takimi nievialikimi hrupami pratestoŭcy skiravalisia da kandytarskaj u rajonie Bułak al-Dakrur, złučajučysia ŭ natoŭp z 300 demanstrantaŭ, svabodnych ad palicejskaha kantrolu.

Adsutnaść palicyi zaachvociła navakolnych žycharoŭ sotniami vyjści ź ciesnych zavułkaŭ mikrarajona.

U 13:15 jany pačali marš u centr Kaira. Da hetaha času palicyja pieradysłakavałasia, kab zabłakavać im darohu, ale šerahi pratestoŭcaŭ vyraśli dastatkova, kab prarvać ačapleńnie.

Inšym pratestoŭcam, što sabralisia la miačeciaŭ pa ŭsim horadzie, nie ŭdałosia dasiahnuć płoščy Tachryr — ich spynili palicejskija kardony. Demanstranty z Bułak al-Dakrura byli adzinymi, chto zaniaŭ płošču praź niekalki hadzinaŭ paśla poŭnačy, kali palicyja vykarystała suprać demanstrantaŭ ślezaciečny haz i humovyja kuli.

Jehipcianie pieršy raz bačyli takija demanstracyi na vulicach, i heta taksama stała pryčynaju taho, što dziasiatki tysiač čałaviek vyjšli pratestavać u nastupnuju piatnicu.

28 studzienia jany znoŭ zaniali płošču Tachryr. I zastalisia tam.

• 0
• 0
• 0
• 0
• 0
• 0
• 0
• 0