Voś što budujuć na miescy staroha minskaha ankacentra ŭ styli savieckaha madernizmu FOTY
Dva hady tamu, u lutym 2024 hoda, stała viadoma, što ŭ Minsku źbirajucca źnieści budynak palikliniki ankałahičnaha centra, raźmieščany ŭ rajonie Akademii navuk. Ciapier na jaho miescy ŭžo vyras 8‑paviarchovy korpus. Vydańnie Blizko.by pahladzieła, jak prasoŭvajucca raboty.
Hetaja paliklinika była pabudavana ŭ 1977 hodzie. Ale jana ŭžo nie spraŭlałasia z patokam pacyjentaŭ, da taho ž tut nie było lifta. Raniej budynak u styli savieckaha madernizmu chacieli rekanstrujavać: nadbudavać pavierch i ŭźvieści prybudovu. Ale, kažuć śpiecyjalisty, fundamient i apornyja kanstrukcyi nie vytrymali b madernizacyi. Tamu vyrašyli całkam jaho źnieści i pabudavać na hetym miescy novy.
Da znosu budynka prystupili ŭžo ŭ kastryčniku. Blizko.by paśpieŭ źniać budynak z roznych bakoŭ niezadoŭha da znosu.
A ŭ 2025‑m prystupili da budaŭnictva novaha budynka. Novaja paliklinika budzie vaśmipaviarchovaj, raźličanaj na 1 500 naviedvańniaŭ u źmienu. Tut taksama raźmieściacca niešpitalnyja słužby i administracyjny aparat. Zdača abjekta ŭ ekspłuatacyju čakajecca praz try-piać hadoŭ, bieź ćviordaj kankretyki.
Voś jak vyhladaje abjekt pa stanie na kaniec lutaha 2026 hoda. U budynku zaviaršajecca zaškleńnie, idzie abšyŭka termašubaj.
Praŭda, ciapier užo kažuć, što novy korpus ankacentra raźličany na 1000 naviedvańniaŭ u źmienu. Tut buduć akazvać ambułatorna-palikliničnuju i kansultatyŭna-dyjahnastyčnuju dapamohu.
U budynku raźmieściacca niekalki kansultatyŭna-palikliničnych adździaleńniaŭ, kansultatyŭna-dyjahnastyčnaje adździaleńnie tyreoidnaj patałohii, adździaleńni pramianiovaj i mahnitna-rezanansnaj dyjahnostyki, fizijaterapieŭtyčnaha lačeńnia i UHD-dyjahnostyki, rehistratura. Na druhim paviersie buduć kanfierenc-zała na 200 miescaŭ, zała dla naradaŭ, navučalnyja aŭdytoryi i pamiaškańni kafiedry ankałohii BDMU.
Na abjekcie stvorać biezbarjernaje asiarodździe, uvachod arhanizujuć z uzroŭniu ziamli.
Fasad budynka budzie kambinavanym — vientfasad ź lohkaj tynkavaj sistemaj i vitražami. Interjer vykanajuć pry dapamozie dekaratyŭnaj mazaičnaj tynkoŭki śvietła-biežavaha adcieńnia z akcentnymi ŭstaŭkami siniaha koleru.
Voś tak vyhladajuć rendary budučaj palikliniki.
Kamientary
U budučaj Biełarusi treba budzie abaviazkova pierakłaści heta na biełaruskuju movu
U zahałoŭku nieadnaznačnaść: čytajecca i jak pra novy budynak u styli madernizmu.