Nasta Pałažanka atrymała premiju Dziarždepartamienta ZŠA

Časovy pavierany ZŠA ŭ Biełarusi Majkł Skenłan uručyŭ Mižnarodnuju žanočuju premiju «Za mužnaść» namieśnicy staršyni «Maładoha frontu» Naście Pałažancy. 20-hadovaja Nasta stała pieršaj biełaruskaj, uznaharodžanaj prestyžnaj premijaj, jakuju Dziarždepartament ZŠA štohod uručaje 10 žančynam roznych uzrostaŭ i nacyjanalnaściaŭ.

Z nahody Mižnarodnaha dnia žančyn časovy pavierany ZŠA ŭ Biełarusi Majkł Skenłan naładziŭ uračysty pryjom, na jaki byli zaprošanyja žančyny-pravaabaroncy, žurnalistki, maci paciarpiełych ad uładaŭ hramadskich aktyvistaŭ. Adnak hałoŭnaj padziejaj uračystaści stałasia ŭručeńnie premii Naście Pałažancy. Padčas cyrymonii ŭznaharodžańnia Majkł Skenłan skazaŭ: «Dziaržsakratar štohod uručaje hetuju ŭznaharodu žančynam, jakija advažna baroniać pravy žančyn, asnoŭnyja pravy čałavieka i pryncypy demakratyi. I Nasta sapraŭdy adpaviadaje ŭsim hetym jakaściam. Jana ŭvasablaje vydatny prykład patencyjnaj hramadskaj aktyŭnaści ŭ Biełarusi. Nie zvažajučy na palityčny cisk, jaki źviedała sama Nasta i jaje siamja, jana praciahvaje baranić svabodu hramadzianskaj supolnaści i zmahacca za pravy čałavieka. Niahledziačy na surjoznyja i vialikija pieraškody jana praciahvaje vieryć, što možna damahčysia lepšaj budučyni».

Uračystaje ŭšanavańnie atrymalnic premij Dziarždepartamientu ZŠA adbyłosia 8 sakavika ŭ Vašynhtonie. Dziaržsakratar Chiłary Klintan padčas uručeńniavykazała škadavańnie, što biełaruska Nasta Pałažanka nia moža asabista atrymać uznaharodu.

Nasta Pałažanka: «Adčuvaju, biezumoŭna, radaść i honar za toje, što mnie daviałosia prezientavać mužnuju častku našaha hramadztva — našych žančyn, jakich vielmi šmat. Heta i žonki, i maci palitviaźniaŭ, i dziaŭčaty, jakija ich čakajuć. Bo ad padtrymki žančyn, ad ich duchu zaležyć toje, jak pačuvajucca našy mužčyny ŭ turmie. I tamu ja liču, što hetaja ŭznaharoda — vialikaja adkaznaść i na mnie. I ja ŭśviedamlaju, što hetaja ŭvaha dla mianie abaviazvaje mianie rabić usio mahčymaje, kab usie źniavolenyja vyjšli na svabodu».

Siarod mnohich inšych viadomych i aktyŭnych biełaruskich žančyn, jakija prysutničali na cyrymonii ŭručeńnia premii Naście Pałažancy, — narodnaja artystka Biełarusi Zinaida Bandarenka: «Heta taki mužny čałaviek — choć i dzicia jašče zusim. Ale kolki ŭ jaje mocy, hartu i imknieńnia, kab pryjšła svaboda ŭ Biełaruś! Ja prosta ščaślivaja za Nastu».

• 0
• 0
• 0
• 0
• 0
• 0
• 0
• 0