«Čyrvony kapturok» — hatyčna-hłamurnaja strašnaja mieładrama pa matyvach viadomaj kazki. U hałoŭnych rolach — Amanda Sejfryd i Hary Ołdmen.
Čyrvony kapturok (Red Riding Hood)
ZŠA — Kanada, 2011, kalarovy, 100chv.
Režysior: Ketryn Hardvik
Roli vykonvajuć: Amanda Sejfryd, Hery Ołdmen, Šajło Fernandez, Maks Ajrans, Bili Biork, Virdžynija Medsen, Džuli Kryści, Łukas Haas
Žanr: Hatyčna-hłamurnaja strašnaja mieładrama pa matyvach kazki Šarla Piero
Adznaka: 5 (z 10)
Valeryja — dziaŭčyna ŭ čyrvonym płaščy — zakachanaja ŭ dryvasieka Pitera, ale matula prahnie vydać jaje za bahaciejšaha Hienry. Kali dziaŭčyna vyrašaje ŭciačy z kachanym, u vioscy pačynajucca zabojstvy. Piarevaracień — niechta blizki da Čyrvonaha kapturka.
Stužka Ketryn Hardvik — eklektyčnaja miašanka z kazak, hotyki, detektyvaŭ i mieładramnych pakutaŭ.
Čyrvony kapturok Amanda Sejfryd — hałoŭnaja pažada piarevaratnia — hierainia niepierakanaŭčaha luboŭnaha trochkutnika. Impetny Hary Ołdmen — palaŭničy na viedźmaŭ i vaŭkałakaŭ — aŭdavieły biskup (!) sa srebnymi paznohciami j zabłukałym žaleznym słanom u katavalnaj kalekcyi. A babula Džulija Kryści ździŭlaje śviežym makijažam, chacia žyvie na lasnoj palanie.
Les u karcinie — cukierna-kardonavy, śnieh — saładžava-bieły, a słynny čyrvony płaščyk vyhladaje abnoŭkaj z modnaj kalekcyi.
Kazačka pra Čyrvony kapturok (ad jakoj mała što zastałosia) prasiaknutaja hłamurnym patasam i ślaźlivymi ŭzdychami «Pryciemkaŭ».Pierajemnaść z papularnaj dziavočaj sahaj uzmacniaje i tamašni akcior Bili Biork.
Ale, niahledziačy na takuju spadčynu, detektyŭnaja intryha ŭ filmie niabłaha zakručanaja. I nie varta čakać kazki.
«Padniabiennaha źbivaŭ były načalnik kałonii». Voś što raskazvajuć pra palitviaźnia, jaki zahinuŭ za kratami ŭ 36 hadoŭ3
Kamientary