Bandarenku dali 2 hady ahulnaha režymu
Prakuror prasiŭ try hady.
Siońnia sud Pieršamajskaha rajona stalicy (sudździa Taćciana Ryvinskaja) vynies prysud hramadskamu aktyvistu, kaardynataru «Jeŭrapiejskaj Biełarusi» Źmitru Bandarenku, jaki byŭ na prezidenckich vybarach davieranaj asobaj kandydata ŭ prezidenty Andreja Sańnikava.
Źmicier Bandarenka asudžany na dva hady kałonii ahulnaha redymu (art. 342 KK). Prakuror prasiŭ pakarać maksimalnym terminam pavodle hetaha artykuła — tryma hadami pazbaŭleńnia voli.
Jon taksama pavinien spłacić 159 tys. rubloŭ (kala 40 dalaraŭ) štrafu za škodu, naniesienuju pracy hramadskaha transpartu.
Źmicier Bandarenka vyhladaŭ vielmi spakojna, trymaŭsia ŭpeŭniena, siadzieŭ u kletcy, čytaŭ «Biełorusy i rynok».
* * *
Mienavita za «Płošču» asudžana ŭžo vosiem čałaviek:
za ŭdzieł u masavych biesparadkach Vasil Parfiankoŭ pryhavorany da čatyroch hadoŭ pazbaŭleńnia voli ŭ kałonii strohaha režymu; Alaksandr Atroščankaŭ — da čatyroch hadoŭ u kałonii ŭzmocnienaha režymu; Mikita Lichavid — da troch z pałovaj hadoŭ pazbaŭleńnia voli, Dźmitryj Novik i Alaksandr Małčanaŭ — da troch z pałovaj i troch hadoŭ u kałonii ŭzmocnienaha režymu adpaviedna; hramadzianie RF Arciom Breus i Ivan Haponaŭ — da štrafu ŭ 300 bazavych vieličyniaŭ (10,5 młn. rubloŭ) kožny; Dźmitryj Miadźviedź — da troch hadoŭ abmiežavańnia voli biez nakiravańnia ŭ papraŭčuju ŭstanovu.
Za złosnaje chulihanstva byli taksama asudžanyja Źmicier Daškievič i Eduard Łobaŭ — na dva i čatyry hady pazbaŭleńnia voli adpaviedna. Ich zatrymali 18 śniežnia, za dzień da prezidenckich vybaraŭ.
* * *
Siońnia idzie sud nad Andrejem Sańnikavym, jakoha sudziać razam ŭ hrupaj čatyroch šarahovych udzielnikaŭ akcyi: Illoj Vasilevičam, Aleham Hniedčykam, Fiodaram Mirzajanavym i Uładzimiram Jaromienkam. Hety praces prachodzić u sudzie Partazanskaha rajona stalicy,
a 11-j hadzinie ŭ Kastryčnickim sudzie pačynajecca razhlad spravy ŭpartaha aktyvista apazicyi Paŭła Vinahradava, junaka z Hrodna Alesia Kirkieviča, archivista Źmitra Drazda, Andreja Pratasieni i Uładzimira Chamičenki (ahient «Navušnik»).
Usim im inkryminujuć arhanizacyju i ŭdzieł u masavych biesparadkach, što karajecca maksimalnym terminam da piaci hadoŭ.
Kandydataŭ u prezidenty Uładzimira Niaklajeva, Vitala Rymašeŭskaha, aktyvistaŭ "Havary praŭdu!" Alaksandra Fiadutu, Siarhieja Vaźniaka i Andreja Dźmitryjeva, maładafrontaŭku Nastu Pałažanku pačnuć sudzić 5 maja.
Kamientary